世事政情

　　周潤發發哥一向都係大家集郵對象，發哥來者不拒，好多時更會用fans嘅手機揸機自拍。不過相片就留咗喺fans手機入面，之後點處理同影成點發哥都冇say，日前黃日華囡囡黃芷晴再次搵發哥合照，不過post出嚟嘅時候就一啲都唔似發哥，但就仍然係靚仔一名！

　　黃芷晴先係Post出同三哥苗僑偉嘅合照，之後再post出同發哥合照，相中見到黃芷晴矮發哥一個頭，輕輕側向發哥倚傍喺佢胸前，芷晴仲笑得好含蓄，留言:「我暈了。」不過呢張相就似乎filter或者P圖太重手，發哥面上猜皺紋，只係有少少魚尾紋，睇落仲有少少似劉德華添！

正常嘅發哥。

　　之後黃芷晴喺佢嘅IG STORY出POST影自己整雞蛋仔，疑似透露自己依家冇嘢做，留言：「我好似唔使失業了。」黃芷晴由幕前轉戰幕後由低做起，主要為藝人安排服飾造型，早前佢又參與咗「聲夢小花」姚焯菲（Chantel）新歌、MC（張天賦）的《Overkill》等10多部MV，佢負責襯衫、燙衫及搬運服裝，間中都會畀意見。黃芷晴接受傳媒訪問時，表示喜歡呢項工作，比以往的工作亦壓力大減，故完全不覺辛苦，自己都多咗私人生活空間。而爸爸黃日華都好支持，為對方擔任造型師放手「任她舞」，而爸爸都有為佢介紹「客仔」。

　　黃芷晴於2012年出道，曾簽約香港電視（HKTV）成為旗下藝人，拍過《我阿媽係黑玫瑰》及《開腦儆探》等劇集之餘，早年亦獲金牌監製鄧特希睇中，為內地劇《只有情永在》首次擔任女主角，惟近年她已甚少幕前演出，近年轉做幕後工作。

　　近年幾乎喺英國長居嘅黃偉文（Wyman），係時裝騷嘅常客，除咗英國本地之外，仲會不時歐洲四圍飛到各個時裝展朝聖。20日，Wyman於社交平台Post出自己出席BURBERRY 2024秋冬時裝展嘅新相，透露發生咗小意外，令呢張相片幾乎變成遺照。

成日睇時裝展。

　　Wyman寫道：「昨晚發生了點小意外，這張幾乎變了遺照。（但都唔想為大家帶來麻煩，所以堅持下去，並且睇了場好好睇的 show )現在回家休息和觀察，如果未來一兩天沒有暈眩和作嘔或者其他異樣⋯⋯會做更多善事和買彩票。」

　　熱愛Fashion又貪靚嘅Wyman，發生意外後強裝鎮定，繼續好似冇事發生咁睇騷：「之後仲識爬返起身等開場一邊頭痛一邊覆whatsapp同香港嗰邊傾歌詞點寫，睇show時仲識同旁邊嘅人有講有笑，而家仲識發ig，希望係好兆頭，更希望唔會嚇親喺現場見到嘅朋友，所以大家唔使擔心住，如果唔係就真係死在天橋底，啋啋啋！」

　　雖然由頭到尾Wyman都冇講到實質發生咩事，不過似乎事態嚴重、性命悠關，唔少網民同藝人都留言慰問，叫Wyman保重；亦有人勸佢去醫院做檢查，唔好因為當刻冇事就疏忽咗。其實一日前Wyman都已經有出關於呢個時裝展嘅post，當時內容都好正常，似乎未生意外，佢post前十年前後對比相，留言：「給10年後的我。前後10年，再次在倫敦參加 Burberry 的活動和時裝表演，不過，以前坐飛機來，今日搭地鐵去！設計師換了三位，各擅勝場。賓客仍然同一個，忠誠如一。」