買二手手袋送女友，有面子又不用破費？
#Love Philosophy #兩性關係 #禮物 #二手手袋 #Gucci #名牌步入12月，一連串的節日，又要物色禮物了，左揀右揀，送禮要有面子又不破費？
他拿出手機給我看，網站上的一個Gucci 手袋，幾吸引呢。
「呢個袋款正啊，應該要過萬？」身為袋癡的我雙眼發光。
「係呀，我打算買畀女朋友。」他笑著說。
Classic袋款很好襯，且慢...我沒看錯，這可是二手的！
「你唔係買呢個嘛？二手喎。」
「有咩所謂，95%new，睇唔出嘅。」他笑著拿開電話。
他對錢銀計較不是今天的事，只是連買禮物給女友都要省，讓人五體投地了。
「二手袋做禮物好怪喎。」我照直說。
「佢收到名牌一定好開心，但我唔想洗咁多錢嘛，佢唔知係二手嘅。」
原價近萬元的包，收到誰都會高興吧，想著對方如此重視節日，一擲千金把自己寵上天，遇上世紀好男人了...前題是如果不知這是份二手禮物。洋洋得意的他樂於鍚住銀包，買個二手貨充數，不講誰會知，我佩服他的坦白。
「個袋開價$8000 ，我還價$3000咋，我好老實同賣家講買嚟送禮，無咁多budget，哈哈。」
「嘩，買二手仲大殺價！」讓我驚訝的事不只一。
「講下價平好多，佢睇到個牌子，以為好貴就得啦。」
慳錢買個二手包，還跟賣家直認不諱是送禮要大幅殺價，我著實無言，難道沒有最cheap只有更cheap？！
他女友收到這禮物當刻滿不滿意，我不敢猜了，有原裝包裝，可能未會察覺是舊物，但知道糟糕的真相會反枱嗎？他是故意隱瞞，再裝模作樣，唉，甚麼名牌禮物，別開心得太早，不過是別人用過再重新包起來的偽新品。好啦，真相不揭破就能繼續下去，男的送得有面，女又收得開心，完美的結局啦。
禮物預算少，平有平送，貴有貴買，何必充大頭，表面出手闊綽，實情是買個二手名牌袋還大殺價，難看極了。送份禮物，連最計較、最寒酸的一面都擺出來，不如不送啦。負擔得起才買，不用裝的，好嗎？！