世事政情

　　河國榮（Gregory Charles Rivers）疑不堪喪妻之痛，2月2日在家中燒炭自殺離世，終年58歲。河國榮生前的好友喬寶寶和布偉傑都大感痛心。河國榮是澳洲人，因熱愛廣東歌及香港文化，原本是澳洲讀醫的醫科生決定隻身由澳洲來港生活，結婚後落地生根。他中文名的由來全因很喜歡張國榮，由於他姓Rivers，所以在大學同學鼓勵下改名叫「河國榮」。河國榮曾接受《晴報》專訪時表示：「1985年張國榮喺雪梨開演唱會，有張國榮、梅艷芳、草蜢仔、呂方，舉辦機構要搵人做司機，不過冇人工，我朋友通知我，問我有沒有興趣，『Yeah！我要做！』咁我就做咗張國榮嘅司機；1986年譚詠麟亦喺雪梨開演唱會，公司又搵我做司機，我就做咗譚詠麟嘅司機，介紹我嘅時候，『呢個係你司機，河詠麟！』差不多兩年，好多人以為我叫河詠麟。」

　　近十年來，河國榮百病纏身，除咗受抑鬱症同胃酸倒流等病折磨外，2017年又患上基底細胞癌，其後又因心律不正先後做了2次手術，屋漏兼逢夜雨，佢收養多年嘅老犬又患上骨癌，為咗照料愛犬同籌集藥費，欠下朋友加卡數逾80萬。幸好，後來獲廣告商邀請以重酬拍攝廣告度過難關。

　　2022年疫情期間，河國榮高調表態拒絕打疫苗，在FB分享自己最後堂食，都不忘去茶餐廳食西多士，夠晒地道。他留言:「打針最終嘅後果不堪設想。我揀自由。我揀健康。二月尾後唔可以再享受堂食。that’s ok。而家享受多啲先。」其中有人問到河國榮點解唔離開香港，佢就講咗一個令人感動嘅答案：「有香港人。」視自己為「香港仔」嘅河國榮曾接受訪問，指自己仍經常為香港發夢：「 我有諗過如果有日中六合彩，可以攞錢畀美國一間我好欣賞嘅語言公司，叫佢設計一個廣東話課程，保留廣東話傳統。」網友對他的離世大感可惜，除了感謝他演出的角色成為香港人集體回憶的一部分外，更感激他比香港人更愛香港。

　　河國榮口中常常提到「我哋香港」，他的確心繫香港，這個「香港仔」坦言很喜歡這個地方，從來沒有打算離開，他在《晴報》專訪時都提到：「香港係有好多嘢變，建築變、環境變、巴士都變啦，我記得初初嚟香港，巴士係可以開窗，冇冷氣，幾正吖，而家開唔到窗喇，但香港係有一樣嘢唔會變，係香港人，好似喺獅子山下，大家面對嘅困難，大家要堅持落去，我哋香港人好勁㗎嘛，呢啲嘢小事嘅啫，我哋行吓、勤力吓，一路堅持落去，一定解決到嘅，一定有明天嘅！」

防止自殺求助熱線

香港撒瑪利亞防止自殺會： 2389 2222
生命熱線： 2382 0000
明愛向晴軒： 18288
社會福利署： 2343 2255
撒瑪利亞會熱線（多種語言）： 2896 0000
東華三院芷若園： 18281
醫管局精神健康專線： 2466 7350
利民會： 3512 2626
賽馬會青少年情緒健康網上支援平台「Open 噏」：http://www.openup.hk

　　【晴報專訊】來自澳洲的河國榮1987年來港發展至今，說得一口流利廣東話。他口中常常提到「我哋香港」，的確這位「香港仔」心繫香港，疫情下人人喊苦，更掀起移民潮，他卻從沒打算離開。「香港係有好多嘢變，建築變、環境變…但係有一樣嘢唔會變，就係香港人，好似喺獅子山下咁，大家面對困難要堅持落去，我哋香港人好勁㗎嘛！」

熱愛香港文化的河國榮，超愛喝港式奶茶。（FB圖片）

年輕時的河國榮靚仔有型，更大曬一身肌肉。（FB圖片）

　　河國榮是香港觀眾最熟悉的影視「御用鬼佬」，來自澳洲昆士蘭的他原名Gregory Charles Rivers，說到中文名的由來，全因他與香港的不解緣份。河國榮1984年在澳洲大學讀醫科，當時大學宿舍住了很多香港留學生，令他有機會接觸廣東歌，不但一聽愛上，更依大學同學建議，以「河（Rivers）」為姓，改了跟偶像張國榮一樣的中文名字。他笑談對廣東歌的愛，「各花入各眼，各音樂入各耳仔，當時澳洲好流行重金屬音樂，但我鍾意聽溫和嘅音樂。我覺得廣東歌非常啱我，80年代啲歌真係好好聽。」

曾任張國榮譚詠麟司機

86年譚詠麟（右）在澳洲開騷，綵排時邀請當時任司機的河國榮上台合唱。（FB圖片）

　　不止廣東歌，河國榮跟80年代巨星張國榮和譚詠麟亦很有緣，「1985年張國榮嚟雪梨開演唱會，有張國榮、梅艷芳、草蜢、呂方。主辦機構要搵人做司機，但係無人工；朋友問我有沒有興趣，我心諗『Yeah！我要做！』咁我就做咗張國榮嘅司機。1986年譚詠麟亦喺雪梨開演唱會，公司又搵我，於是我又做咗譚詠麟嘅司機，其他人介紹我時話『呢個係你司機，河詠麟！』搞到好多人以為我叫河詠麟。」

　　全因對香港的熱愛，河國榮87年拿着一張單程機票及5,000港元，膽粗粗來港追夢，他更下定決心，無論有甚麼困難，都不會回澳洲。「呢啲都係緣份，當時讀醫三年幾，除咗讀書，其他時間都同香港朋友一齊。佢哋有香港學生會，每年搞運動會、游泳比賽、扒龍舟、舞會等，我都去幫手，變咗讀書以外嘅生活都同香港有關。到第三年考試『肥佬』要重讀，重讀時遇到張國榮同譚詠麟，我就決定唔讀醫，要去香港發展。」

「鬼佬」身份演戲受限

河國榮第一部參演的劇集《大茶園》。（網上截圖）

　　來港第二年，河國榮得知無綫要找「鬼佬」演員，便抱住一試心態去面試。「當時無綫拍《大茶園》，有兩個鬼佬角色，一個係關朝聰演，另一個就要搵人做，朋友叫我試下，於是去咗見珍姐（無綫高層曾勵珍）。珍姐畀咗英文劇本我，叫我做畀佢睇，我當時好緊張，唔出聲幾分鐘，但唔試過又唔知得唔得；劇本係講警察上司好大聲咁鬧人，咁我咪好大聲讀出嚟，點知嚇親珍姐！結果佢搵唔到第二個演，於是好無奈咁搵我拍咗《大茶園》同《太平天國》。」

最近河國榮在《飛虎3壯志英雄》演反派。

　　河國榮在無綫拍戲20年，至08年才約滿離巢，多年來演過不少角色，包括傳教士、警司、領事、法官等。不過，他坦言曾因角色受局限而不開心。「鬼佬都有佢嘅生活，如果編劇有心的話，可以將一個普通鬼佬角色寫埋落去，不過無人咁做，所以我就加啲感覺、語氣落去，表達方式唔同啲。我喺TVB 20年，我對自己都有要求，就算做100次警察，我都希望每一次係唔同嘅；演反派有好處，一開始大家未必知道係衰人，所以會有變化，反而有得發揮。」

河國榮去年開始研究在家有機種植。（FB圖片）

　　居港35年，拍戲以外，河國榮去年開始嘗試有機種植，買了80包種子，包括生菜、番茄、青瓜、荷蘭豆、南瓜、薯仔等。「前排我開始起菜園，然後溝泥，上兩個星期開始落種子，要等幾星期先知會唔會成功。」面對香港社會多番變遷及疫情，河國榮愛香港的心依然未變。「香港係有好多嘢變，建築變、環境變、巴士都變啦，我記得初初嚟香港，搭巴士可以開窗，無冷氣，幾正吖！但香港有一樣嘢唔會變，就係香港人，好似喺獅子山下咁，大家面對困難要堅持落去，我哋香港人好勁㗎嘛！呢啲小事嚟啫，我哋行下、勤力下，一路堅持落去，一定解決到，一定有明天嘅！」