內地三大科網巨頭，京東(09618)、阿里巴巴(09988)、美團(03690)，由線下鬥到線上，呢次又鬥返落線下，之前個戰場就係外賣平台收晒兵，而家又有新戰場：硬折扣超市。

　　去年下半年，內地突然多左好多「折扣超市」，其中包括京東折扣超市、美團「快樂猴」、阿里旗下盒馬鮮生又推出一個子品牌叫「超盒算」，同埋好多零食鋪，都紛紛加入硬折扣市場。

　　咩係「硬折扣」呢？折扣有分軟硬，所謂「軟折扣」，即係個種就快到期、或者保鮮日期唔長嘅食品要減價，又甚或是大節日要做減價促銷，都係短時間內折扣，統稱「軟折扣」；而「硬折扣」，就即係我堆貨就係賣咁平，正正常常賣，唔係臨期食品，永遠都咁平。

　　點解無拉拉又咁快打開新戰場呢？主因都係之前國家講過「嚴打內捲」，外賣市場已經無得再點打落去；剛好內地經濟出現逆風，經濟又唔多好，商家聞到味，廉價市場的味。其實外國都有好多呢種「硬折扣超市」，香港佳寶都算係呢種商業模式，而2025年內地硬折扣市場滲透率只有8%，對比起德國有40幾%、法國都有兩成幾，中國呢一片市場確實仍未開發。

　　商品價格平，係咪無錢賺？咁又唔係，因為平，所以要走量，走量就需要有「高複購率」，佳寶賣嘅柴米油鹽都平過其他超市，呢一堆都係日常消耗，只要KEEP到質量、價錢夠平，薄利都可以多銷；加上呢種硬折扣超市，都有自己「自家產品」，好似惠康旗下有「優之選」，平過同類產品一兩成，其實個堆產品都係OEM貼牌，唔使真係自己開廠，但因為係自家產品、省卻中間商，所以價錢又可以再平小小。

　　咁呢次戰場又係邊到打呢？據了解，三大科網巨頭都集中係內地三、四線城市布局，目前內地三四線城市有大約七億人口，佢地收入增長都好快；同時呢一種「一線城市設計」嘅規模超市，係三四線城市唔常見，佢地多數係鋪仔買量油雜貨。所以如果將大城市、大超市嘅運作模式，但賣嘅價錢係三四線城市，甚至更平，順便頂死埋其他細鋪仔。

　　你幻想一下，一個三四線城市嘅阿媽，接完個仔放學，以前要去街市濕濕滴滴咁去買菜買肉，而家就可以吹住冷氣、推住車仔買，買得多仲可以幫你用物流送返屋企，而且價錢同以前去街市一樣，甚至更平，更衛生乾淨。

　　你係消費者，你會點選擇？

《編者按》本欄搜羅即市傳聞，惟消息未經證實，《經濟通》亦不保證內容之準確性。

【你點睇？】美國擬向歐洲八國加徵關稅，直至成功購買格陵蘭，歐洲領袖表明不可接受。你認為美國此舉會否導致美歐關係破裂？ ► 立即投票