世事政情

　　參加區議會選舉除咗要爭取選民投你一票以外，最困難其實係點樣搵到「三會」提名票，亦可以話係區議會嘅一道「關卡」。唔好以為呢個關卡專係用來閘住非愛國者或者一啲無厘頭參選人士，估唔到嘅係，就連政治老手田北辰，亦都為咗「三會」提名票東奔西走。

　　田二少創辦嘅實政圓桌有派人參選，不過佢上周已經公開咁話，派咗5個人出選，但竟然有4名參選人一直拎唔到「三會」提名。不過佢上一個政黨、新民黨嘅主席葉劉淑儀喺佢公開話無票之後，拋出大大條橄欖枝，指田二少做過新民黨副主席，其實可以搵新民黨「三會」成員爭取提名，仲明言話會「幫手」。田二少見葉太不計前嫌，更大讚葉太有「大局觀」。

　　獲得唔同黨嘅人雪中送炭，以為坐定粒六，點知事件峰迴路轉得過分。之後田二少爆料，話自從葉太講咗話幫手之後，一直都唔能夠直接聯絡到葉太，其中一次葉太接電話之後仲立即cut線。田致電兩日後就收到葉太秘書通知，話可以搵副主席黎棟國，黎棟國就叫田二少提交參選人政綱等資料，表示之後會由新民黨內部決定。

　　新民黨日前就正式宣布，「不會給提名票予實政圓桌參選人」，田二少今次真係一場歡喜一場空。佢老哥自然一肚氣，接受傳媒查詢時就話：「既然係咁，你（葉太）當初公開講係為乜呢？」

　田二少創辦嘅實政圓桌派出5人選區議會。（田北辰fb圖片）

　　Tina同政圈中人八卦過，話件事本身就好簡單，以葉太嘅江湖地位，打個電話要幾十張提名票都唔會係大問題，所以一開始葉太真係出於幫到就幫嘅心態。不過後來田二少來電未能接聽，佢又急急腳咁同傳媒爆料話搵唔到葉太，極有可能就係呢個位觸動到「姐姐」，「姐姐」可能一氣之下就決定揸正來做，由黨友自己去做決定畀唔畀提名票。而由於葉太無提及過一定要畀，咁新民黨同田二少依家已經無晒瓜葛，好自然就反對畀票，演變成依家呢個終局。

　　政圈中人仲話，今次事件畀到公眾一個非常唔好嘅觀感，就係選區議會要得到「三會」提名難過登天，有心想服務社會嘅有能之士，只要你唔識人嘅話亦都無計可施，咁呢個選舉制度又是否稱得上係「公平、公開、公正」？大家自行判斷。

　　如果問依家有咩嘢可以令到全香港市民槍口一致嘅，的士業可以話係唯一。自從有的士行家自行放蛇捉Uber司機之後，全香港市民(除咗的士從業員)都齊心聲討的士行業，將過往坐的士受過嘅冤屈氣都發晒出嚟。雖然的士業將會有重組，推出的士車隊，而的士業最近亦都搞禮貌活動，但都無阻政府全面檢討網約車規管嘅決心，似乎政府已經心裡有數，香港即將落實Uber合法化。

　　Tina最近同一位執法部門高層飯局，佢就直言，Uber今時今日喺夾縫之中生存，擺到明就係得到政府嘅首肯；Uber嘅業務肯定唔會係合法，以政府今時今日嘅行政主導，再加上警隊嘅雷厲風行，有心要打擊Uber的話，肯定佢地明日就連上線都上唔到。「點解政府唔郁手？最重要就係Uber解決到的士行業永遠都解決唔到嘅問題：唔會揀客、唔會拒載、唔會濫收車資，所有行程都有後台去監察，有咩問題都投訴有門。更重要嘅係， 政府依家係要『無處不旅遊』，全世界大部分嘅旅客都會有Uber App去叫車，Uber就正正係幫到政府解決呢個大難題，試問的士業又點會有條件去同政府講數？」

的士業最近推行禮貌活動，但無阻政府全面檢討網約車規管（資料圖片）

　　有立法會議員就坦言，Uber所代表嘅網約車行業喺全世界都已經證明咗畀的士更有效率，而內地更加係其中之一，「網約車喺內地成行成市，亦都見到網約車同的士係可以拼行，你好難同阿爺講點解香港就只可以有的士而無網約車」。不過呢位立法會議員亦都坦言，特區政府亦都有責任平衡各方利益，全面開放市場令到的士牌價大幅下跌亦都唔係政府願意見到，所以佢都私下建議，下一步開放網約車的話，亦都要將網約車同的士嘅功能劃分，「的士可能係繼續打大眾化市場，而網約車就可以定更高嘅價格，係畀啲捨得花更多錢買服務嘅人士，咁就各有各嘅市場，河水不犯井水。」

　　議員亦都向的士業界派定心丸，認為如果網約車合法化，網約車司機亦都要喺規管之下營業，咁就自然要交牌照費、更高嘅保險費等等，「佢地嘅經營成本亦都會大增，唔會好似依家咁，有車牌、有架車就可以做，所以估計只會有部分網約車司機會正式登記，某程度上亦都會令到客源流返去傳統的士業嗰邊，同依家比，應該係有利無害。」