世事政情

　　立法會仲審緊完善選舉制度嘅法例，有留意嘅讀者都見到，負責審嘅十幾位議員，對於法例都有唔少幾尖銳嘅問題，而政府某啲位都係有啲口啞啞，顯然見到一條咁重要、咁繁複嘅法例，喺咁短時間之內急就章要按人大嘅決定去訂立，肯定會亂到七彩，大家亦可以預期，嚟緊嘅選舉，亦一定會亂到七彩。

　　Tina聽聞，自從新選舉方式公布之後，各界別對於新玩法，特別係選舉委員會選舉，都係一大堆問號浮晒喺塊面。選委會選舉令建制派最大困擾嘅係加多咗一個第五界別，即係港區全國人大代表、港區全國政協委員同有關全國性團體香港成員嘅代表界，人大政協就佔190席位。

（資料圖片）

　　讀者都知道，做得人大政協嘅，好多都有幾重身份，變相佢地喺唔同界別都可以出選。但根據最新玩法，如果你係人大政協身份，又另外有其他身份有當然議席，咁就一定唔可以喺人大政協嗰面出任；最吊詭嘅係，如果人大政協，有另外嘅身份，而呢個身份唔係當然而要去選的話，咁人大政協就可以變咗做「食鬼」，將一啲可以選嘅議席食咗，直接坐上去唔使選，即係話個界別可以選嘅席位就會少咗。

　　人大政協本身就已經係「愛國者」嘅認證，呢個新制度聽落畀到人大政協一個「特權」，落實「愛國者治港」，亦都係合情合理；但係令到某啲界別嘅位少咗，據聞就有好大意見。有界別私底下已經討論，希望有人大政協身份嘅界別人士最好就返去人大政協界別攞位，令佢地多返啲人出選，而建制派相信，呢個想法喺唔同界別都係有出現，人大政協身份就突然變咗不受歡迎人士。

　　據聞人大政協自己本身都搞到好混亂，大家都唔知喺邊個位出好，而現屆立法會幾個人大政協，更加擔心自己嚟緊立法會唔選又或者選唔到的話，個選委席位都無埋(因為人大政協又係立法會議員的話，一定要用立法會嘅選委議席出)，出年連特首都唔可以選。因為安排的確係對部分人或者界別出現不公情況，Tina聽聞將會由全國政協常委唐英年領導嘅友好協進會全面協調，希望將個餅分到大家都高興。之但係餅就係咁大，咁多人要分，唔通真係要有耶穌分餅嘅本領先得？

　　香港大學作為「百年老店」，肩負住亞洲其中一間最高學府嘅名堂，估唔到竟然發生一場最高層次嘅「宮廷爭鬥」鬧劇，主角接連出招，劇情峰迴路轉到政界人士齊齊食花生。

　　香港大學校長張翔同校委會主席王沛詩之間嘅內訌，發展咗幾個星期，最終要由港大校監、特首李家超公開宣布，就港大近期內部運作事宜成立調研小組跟進，先至暫時有所平息。風波嘅來龍去脈，讀者應該都耳有所聞，呢度唔再詳述。Tina更加關注嘅係，點解兩個有頭有面嘅人，可以咁樣有失身份隔空抽擊，究竟背後有咩事發生咗？

　　據花生友講，政府初步研判就已經覺得兩個人都係有問題，本應該全部可以私底下解決得到嘅問題，係都要揭開肚皮，特別係特首已經私下同過兩人摸底，佢哋仍然先後再發信互抽，明顯就係當特首無到。

最高管理層爆內訌，勢影響港大聲譽。(AP)

　　據聞政府當局最難理解嘅係，校委會主席王沛詩身兼咁多項重要公職，而老公更加係政壇重量級人馬、立法會班長廖長江，就算校長所作所為有幾千不該萬不該，佢有更多更妥當嘅處理手法，包括可以按照程序由校委會投票決定，無可能自把自為做出咁多咁無政治智慧嘅舉動，置「百年老店」校譽於不顧。

　　花生友仲指出，依家政府成立「調研小組」而唔係「獨立調查委員會」，其實都係想盡快救火，「成立調查委員會，最終要有調查報告公諸於世，會唔會愈揭愈臭進一步影響校譽？成立調研小組就進可攻退可守，立即令到兩人收手，而調研之後嘅最終結果，公布幾多內容亦可以有走盞，算係幾高明嘅招數。但其實行到呢一步，都唔係特首希望做嘅。我估計兩人都押上咗自己嘅名聲攬炒，料張翔都難以再續任，而王沛詩亦難以再獲政府委以重任」。

　　無論最後誰對誰錯，受害嘅亦只有「百年老店」。花生友話，外人見到你管理架構可以咁混亂，日後都唔知仲搵唔搵到有分量嘅人嚟出任校長，最後受傷嘅亦只有港大。