世事政情

　　呢個星期，最鋪天蓋地嘅新聞同埋政府、政黨宣傳，必定係區議會改革方案，由全直選改到得返不足兩成議席係市民投票選出，其餘八成席位，將會係直接委任同埋互選產生。

　　大幅削減直選席位，大家都係意料中事，事關過往直選太過政治化，本應該關心區內事務變成為政治掛帥，當然係「質變」，要改，合情亦都合理。之不過今次改革，幅度之大真係超出唔少區佬想象。最難以接受嘅係區議會主席一職，由以往當區區議員互選，改由民政事務專員（俗稱DO）兼任，變相令到區議員「無職升」。

（資料圖片）

　　Tina問過一個資深區佬，佢直言政府要體現行政主導，無可厚非，但確實無必要去到咁盡，「你覺得主席權力過大，你可以將一啲唔想下放畀主席嘅權力收返，我覺得無乜問題；依家你連主席個位成個交由DO負責，一個政務官用政府思維去主持會議，咁呢個仲係議會咩？以往18區區議會主席得18個，其實係稀有過立法會議員，唔少區議員撈咗幾十年都未必坐到呢個位，但起碼你人有政治能量、有同事支持，一樣可以做到，但依家連僅有嘅『升職路』都無乜埋，試問仲有幾多有能力、有承擔嘅人會想行區議會呢條階梯？我係後生嘅直接去考AO好過啦！」

　　呢度畀返啲資料大家，現時區議員薪酬超過3.6萬，如果做副主席，上到去5.5萬，做埋主席的話，更加係普通區議員嘅2倍，有成7.3萬元。

　　另一個「不是味兒」嘅改革，就係會引入「區議員履職監察機制」，簡單咁講就係小學雞嘅「蓋豬仔印」。如果有議員犯下暫時列出嘅11項負面清單行為，例如成日無故缺席會議、行為唔檢點、阻住會議進行等等，隨時有機會被懲處。其中一項「在沒有合理理由下不履行區議會主席指派的任務及工作指標」更加令到主席擁有尚方寶劍一樣，架喺議員頸上。

　　資深區佬坦言，喺一層層保護網之下，過五關斬六將先能夠出選或者被政府揀中做議員，佢地列出呢啲條件根本就係多餘，絕對諗唔明點解仲要設有咁嘅天條，令到DO操生殺大權，權力更加係以往主席所無嘅，「既然咁唔信任區議員，點解唔索性將成個區議會DQ咗佢呢？DO做晒管晒咪得囉！」

　　如果問依家有咩嘢可以令到全香港市民槍口一致嘅，的士業可以話係唯一。自從有的士行家自行放蛇捉Uber司機之後，全香港市民(除咗的士從業員)都齊心聲討的士行業，將過往坐的士受過嘅冤屈氣都發晒出嚟。雖然的士業將會有重組，推出的士車隊，而的士業最近亦都搞禮貌活動，但都無阻政府全面檢討網約車規管嘅決心，似乎政府已經心裡有數，香港即將落實Uber合法化。

　　Tina最近同一位執法部門高層飯局，佢就直言，Uber今時今日喺夾縫之中生存，擺到明就係得到政府嘅首肯；Uber嘅業務肯定唔會係合法，以政府今時今日嘅行政主導，再加上警隊嘅雷厲風行，有心要打擊Uber的話，肯定佢地明日就連上線都上唔到。「點解政府唔郁手？最重要就係Uber解決到的士行業永遠都解決唔到嘅問題：唔會揀客、唔會拒載、唔會濫收車資，所有行程都有後台去監察，有咩問題都投訴有門。更重要嘅係， 政府依家係要『無處不旅遊』，全世界大部分嘅旅客都會有Uber App去叫車，Uber就正正係幫到政府解決呢個大難題，試問的士業又點會有條件去同政府講數？」

的士業最近推行禮貌活動，但無阻政府全面檢討網約車規管（資料圖片）

　　有立法會議員就坦言，Uber所代表嘅網約車行業喺全世界都已經證明咗畀的士更有效率，而內地更加係其中之一，「網約車喺內地成行成市，亦都見到網約車同的士係可以拼行，你好難同阿爺講點解香港就只可以有的士而無網約車」。不過呢位立法會議員亦都坦言，特區政府亦都有責任平衡各方利益，全面開放市場令到的士牌價大幅下跌亦都唔係政府願意見到，所以佢都私下建議，下一步開放網約車的話，亦都要將網約車同的士嘅功能劃分，「的士可能係繼續打大眾化市場，而網約車就可以定更高嘅價格，係畀啲捨得花更多錢買服務嘅人士，咁就各有各嘅市場，河水不犯井水。」

　　議員亦都向的士業界派定心丸，認為如果網約車合法化，網約車司機亦都要喺規管之下營業，咁就自然要交牌照費、更高嘅保險費等等，「佢地嘅經營成本亦都會大增，唔會好似依家咁，有車牌、有架車就可以做，所以估計只會有部分網約車司機會正式登記，某程度上亦都會令到客源流返去傳統的士業嗰邊，同依家比，應該係有利無害。」