世事政情

　　上星期本欄寫咗建制派喺新選舉制度之下正在各懷鬼胎，從今個星期嘅新聞，已經見到啲「鬼胎」急不及待咁湧晒出來，好似工聯會嘅吳秋北就公開「鬥地主」，搞到地產界立法會議員石禮謙都要公開批評吳咁搞法只係「文革」。預計呢個建制派內鬥嘅局面，會喺人大完成審議新選舉方式之後，一路加劇去到新一屆立法會舉行之前。

　　不過今次想將立法會爭櫈仔嘅情況放埋一邊，講一講今次改制之中，可能係擁有「最無上權力」嘅資格審查委員會。

　　資格審查委員會，簡單咁講就係一個發牌機構，取代過往選舉主任嘅角色，為所有有意參選嘅候選人「發牌」；只要合符既定嘅條件(最主要就係認定你係愛國者)，咁候選人就獲得「發牌」，有資格參選立法會選舉，而除咗立法會之外，特首選舉同埋選委會嘅委員選舉，亦都要由資格審查委員會統一發牌。而有評論員就引述消息指出，資格審查委員會點樣組成，人大審議極可能會留白，交由本地立法處理。

　　組成方式方面，有建制派同Tina坦言，成個架構都係由人大去決定，再加上資格審查委員會係將會處理特首選舉，理論上都無可能由特首委任(特首始終有機會連任)，所以最有可能嘅做法，就係由特首揀好人再由人大去委任。至於人數方面，有建制派講過不宜太多人，並提及「7」係一個理想數字，但係Tina就收到風，話人數方面應該唔會係單位數，因為之後要處理大量選委同立法會候選人，「個個參選嘅都係有親中背景，咁就梗係容易審查，但唔排除有一大班所謂『政治素人』參選，要審批唔係易事，未來工作量可能唔細」。

　　而據消息所講，能夠有資格坐呢個委員會嘅人，一定要有返咁上下份量，但同時佢地理論上亦不能參與任何選舉，所以要搵到合適人選，而數目又唔會太少的話，都唔係易事，估計年紀稍大，又已經從前線退咗落嚟嘅建制派政壇元老擔任，機會最大。

　　至於上訴機制，有消息就話呢個係令到政府最頭痕。普遍意見都認為，上訴係一個非常基本嘅權利，理論上點都可以畀人上訴，但上訴的話由邊個去處理？由法院的話，萬一出現上訴成功，咁資格審查委員會顏面何存？又如果唔係上訴去法院，而係上訴去人大(因為成個架構係人大決定)，似乎又可能令外間印象唔多好，亦無理由要人大插手呢啲行政事務。有建制派坦言，搞得好呢個上訴機制，先係成個資格審查委員會嘅重中之重！

　　如果問依家有咩嘢可以令到全香港市民槍口一致嘅，的士業可以話係唯一。自從有的士行家自行放蛇捉Uber司機之後，全香港市民(除咗的士從業員)都齊心聲討的士行業，將過往坐的士受過嘅冤屈氣都發晒出嚟。雖然的士業將會有重組，推出的士車隊，而的士業最近亦都搞禮貌活動，但都無阻政府全面檢討網約車規管嘅決心，似乎政府已經心裡有數，香港即將落實Uber合法化。

　　Tina最近同一位執法部門高層飯局，佢就直言，Uber今時今日喺夾縫之中生存，擺到明就係得到政府嘅首肯；Uber嘅業務肯定唔會係合法，以政府今時今日嘅行政主導，再加上警隊嘅雷厲風行，有心要打擊Uber的話，肯定佢地明日就連上線都上唔到。「點解政府唔郁手？最重要就係Uber解決到的士行業永遠都解決唔到嘅問題：唔會揀客、唔會拒載、唔會濫收車資，所有行程都有後台去監察，有咩問題都投訴有門。更重要嘅係， 政府依家係要『無處不旅遊』，全世界大部分嘅旅客都會有Uber App去叫車，Uber就正正係幫到政府解決呢個大難題，試問的士業又點會有條件去同政府講數？」

的士業最近推行禮貌活動，但無阻政府全面檢討網約車規管（資料圖片）

　　有立法會議員就坦言，Uber所代表嘅網約車行業喺全世界都已經證明咗畀的士更有效率，而內地更加係其中之一，「網約車喺內地成行成市，亦都見到網約車同的士係可以拼行，你好難同阿爺講點解香港就只可以有的士而無網約車」。不過呢位立法會議員亦都坦言，特區政府亦都有責任平衡各方利益，全面開放市場令到的士牌價大幅下跌亦都唔係政府願意見到，所以佢都私下建議，下一步開放網約車的話，亦都要將網約車同的士嘅功能劃分，「的士可能係繼續打大眾化市場，而網約車就可以定更高嘅價格，係畀啲捨得花更多錢買服務嘅人士，咁就各有各嘅市場，河水不犯井水。」

　　議員亦都向的士業界派定心丸，認為如果網約車合法化，網約車司機亦都要喺規管之下營業，咁就自然要交牌照費、更高嘅保險費等等，「佢地嘅經營成本亦都會大增，唔會好似依家咁，有車牌、有架車就可以做，所以估計只會有部分網約車司機會正式登記，某程度上亦都會令到客源流返去傳統的士業嗰邊，同依家比，應該係有利無害。」