世事政情

　　政府官員成日有句台詞，唔係「依法施政」就係「依法治港」，呢句萬能Key當然係任何時間、任何時候都係咁啱用，只要政府係畀質疑有任何問題，搬出呢一句就能夠以一擋萬。不過今時今日要「依法治港」，更重要嘅係立咗條法先能夠治港，未來政府只要覺得有邊一樣嘢係政治不正確，立法先最重要，「立」法治港可能成為主旋律。

　　噚日(18日)立法會政制事務委員會之上，政制及內地事務局局長曾國衞就第一次表示，政府正聯同平機會研究加強反歧視嘅保障，希望處理針對內地來港民眾(即係包括任何旅客、新移民、來港工作或讀書嘅內地人)遇到嘅歧視或中傷問題，當局爭取現屆政府任期內完成研究，由下一屆立法會審議修例。

（資料圖片）

　　聲明在先，Tina覺得任何形式嘅歧視喺社會上都絕不容許，無論膚色、種族、職業等等，所有人生出來就應該係平等嘅。為咗規管歧視，香港就有平機會去執行四條反歧視法例，包括有性別、殘疾、家庭崗位同埋種族。當然，四條法例係唔係可以杜絕晒所有嘅歧視行為？當然係無可能，但香港嘅情況又係唔係去到要立即對歧視內地來港民眾要進行立法？其他講咗咁多年嘅不同類形歧視，又點解會放埋一邊唔去搞呢？

　　現時政府都係先行放風話會搞，具體法例內容都未出，不過過往過多嘅內地旅客來港對部分地區嘅居民造成滋擾，呢個亦係不爭嘅事實。好似一啲工業區設有專為內地旅客而設嘅金店、禮品店，吸引一車車嘅內地旅客前去，搞到附近可能出現大擠塞，萬一有港人口出一句不禮貌嘅回應，令到內地旅客聽落唔舒服，咁又會唔會涉及到違反法例？日後再有過多嘅內地民眾來港影響到本地人嘅生活，權益受損的話，咁本地人嘅權益到時又係唔係要靠立法去維持返？

　　法例的確唔可以無，但有時立法亦都可能會係雙面刃，帶來嘅後果比起唔立法嘅好。喺反歧視之上，立法就好似係特效藥，可能會立竿見影有效果，但更好嘅方式應該係服多幾劑中藥，固本培元，教育大眾先係長遠之策。

　　不過睇到依家立法會建制派議員對於各方面涉及內地嘅問題，都希望以法律去解決，未來一屆立法會，「立」法治港都必然係主調。

　　香港大學作為「百年老店」，肩負住亞洲其中一間最高學府嘅名堂，估唔到竟然發生一場最高層次嘅「宮廷爭鬥」鬧劇，主角接連出招，劇情峰迴路轉到政界人士齊齊食花生。

　　香港大學校長張翔同校委會主席王沛詩之間嘅內訌，發展咗幾個星期，最終要由港大校監、特首李家超公開宣布，就港大近期內部運作事宜成立調研小組跟進，先至暫時有所平息。風波嘅來龍去脈，讀者應該都耳有所聞，呢度唔再詳述。Tina更加關注嘅係，點解兩個有頭有面嘅人，可以咁樣有失身份隔空抽擊，究竟背後有咩事發生咗？

　　據花生友講，政府初步研判就已經覺得兩個人都係有問題，本應該全部可以私底下解決得到嘅問題，係都要揭開肚皮，特別係特首已經私下同過兩人摸底，佢哋仍然先後再發信互抽，明顯就係當特首無到。

最高管理層爆內訌，勢影響港大聲譽。(AP)

　　據聞政府當局最難理解嘅係，校委會主席王沛詩身兼咁多項重要公職，而老公更加係政壇重量級人馬、立法會班長廖長江，就算校長所作所為有幾千不該萬不該，佢有更多更妥當嘅處理手法，包括可以按照程序由校委會投票決定，無可能自把自為做出咁多咁無政治智慧嘅舉動，置「百年老店」校譽於不顧。

　　花生友仲指出，依家政府成立「調研小組」而唔係「獨立調查委員會」，其實都係想盡快救火，「成立調查委員會，最終要有調查報告公諸於世，會唔會愈揭愈臭進一步影響校譽？成立調研小組就進可攻退可守，立即令到兩人收手，而調研之後嘅最終結果，公布幾多內容亦可以有走盞，算係幾高明嘅招數。但其實行到呢一步，都唔係特首希望做嘅。我估計兩人都押上咗自己嘅名聲攬炒，料張翔都難以再續任，而王沛詩亦難以再獲政府委以重任」。

　　無論最後誰對誰錯，受害嘅亦只有「百年老店」。花生友話，外人見到你管理架構可以咁混亂，日後都唔知仲搵唔搵到有分量嘅人嚟出任校長，最後受傷嘅亦只有港大。