職場

　　今年受影響的生肖特別有魅力，可謂俊彩星馳，本來就閃耀亮麗，所以其悲與喜也特別矚目，會有許多Drama。

　　首先列出可能有麻煩的生肖：

　　一.酉（雞）刑太歲

　　二.卯（兔）沖太歲

　　三.午（馬）害太歲

　　四.子（鼠）破太歲

　　屬雞的人心水特別清，洞察力強。通常愛扮靚，對自己的皮膚、裝扮、形象都特別花時間心思，所以可謂身光頸靚、執得好正。而且自信心強，喜歡思考、探索、嘗新。但弱點是太過自信，有時傾向挑剔，又其強項之一是爭論，故有鐵咀雞之稱。今年凶星有劍鋒、伏屍、三刑，最劣的情況指有血光之災、白事及官司。幸好有文昌、玉堂、將星、歲駕等吉星護航，今年會有才氣、聲譽、權力等，所以唔駛太擔心。

　　兔同雞最唔夾，今年一齊落鑊。兔仔喺2017，為免得個吉，凡事要小心，因有歲破、大耗、災煞，攔干等凶星，代表謀事可能節外生枝，賭博投機更是危險，無謂太勇。建議可破一點歡喜財，例如請人吃飯、送禮、請至愛去旅行，又或捐錢做善事，替需要幫助的人付醫藥費、手術費等，皆可應了「大耗」破財，而又不至「災煞」傷身，兔仔至少都月行一善啦。

　　馬仔亦有四粒凶星：披麻、卷舌、咸池，桃花，即分別有白事、是非、桃花劫等。幸亦有四顆吉星：紅鸞、天德、福星，祿勳，即人逢喜事，亦有貴人相助，即在公在私、事業感情，皆有如意進展。

　　老鼠雖有貫索勾神等聽落好得人驚嘅凶星，代表多是非、亦可能有官非。所以今年見到交通警抄牌，就要四萬咁口，因為會係應咗呢D凶兆，要多謝佢。流年有太陰、天喜照住，埋年計數，喜事多過煩事，逢凶化吉。

　　以上生肖的朋友，可能仍然唔放心，其實每個人嘅八字都有八個字，現在係「郁」你一個字，所以唔駛先自己嚇自己，下期談保險救應，兼論其餘生肖，包括春風得意嘅牛虎龍蛇。

　　上期談及雞兔鼠馬在雞年會被波及，化解的方法如下:

　　(一)在雞年有沖尅刑害的生肖，在該年多有變動，所以如果本來已計劃搬寫字樓、遷居……等久而未決，可在雞年付諸實行。又頻繁出門，或在港左騰右騰開會視察、構建人脈等，都可以應了勞累頻撲之數。還有另一有趣應法:一位俊男因太重感情，讓其不愉快婚姻拖了六年，本月向我透露今年要離婚了，長痛不如短痛，他好快便可以復活成筍盤，應得好!

　　(二)可戴豬的飾物，當然，攬住隻生豬(肖豬者)更好，如果冇豬朋豬親，可以配戴豬的飾物，豬為亥水，雞為酉金，酉金生亥水便沖了金的銳氣，減低雞年的傷害。

　　(三)做善事、主動破財(見上期破歡喜財的提示)。

　　雞兔鼠馬會被「移動」，被啟動的生肖則有牛虎龍蛇。

　　老虎舊年真係虎落平陽，不祇身體出問題，事業、家庭、朋輩間亦多麻煩，就算唔關佢事，佢都一樣領嘢。老虎霉咗咁耐，今年可以曬吓太陽，睇吓風景咧。雖有死符(白事)、小秏(破財)、劫煞(扒手小偷光顧)等凶星，但喜有吉星「月德」扶持，又掌「國印」，即有勁秋猛人射住，一於冇有怕。財運亨通，記得賺到錢就去捐吓啦，應咗「小秏」，小財出咗，大災不來。

　　牛、蛇、龍亦行運。

　　牛仔在三台、天解、黃蓋、唐符等吉星幫助之下，有達官貴人助力，縱有麻煩亦迎刃而解，全年大致順利，惟要提防破財、官非，亦可能有親人離世。

　　條蛇今年有天廚星而得食，唔駛俾人做美食，一於歎番夠本。不過今年要小心自己前後左右，一來易被人背後插幾嘢，亦有可能被人明搶金錢，或暗搶功勞。除此之外，今年是可喜的一年，會有一翻新氣象。

　　條龍今年遇上紫微龍德，真個助力非凡、龍顏大悅。惟有暴敗、天厄、天煞等惡勢力，因此切勿驕矜，以防被天災或突發事件等殺個措手不及，但祇要耐心細心，肯定有景。今年總體會心曠神怡，必有所得。

　　羊仔今年普普通通，有時有D孤獨感，可能有親人拜拜。

　　馬騮仔舊年已有衝擊，今年仍要低調，提防染病、受騙，避免去白事場所。

　　豬仔有地解、天乙吉星，自有貴人解困，旅行公幹亦順遂。惟略感孤單。

　　狗仔有太陽之光照住，冇大礙，惟要留意交通事故、及被人誣陷或唱通街。

　　無論你是甚麼生肖，看到有吉星，就先擁抱喜氣、預支歡樂；看到有凶星，就警惕自己凡事小心，輸少當贏，又要注意行善助人，增加自己福氣的籌碼，墊厚個氣墊Cushion，就算有大山擋前，自然見山過山、見關過關。