《開市Ｇｏｏｄ　Ｍｏｒｎｉｎｇ》孖屐觀望花旗國經濟數據，包括聯儲局視為重要通脹指標之一嘅核心個人消費支出物價指數（ＰＣＥ），普遍預期２月份ＰＣＥ按年升幅維持於２﹒８巴仙，而按月計，升幅就放緩至０﹒３巴仙，數據公布後，對聯儲局今年減息幅度及次數會有何影響？　　香江魚缸方面，季結日先跌後回升，不過最多升逾３００點後升幅收窄，指數繼續受制於１００天線（約１６５６６點），未有好消息利好下，今日升幅只係好友長假期前挾淡倉？魚缸反彈浪可延續至４月嗎？　　小米（０１８１０）汽車首款車型「Ｘｉａｏｍｉ　ＳＵ７」發布會將於今晚７點舉行，發布會前夕高收逾１％，創辦人雷軍早前已再次為價格「封頂」，提到目標係要做５０萬人仔以內、速度最快嘅量產車，價格等細節今晚就會公布，若新車型有驚喜，會唔會成為股價催化劑？喺新能源車行業內又會否掀起新一波熱潮？　　下周二（２日）《開市Ｇｏｏｄ　Ｍｏｒｎｉｎｇ》搵嚟輝立證券董事黃瑋傑，同大家分析上述股份及大市走勢！歡迎大家提問投資及其他股票問題。記得準時８：５５ａｍ，昅實《經濟通》ＮｅｗｓＴＶ直播節目－－《開市Ｇｏｏｄ　Ｍｏｒｎｉｎｇ》喇！或者ｃｌｉｃｋ入嚟ｈｔｔｐｓ：╱╱ｗｗｗ﹒ｙｏｕｔｕｂｅ﹒ｃｏｍ╱ｗａｔｃｈ？ｖ＝ＪＭｙＮＭＶＬｑｑＩｃ　打個卡先又得！

【免費講座】陸叔《2024 投資心法·養生之道》講座► ►火速報名