《魚缸博客》內地一年８日嘅農曆年假終於完結，打工仔紛紛從家鄉，或從旅遊目的地返番去工作地點。今日Ａ股紅盤高開，港股呢邊因為上個禮拜連升三日，今日略有回吐，無得同Ａ股齊齊升。　　美團（０３６９０）上周發布２０２４年春節消費洞察顯示，內地農曆新年假期，每天平均生活服務消費按年增長３６％，較２０１９年疫情前多１﹒５５倍。其中，北京日均消費規模比２０１９年同期增長１１３％，消費規模位居全國城市第一。四線以下城市消費增長較快，成為假日經濟嘅新引擎。另外，平台數據顯示，農曆新年假期頭五日，全國多人堂食套餐訂單量按年增長１﹒６１倍，異地消費者貢獻訂單增長１﹒８６倍。其中，上海堂食消費最旺，訂單增長近１﹒５倍。　　一連串嘅數字顯示「春節經濟」復甦速度強勁，不過，記住講緊嘅係農曆年咋。中國人一向重視春節，視為團圓嘅象徵，一家人食得好，玩得好無可厚非。但時移世易，而家過年除咗團圓之外，仲多咗層意義，就係顯示自己嘅「食力」，返鄉下要衣錦還鄉，比鄉親父老睇到自己喺出邊撈得有幾掂；出外過年都要比親友係網上睇到自己使得有幾豪。所以，農曆年假嘅消費高一啲都唔意外。　　而家放完長假疊埋心水返工，高消費模式點都會改變。過節時「多人堂食」好大機會變成「單人外送」或「多人外送」。畢竟豪使過後，生活都要回歸「平淡」。就算唔使捱飯盒，估計點都無春節食得咁豪。美團以送餐服務起家，股價本月初低見６１﹒１０元嘅疫後新低後，開始回穩，有望進一步上升。現價值博率高，不妨小注短炒。（ｖｓ）　《編者按》本欄搜羅即市傳聞，惟消息未經證實，《經濟通》亦不保證內容之準確性。

【你點睇】的士業「放蛇」舉報Uber，政府應否將網約車合法化？你是否支持該類自行「放蛇」行為？► 立即投票