呢排美團(03690)同京東(09618)都各自出手，其中美團正式宣布推出即時零售品牌「美團閃購」，而京東將就再招收不低於5萬名全職外賣員，全額足額全部繳納五險一金且所有費用都由公司承擔。

　　呢場「京東鬥美團」點解可能發生到呢？博客覺得同人力資源價格有關。而家中國經濟轉弱，加上中美貿易戰都唔知打幾耐先會完，好多本身喺廣東打螺絲、燒電路板嘅工人都無飯開，係內地有大量廉價勞動資源底下，就有「京東鬥美團」呢件事發生。

　　博客曾經同內地一啲科技公司傾過，無人機送貨其實先係速遞最終目標，事實上而家內地好多地方都試行緊，例如你病左要搵人送藥，藥房就可以用無人機係方圓五公里以內，直接送去你窗口收藥（或者要你落樓收）；有啲地方可能太密集，無人機飛唔到入去，就會有個「接送點」，無人機先送去呢個點，顧客可以直接去呢個點收貨，或者加錢搵人送上樓。

　　而美團主打「30分鐘好貨到家」及「萬物皆可購」，大概都係玩呢種套路，前期燒錢請人送貨，同時無人機摸熟晒飛行路線，係全中國各省各市都有自己大數據資料庫，人力送遞應該就會慢慢淘汰，剩下小小人力去送一啲所謂「盲點」。有人認為呢一次係「第二次速遞革命」，邊個可以捱到最後邊個就勝利。

　　博客覺得美團可能贏個馬位，畢竟而家內地衣食住行方面美團APP都佔優，都係大數據年代，要打起呢場仗可能都有利小小。但京東本身自己網購平台，所以誰能笑到最後？真係好難講。

《編者按》本欄搜羅即市傳聞，惟消息未經證實，《經濟通》亦不保證內容之準確性。

【你點睇？】美伊技術磋商達成談判路線圖，你認為霍爾木茲海峽航運風險未來兩個月會否明顯下降？美伊雙方能否在60天內達成最終協議？► 立即投票