世事政情

　　闊別國際舞台差唔多三年嘅香港，難得搞到次國際金融峰會，雖然有幾位矚目嘅海外金融頭頭臨尾甩底嚟唔到，但點都有二百幾人出席，場面都可算得上ok熱鬧。不過一個全城矚目嘅盛事，竟然就畀財爺陳茂波「涉嫌特權」而搶盡本地政商界嘅眼球，的確係人算不如天算。

　　財爺「涉嫌特權」最爭議一點，就係佢喺沙地返港之後，當局一路都無公布到佢嘅核酸測試係陽性定係陰性，要喺佢星期二（1日）除晒口罩喺峰會發言，又喺會場Social之後，即係星期二晚11點半咁上下，先發個新聞稿確認財爺嘅檢測其實係陽性，不過由於佢係屬於康復個案，病毒量屬於偏低所以先容許佢出席峰會。政府新聞稿仲「補飛」，話陳茂波相類似嘅個案有成455個，陳並唔係先例，暗示佢「並無特權」。

（Tim攝）

　　其實特唔特權，普羅大眾包括Tina我，都有一把尺。簡單咁講，如果唔係發生喺陳茂波身上，或者係Tina去咗日本第一日就發現中招，之後留喺當地直至快測陰性返香港，機場驗核酸發現係陽性的話，咁啱Tina又要喺抵埗翌日出席細佬嘅人生大事，諗住打個電話去「請求」衛生署：「阿官大人，麻煩你體諒我係康復個案、病毒量低，准我唔使0+3周圍走來走去啦，求求你!」就算衛生署官員見到Tina個案真係大發慈悲容許，但有無諗過要打幾耐電話先搵到可以話事嘅官員？

　　只可以話，陳茂波今個個案絕對唔係有啲人所諗嘅特權，政府的確係根據現有法例賦予嘅權力去畀陳茂波出席峰會；不過呢方面唔係特權，喺整個處理程序上就絕對係體現到特權階級嘅唔同，政商權貴往往就係有呢啲「赤裸裸」嘅特權，打個電話或者指下個鼻哥就可以較快處理一啲特別案例。

　　而政府今次喺成件事嘅資訊公布之上亦都係顯得畏首畏尾咁，間接令到市民覺得政府的確係畀咗特權陳茂波，對陳亦都係非常唔公道。政府喺10月31日陳茂波落機做完核酸檢測之後，死都唔肯講陳係陰定係陽；而之後公布完陽性亦都唔肯講陳嘅CT值（病毒量）有幾多，難免會令Tina等凡夫俗子左諗右諗。希望今次事件可以畀政府各個部門一個公關教訓，喺搶佔輿論嘅時候要「Get in front, not behind!」。

　　香港大學作為「百年老店」，肩負住亞洲其中一間最高學府嘅名堂，估唔到竟然發生一場最高層次嘅「宮廷爭鬥」鬧劇，主角接連出招，劇情峰迴路轉到政界人士齊齊食花生。

　　香港大學校長張翔同校委會主席王沛詩之間嘅內訌，發展咗幾個星期，最終要由港大校監、特首李家超公開宣布，就港大近期內部運作事宜成立調研小組跟進，先至暫時有所平息。風波嘅來龍去脈，讀者應該都耳有所聞，呢度唔再詳述。Tina更加關注嘅係，點解兩個有頭有面嘅人，可以咁樣有失身份隔空抽擊，究竟背後有咩事發生咗？

　　據花生友講，政府初步研判就已經覺得兩個人都係有問題，本應該全部可以私底下解決得到嘅問題，係都要揭開肚皮，特別係特首已經私下同過兩人摸底，佢哋仍然先後再發信互抽，明顯就係當特首無到。

最高管理層爆內訌，勢影響港大聲譽。(AP)

　　據聞政府當局最難理解嘅係，校委會主席王沛詩身兼咁多項重要公職，而老公更加係政壇重量級人馬、立法會班長廖長江，就算校長所作所為有幾千不該萬不該，佢有更多更妥當嘅處理手法，包括可以按照程序由校委會投票決定，無可能自把自為做出咁多咁無政治智慧嘅舉動，置「百年老店」校譽於不顧。

　　花生友仲指出，依家政府成立「調研小組」而唔係「獨立調查委員會」，其實都係想盡快救火，「成立調查委員會，最終要有調查報告公諸於世，會唔會愈揭愈臭進一步影響校譽？成立調研小組就進可攻退可守，立即令到兩人收手，而調研之後嘅最終結果，公布幾多內容亦可以有走盞，算係幾高明嘅招數。但其實行到呢一步，都唔係特首希望做嘅。我估計兩人都押上咗自己嘅名聲攬炒，料張翔都難以再續任，而王沛詩亦難以再獲政府委以重任」。

　　無論最後誰對誰錯，受害嘅亦只有「百年老店」。花生友話，外人見到你管理架構可以咁混亂，日後都唔知仲搵唔搵到有分量嘅人嚟出任校長，最後受傷嘅亦只有港大。