17/01/2020 11:58
《魚缸博客》煤氣(00003)十送一又開始炒?
《魚缸博客》嗱嗱嗱,「炒股講時節」,博客講到悶,而呢期應該買乜好?無措,就係買煤氣(00003)啦! 以前博客成日都話「In四叔,We trust」,煤氣年年玩十送一,年年派,年年股價係咁升。雖然去年中期份業績差小小咁,但無礙博客對佢嘅信心,皆因派息政策同送紅股係煤氣咁多fans嘅原因。 不過又咁講,今年下半年香江政治事件頻繁,好多食店又話倒閉、又話關閉分店咁,對煤氣有唔多唔少影響,加上四叔退休後,兩位李公子首次擔大旗主持業績,唔知兩位公子搞唔搞得掂啲股東呢? 大行大和月初出份報告,話煤氣去年10月份煤氣銷量跌半成,預計11月會有5至6巴仙跌幅,12月就放緩至2巴仙,將煤氣由「持有」升至「跑贏大市」,目標價由17﹒9銀降至17﹒2銀。大和個口吻雖然係咁引用數據話佢銷售下跌,但反而提升佢評級,證明差極都有個譜。 博客又咁睇,你睇上半年香江打到風風火火咁,煤氣股價都係都係咁穩陣,加上今年花旗國息口又唔知咩情況,公用股點都係有些少吸引。今日想推介煤氣畀大家嘅時候,股價又抽升咗近2巴仙,相信唔少大戶都開始入手買定等派紅股。 睇返過往歷史,煤氣都係「財息兼收」嘅股份,總之就有買貴無買錯,現價追入都重有水位,放係到等幾十年都有著數,但要睇目標價,可以先睇大約18銀。
《編者按》本欄搜羅即市傳聞,惟消息未經證實,《經濟通》亦不保證內容之準確性。
《編者按》本欄搜羅即市傳聞,惟消息未經證實,《經濟通》亦不保證內容之準確性。
etnet榮獲HKEX Awards 2023 「最佳表現證券數據供應商」大獎► 了解詳情