《開市Ｇｏｏｄ　Ｍｏｒｎｉｎｇ》香江魚缸於期結日表現強差人意，日內最多跌２６３點，低見１６３５４點，２０及１００天線齊告失守！最終收跌２２５點，收報１６３９２點，成交１１５６億銀。魚缸正值業績期，明明期望可以升靠業績帶動大市重拾上升動力，點知多份重磅業績都交唔到貨，甚至差過孖屐預期，嚇窒魚缸連１６５００點水平都企唔穩。除咗過去盤數唔靚，最弊係前景展望睇得悲，又會唔會係對香江營商前景嘅一大警號？對魚缸嘅拖累唔只係一時三刻嘅事？短線睇季結都未必會有粉飾櫥窗活動？嚟緊魚缸放復活節假，神州孖屐就無份「復活」，期間有咩值得投資者留意嘅數據或事項？　　比亞迪系上日（２６日）已放榜，但比亞迪（０１２１１）同比亞迪電子（００２８５）績後股價走勢不一，原因何在？新能源車行業競爭激烈，比亞迪身為龍頭都要將主要車型減價應戰，集團嘅本錢仲可以燒幾耐？即使維持到市佔率，被擠壓嘅毛利率又有咁易追得返嗎？比電業績中提到團銷售規模大幅增長，再創歷史新高，今年仲有無條件維持高增長？　　至於內銀股當中亦有中國銀行（０３９８８）、建設銀行（００９３９）、農業銀行（０１２８８）及郵儲銀行（０１６５８）聽日會派成績表。不過呢幾隻內銀股近期股價都有趨向橫行跡象，績前上升動力減弱究竟有咩啟示？大市偏弱下仲維持有橫行格局相對上已算係韌性較強？神州上年開始力谷信貸刺激經濟，令銀行風險加權資產（ＲＷＡ）上行，不過盈利升幅就跟唔上，意味著資本水平將有所下跌；國有大行要維持派息比率，難度有幾高？　　聽日（２８日）《開市Ｇｏｏｄ　Ｍｏｒｎｉｎｇ》搵嚟國農證券董事總經理林家亨，同大家分析上述股份、大市走勢，當然唔少得當日嘅焦點股！歡迎大家提問投資及其他股票問題。記得準時８：５５ａｍ，昅實《經濟通》ＮｅｗｓＴＶ直播節目－－《開市Ｇｏｏｄ　Ｍｏｒｎｉｎｇ》喇！或者ｃｌｉｃｋ入嚟ｈｔｔｐｓ：╱╱ｗｗｗ﹒ｙｏｕｔｕｂｅ﹒ｃｏｍ╱ｗａｔｃｈ？ｖ＝ＭＪＱＭｚｄｍ０ｏＨｋ打個卡先又得！

【你點睇】五一黃金周逾75萬人訪港，不少遊客到「打卡位」體驗香港文化，你認為當局應如何推廣本港特色文化遊？► 立即投票