世事政情

　　新一屆政府三個司長嘅位置終於都有晒眉目。之前都講過，財政司司長同律政司司長兩個位，陳茂波同鄭若驊留任已經毫無懸念，而政務司司長一職，極有可能會由保安局局長鄧炳強行返李家超舊路。不過李家超上咗北京見過各位領導人之後，風向竟然180度轉變。

　　今日多份媒體不約而同報道，政務司司長(CS)一職的確係由前紀律部隊出任，不過唔係鄧炳強，而係現職特首辦主任嘅陳國基。陳國基做特首辦主任之前，一直係入境處要員，做入境處處長之前更加調過去北京，所以喺內地官場有返咁上下人脈。之但係無啦啦又點會爆咗佢嚟上任CS呢？

陳國基（圖左，政府新聞處圖片）

　　Tina今日即刻問咗好幾位政圈中人，佢地都不約而同咁話，報紙報道之前，佢地都一直以為係鄧炳強做硬CS，所以對於最後由陳國基跑出，的確係有啲意外。其中一位政圈中人就話，照推斷陳國基唔會係李家超推薦名單之上，因為陳的確係林鄭提拔上去，所以呢個最後嘅安排，極可能係出自北京，而目的都係希望一個熟悉整個政府運作嘅人去擔任CS。政圈中人仲話，陳國基擔任特首辦主任五年，稱得上係八面玲瓏，呢個位置的確接觸到不同層面，計落點都好過只係做保安局長都仲未足一年嘅鄧炳強。

　　咁鄧炳強坐唔正，會唔會做副司長？另一位政界人士就話，聽聞呢個機會變得更渺茫，事關副司長要協助司長處理唔少民生政策，更加係要落手落腳去做，鄧炳強嘅強項真係喺保安之上，所以據聞鄧將會留守原職位，繼續鞏固國家安全嘅工作，副司長極可能由AO出身、有政績嘅常秘去出任。

　　政務司副司長未八到係邊個，不過另外兩個副司長，人選似乎已經塵埃落定。上星期講過基本法委員會委員、立法會議員梁美芬將會入政府，呢個只係爭正式公布，至於財政司副司長一職，傳聞發展局局長黃偉綸會升職，協助陳茂波處理最難搞嘅土地房屋問題。

　　負責為全港超過19萬公務員制定薪酬調整幅度指標嘅「薪酬趨勢調查委員會」，剛剛喺噚日（16日）公布最新嘅2024年薪酬趨勢調查報告，各級公務員加薪淨指標，分別係高級公務員4.01%、中級公務員4.32%同埋低級公務員5.47%，遠遠超過之前市場預期嘅3%至4%。

　　消息一公布，市面「嘩嘩聲」四起，事關成4%至5%人工加幅，對私營市場九成打工仔近幾年嚟講，都係遙不可及。有熟知政府運作嘅政界中人就話，每年嘅薪酬趨勢調查委員會報告，都令到政府高層頭都大埋，佢形容：「私營機構加幾多人工，梗係睇吓公司去年盤數同埋預測未來2、3年經營狀況去決定，簡單好多；但政府加幾多人工畀公務員，要考慮嘅因素唔單止係自己個荷包，仲要睇埋對私營市場嘅影響，絕對係政治學上一門高深學問。」

　　今年公布呢個遠超市場預期嘅加幅，絕對係令到政府處於幾尷尬嘅局面。如果跟足建議去加人工，好處當然係公務員士氣獲得提振，有助現屆政府繼續積極推行各項政策，等下面嘅公務員「攰死」之餘，起碼荷包得以充實。不過現時市場經營環境並唔係一面向好，以往一直係「天之驕子」嘅金融機構更加出現裁員情況，中小企更加喺北上消費熱潮之下「得個做字」，街上、商場吉舖處處，如果政府帶頭加足5%薪酬，對私營市場絕對係沉重打擊。

薪酬趨勢調查委員會建議嘅公僕加薪幅度，遠超市場預期。(Shutterstock)

　　喺面對千億財赤、儲備跌到得番7000億元、政府甚至要加大發債去支持基建項目嘅時候，加薪5%，講緊每年開支要增加超過60億元，政界中人就話：「呢頭你話政府唔夠錢要研究加呢樣收費、減嗰樣使費，到頭來加人工就要每年使多60億至70億元，試問又點樣同市民交代？」

　　而加唔足嘅話，對政府運作亦有唔少影響。有公務員朋友形容，呢幾年行政主導勢頭之下，個個局都要交足功課，上面有任何諗頭，做細嘅就要出頭，唔少部門嘅中高層都做得辛苦過出名工時長嘅四大核數師行，夜晚10點後收工都係等閒事，「人工加得唔夠好，可能就會令到人手流失加劇，特別係30幾歲中層嗰班，佢哋有政府工作經驗，行出去好多私營機構都爭住要，政府人工加唔夠，呢班中堅走咗就好難再填補」。

　　有立法會議員就私底下透露，早排都已經有評論認為公務員要減人工去同政府庫房共度時艱，不過佢自己就覺得，呢種講法無非都係社會嘅一種怨氣，「要解呢口怨氣好簡單，只要最高嗰班官員唔加人工之餘仲自願凍薪，甚至減人工，輿論就自然會覺得高層有承擔，呢啖氣就自然吞得落，下面加得足又點話呢！」