泡泡瑪特(09992)出業績之後，博客都無咩做短評，因為真係無咩好評；只要你係官方門店想買LABUBU，一律都係話「無貨」，因為堆貨都係晒炒家身上，你想用正價買到LABUBU咩？SORRY，淘寶官方都要俾高小小價先有貨。

　　其實而家POP MART門店都無乜嘢買到落手，博客見到都係CROSSOVER產品多，有天線得得B、MOLLY之類，但就係無LABUBU相關產品，不論深圳店定香港店都一樣情況，POP MART可以帶動商場人流，不過博客眼見就真係好似行嘅人多，買嘅人少。

　　呢種「飢餓式行銷」，博客係早幾年SONY出售PS5時候見過一次，大家引頸以待，餓左大家好耐，餓下餓下，大家突然唔餓了。所以2024年同2025年PS5銷售，係出現左下滑情況，到PS5一街都係貨個陣，大家已經轉去買XBOX或者出部PC了，PS5風光無PS2咁瘋狂。

　　博客覺得LABUBU都係呢個情況，顧客係可以餓，但如果「餓過饑」，同時市場又有替代品，市場風向就會好快轉，到時你出幾多貨都無用，正所謂「剎那的光輝不代表永恆」可能就係咁解。

　　其實呢種靠出售IP/遊戲服務/品牌嘅商品都係大同小異，你有爆款，最多搵幾年錢，但你又無咩新款替代，顧客就會流失，然後慢慢股價就會回吐。早幾年騰訊(00700)唔係王者榮耀就食雞，而家講都無人講；20幾年前人人都炒Esprit，軟硬都幾乎係「代言人」，而家呢？思捷環球(00330)都係得返3毫子股價。

　　潮流嘅嘢，真係話消失就消失啦。

《編者按》本欄搜羅即市傳聞，惟消息未經證實，《經濟通》亦不保證內容之準確性。

【你點睇？】香港超越瑞士成為全球最大跨境財富管理中心，你認為最主要原因是？你認為本港未來能否長期維持該領先地位？ ► 立即投票