《小傳日記》呢兩日最大新聞莫過於平保（０２３１８）疑似被要求出手救碧桂園（０２００７），雖然平保強烈否認，不過事後平保就跌穿位，內房就彈起。究竟呢單料有幾真又有幾假呢？　　睇返《路透》呢篇報道入面，繼續照例只係引述消息人士，並無講明係由咩人透露出來。不過報道一開頭就撻朵，直接講到平保要出手救碧桂園，係由國務院總理李強直接指示廣東省政府安排。據講上面係希望由一樣係廣東省企業嘅平保來出手，以免要由其他省嘅企業來承擔。　　報道又提到好多細節，其中講到早喺８月已經開始為平保接管碧桂園進行談判，而談判係真係有得傾，因為據報上面覺得平保始終係上市公司，要同股東交代，所以係真係享有一定談判空間，有份參與談判嘅仲包括人行金融市場司官員以及金管會人員。　　據講阿爺初步方案係希望平保可以持有碧桂園股份五成以上而成為控股股東，然後再透過分段注資來提高碧桂園嘅流動性。報道提到阿爺希望碧桂園問題可以喺廣東內部解決，又希望將平保入主碧桂園變成範本，成為其他大鑊房企嘅參考。　　不過報道曝光之後平保堅決否認被要求出手，仲直接向孖屐講明自９月起已經無再持有碧桂園股份，而之前係一直持有４﹒９９％碧桂園，但係一旦持有股數低於５％，再減持落去都毋需要公布，令市場一直以為平保仲係碧桂園大股東之一。　　通常外媒嘅報道都唔會係空穴來風，最少都一定有啲根據，出得街就應該假唔曬。而報道仲提到國務院總理李強，令成件事嘅可信程度更加高。而報道亦都提到，一切只係「洽談中」，相信談判係真有其事，不過一切都未落實，而且平保並唔係被下令「必須」要出手，所以平保嘅否認亦係理所當然。不過平保咁大反應否認，仲要講明已經同碧桂園割席，相信平保出手嘅成事機會都唔會好高。　　值得關注係同期一樣係廣東省企業嘅萬科（０２２０２）就由一樣係廣東省深鐵集團來拯救，而呢個反而就係同省自救嘅範本，亦示範咗國企針對出險民企可以做到啲咩。不過唔同嘅係，雖然平保同碧桂園一樣係國企股東同民企嘅關係，不過深鐵係百分百嘅國資持股嘅國企，相對平保嘅國企成分相對少好多，而且仲有摩通同貝萊德兩大外資大行作為大股東，就算投票決定救唔救碧桂園都可能會被否決，所以根本平保真係出手嘅機會係細得多，請請！　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

【母親節限時優惠】 送價值$288維柏健30天逆轉肌齡(膠原蛋白+生物素) ► 火速行動