《小傳日記》中港股市地震，魚缸彈咗噚日咁大把又再開始探底之旅，雖然期間阿爺都「手口並用」，一邊鬆口放利好消息，一邊就疑似出手托Ａ股，但升得一日，又再ＡＨ齊跌，難怪普遍孖屐中人都唔睇好國家隊救得幾多。　　國新辦噚日搞咗場發布會，期間發改委副秘書長袁達就出來講咗幾句，被視為係交代返上個月嘅遊戲股驚魂，話之後發改委將全面審慎評估政策效應，「多公布有利於穩預期、穩增長、穩就業的政策；審慎出台收縮性、抑制性舉措」。　　袁達就話，２０２２年起發改委已經建立政策文件評估機制，要求新出台政策要同宏觀政策取向一致，但凡國務院各部門出台文件係涉及宏觀經濟同市場預期，都須要先經發改委做宏觀政策取向一致性評估，評估政策文件係咪符合黨中央精神，會唔會對經濟產生收縮性影響，或者暫時對社會預期產生不利影響。　　袁達又坦言目前社會預期係偏弱，強化政策統籌更加重要。之前中央經濟工作會議就要求增強宏觀政策取向一致性，將非經濟政策納入埋宏觀政策取向做一致性評估，未來將會「深入貫徹落實中央經濟工作會議精神，高質量做好宏觀政策取向一致性評估工作」。　　上年中經會喺１２月１１至１２號舉行，當時就已經講過「要求增強宏觀政策取向一致性」，但係遊戲新規「大禮」就喺一個禮拜多啲之後嘅１２月２２號送到，重磅震跌ＱＱ（００７００）同網易（０９９９９）。事後據報新規直接負責人中宣部出版局局長馮士新被免職，相信就係因為出咗呢條「唔太一致」嘅新規。　　回想返當日中宣部出版局出爐新規之前，應該都要先送去發改委做「一致性評估」，但最終都照出咗，係無預計到新規對孖屐嘅影響程度係咁大，定係有咩隱衷，都係不得而知。但今次發改委派人出來回應返，都算係交代返件事。雖然係利好消息，不過股價一跌就奔流到海不復回，ＱＱ網易都未上得返去，炒埋人都未搞得返掂，真係有排搞，請請！　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

【你點睇】政府宣布垃圾徵費暫緩，未來將繼續推廣回收及減廢，你認為幾時先係垃圾徵費嘅時機？► 立即投票