世事政情

　　36歲的古淖文事隔15年再次參與歌唱比賽，今次在《中年好聲音2》中，觀眾見證著他由評判口中負評如潮的參賽者，到慢慢成為大家喜歡的「巨星」，一步一腳印以不斷改進來為自己說話。浮沉娛樂圈十多年，古淖文從沒想過放棄，喜歡唱歌這份的單純成為他堅持下去的動力。

　　古淖文自從15年前參加《亞洲星光大道》而為人所認識，當年的他得到第五名，然後就沒有太多的然後，出過兩張專輯，但留給大家的印象反而是他主持不同的澳門大型活動。今次《中年好聲音2》雖然是大家熟悉的面孔，不過起初仍然因「江湖味」而備受負評，慢慢一步一步走到決賽，最終票選人氣三甲，更贏得冠軍。他說：「今屆《中年好聲音2》位位都好有實力，能夠得到冠軍，我真係出盡九牛二虎之力，同參賽者之間係良性競爭，互相畀意見，甚至幫大家揀歌，呢個感覺同精神好好。（成日被嘲肥媽契仔得高分？）我都唔係好高分喎，點高得過安雅希？正常一定會被人提及，我同肥媽好多年合作，由《星光》開始就帶我登台，冇需要隱瞞，打關鍵字一定搵到，與其特登去隱藏或刪Po咪仲衰，做人要飲水思源，肥媽幫我好多。所以，我喺比賽好努力就係想話畀大家知，我係有實力嘅。」

　　古淖文深明比賽初期被指「騷Quali」，評判們都不太喜歡他的演繹，直至演繹《盼望的緣份》一曲，經導師谷婭溦的調較，慢慢令觀眾改觀，感受到他的真摯。「我起初好怕再唱陳百強，因為《摘星》瀨晒嘢，但經谷婭溦調較之後，居然大家好接受，估唔到古淖文呢個江湖友變得好真誠，當晚睇到好多網友都話感動到喊，就係呢一場令大家睇到不一樣的古淖文，慢慢累積支持者直到決賽。」

　　古淖文笑認後生時年少氣盛，感覺自己混血兒的靚仔外表就入行闖天下，最終入行15年在娛樂圈浮浮沉沉，會否曾經灰心過？他說：「有失望，因為覺得自己都算幾努力，點解冇乜人提、冇乜人睇呢？我惟有同自己講，冇人睇唔緊要，將來會有，哪怕只得一個觀眾拍手，我都會努力演出。咁多年來我冇諗過走，死就死啦繼續行，因為我只係得一個技能，就係識唱歌，間中做主持，你叫我打寫字樓工、政府工嗰啲真係搞唔掂，做老闆又冇錢唔夠資格。慶幸咁多年雖然半紅不黑，但做到自己最鍾意嘅事已經好幸運。」

　　古淖文得獎後回家，給予媽媽一個擁抱，他笑言雖然是外國人血統，但沒有太肉麻的情節，他感激父母一直以來全力支持他追夢，「爸爸做警察，媽媽係公務員，屬於小康之家，可能得我一個獨仔，媽媽見我去娛樂圈意已決，就畀我闖到而家。雖然搵錢唔多，但間中我都有畀家用，父母好明白，慢慢先再孝敬佢哋。」十多年努力磨劍過程絕對不容易，古淖文認自己的事業欠缺運氣，「坦白講，如果十幾年前《星光》得到冠軍，我一定囂到阿媽都唔認得，可能上天覺得我到而家呢個年紀真係ready就畀我。得到冠軍係開心，但同時我學識謙卑，決賽第二日返工，大家都恭喜我，但我都係答：『琴日係冠軍，今日係你同事，多多指教！』冠軍只係新一章開始，未來路更加長，唔想辜負呢八個月嘅努力。希望將來有自己嘅歌同演唱會，發展隨遇而安，個人冇太多顧慮就會開心啲！」

　　由獎門人曾志偉率領歷屆獎老大晒冷，包括：錢嘉樂、林曉峰、阮兆祥、金剛、麥美恩、林秀怡和林正峰主持的《獎門人感謝祭終極篇》12日播出。齊集了《中年好聲音2》和《福祿福祿壽訓練學院》等藝人去玩。最後一集大家都玩得特別癲，就算女藝人都完全不錫身演出，埋身肉搏都有不少遇「色」魔。麥美恩向譚輝智飛擒大咬、而平時反應呆滯的郭珮文遇「鹹豬手」，她都惟有傻笑遮醜。

　　最後一集嘉賓陣容鼎盛，有「獎門人身體健康」隊的苗僑偉、葉子楣、謝天華、黃翠如、陳山聰、洪天明、朱晨麗和梁競徽、「中年好聲音 2」隊的古淖文、譚輝智、 顏米羔、陳俞霏、林若盈、陳蒨葶和王玥，以及「福祿壽訓練學院」隊的王祖藍、李思捷、陳懿德、郭珮文、林妍、陶大衛、彭建豪、趙頌宜、伍韻婷、林樂熙、莫家淦、黃建東等。

　　這集都有不少「色」魔出現，在「玩啜乒乓」遊戲，久未在電視熒幕出現的葉子楣啜得忘形，而且伸晒脷去啜波。在1Vs1 對決，以體育堂PE衫亮相的郭珮文上場，一眾男嘉賓即踴躍爭住出戰，三哥苗僑偉搞笑地說：「呢啲梗係等隊長嚟啦！」相反輪到陳懿德上場時，大家卻 一面嫌棄。到葉子楣姐上陣時，與她對啜的王祖藍開心搞笑謂：「子楣姐，我等咗 40 幾年呀，就係等呢一刻！」

　　之後曾志偉點名由麥美恩與譚輝智1Vs1 對決，一開始麥美恩已飛擒大咬撲向對方，連男人都被他的主動嚇怕，譚輝智嚇得後退。麥美恩知道譚輝智頭號大粉絲狄波拉在場，麥美恩不斷向拉姑道歉，更一度邀請前輩上台一起玩，但拉姑保持儀態不斷耍手拒絕。

　　在「爭櫈仔」環節，藝人們都有不少埋身碰撞，一開始已經大混戰，40多人爭10張櫈。隨後一個回合，越玩越少人，梁競徽、陳俞霏、陳蒨葶和郭珮文等人一起玩。音樂停止下來時，陳蒨葶一早被彈開，梁競徽雙手搶櫈，使出「四両撥千斤」用力撥走郭珮文時，正好觸及郭珮文胸部。她來不及反應，只是尷尬坐在地上傻笑，但本能反應，立即隻手放於胸前，而玩得投入的梁競徽，就算有感覺都仍然「show must go on」，堅持撥走所有女士坐在櫈上。

　　最後，節目尾聲麥美恩完美上演了「小心地滑」，她在「開心無敵開口中」環節內，穿上高踭鞋的她，於佈滿了忌廉上多次被跣，第一次她還能勉強支撐身體站得穩。但相隔不久再次跌倒，狼狽地跌在地上，連站在前方的金剛都被無辜連累。

　　節目笑中有淚，來到本季最後一集，獎門人與一眾獎老齊齊分享感受，獎門人說：「呢 29 年 好多謝大家一直支持我哋。」感性的麥美恩爆喊，感謝曾志偉讓她有參加拍攝這個節目的機會，曾為獎老之一的祖藍亦感性地感激獎門人：「勾起咗好多回憶，記得當初我嚟到《獎門 人》時，我係完全唔識講嘢，獎門人當時係特登度咗形體題畀我，畀我一步一步 進入呢個節目，好多謝獎門人。」