《小傳日記》近期電車「新」勢力小米（０１８１０）憑藉推出ＳＵ７型號，吸引咗市場目光。不過，小米股價喺上周三（３日）高見１７﹒３４銀後，即日以大陰燭跌到１６﹒２８銀收市，雖然仲維持一大半升幅，但個形態就唔靚仔喇，上周五跌至１５﹒０８銀，試穿條１０天線之後先回穩，踏入呢個星期就連升兩日，暫時未過到１６銀。從大啲嘅技術形態睇，１７銀係好大嘅技術阻力，暫時判斷上升空間唔多，觀望住先。　　反觀汽車新勢力之一嘅小鵬（０９８６８），舊年喺慕尼黑車展宣布，今年將會進入德國同法國等歐洲市場，而今年下半年就推出右軚車，為進入泰國、新加坡、馬來西亞同香港、澳門做好準備。　　當內地其他車企仲喺地上鬥快、為起步到加速至１００公里快嗰零點幾秒感到自豪時，小鵬已經離晒地，喺空中大鵬展翅，搶佔低空經濟市場。小鵬飛行汽車前年已經喺歐洲試飛。何小鵬話，新能源汽車行業嘅飛速發展，喺低空經濟領域實現跨行業應用。小鵬汽車嘅生態企業小鵬匯天，深耕低空飛行汽車領域近十年，率先推動低空飛行汽車商業化。集團期望運用汽車嘅規模供應鏈邏輯，推出百萬銀級別嘅飛行汽車，加速產業發展。　　望返小鵬股價，２０２２年１１月頭跌到２４﹒７５銀之後回升，個零月時間已經升超過一倍，破埋５０銀。本周一（８日）跌到２８銀之後連升第二日，尋日初現轉升訊號，今朝裂口高開，最多升７﹒５％，今朝高見３２﹒１銀，就算以呢個價買，以５０銀為目標，都有超過五成半升幅，博得過，跌到２７銀就止蝕啦。近年走勢就好似飛機已喺跑道滑行，準備起飛，仲要貪一個幾毫調整先買？可能等極都唔到！（ｐｃ）　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

etnet榮獲HKEX Awards 2023 「最佳表現證券數據供應商」大獎► 了解詳情