世事政情

　　特首李家超喺《施政報告》之中提到要興建一個以國家發展成就為主題嘅博物館，作為國家嘅對外窗口，香港要做好呢個工作可以話係責無旁貸，起多個館使幾個億，雖然話庫房水位愈來愈低，但點都係足以應付嘅。不過就萬萬無想過，政府諗嘅唔單止係起多一個館咁簡單，而係會將現有嘅幾個博物館進行大兜亂，惹起輿論高度關注。

　　政府初步嘅考慮，係將國家發展成就館設喺依家尖沙咀科學館嘅位置，咁一向極受大小朋友歡迎嘅科學館，就會搬到去沙田文化博物館現址。咁文化博物館又會搬去邊度？基本上可以話係功成身退，入面嘅展覽極有可能會融入去其他展覽館。

　　點解政府要大費周章？直接起一個全新嘅博物館唔係更簡單直接？據聞政府初步希望國家發展成就館喺市區，咁就更能方便大眾，而縱觀芸芸現成博物館，都無乜幾多個有科學館咁四通八達，再加上科學館設施已經唔多科學，反正都係要重新執過晒，咁轉為國家發展成就館就似乎順理成章。

政府初步計劃將國家發展成就館設喺依家科學館嘅位置。（網上圖片）

　　經Tina打聽之下，相信政府都係一招「以退為進」。政府擔心如果一開始就提出覓地建館，咁好難再喺市區靚地插到針，到時要去到偏遠地區的話，話唔埋又會畀愛國愛港嘅議員炮轟；依家先揀咗最優先希望設置嘅地點提出方案，等社會作出詳細討論，再由一眾議員根據民情判斷最終定案，咁政府就少咗被痛罵嘅機會。

　　暫時睇到嘅民情，似乎對於政府方案都係反對多過贊成。首先，科學館一直都深入民心，更加係唔少家長幫小朋友「放電」嘅好去處，假期成日爆場，就連下面條街都係叫「科學館道」；其次，政府計劃殺咗文化博物館，對文化界來講亦都係一場災難，少咗一個恆常展館去做展覽。

　　Tina同幾個民政Panel嘅議員八過吓，佢哋都話依家難以決定支唔支持政府方案；最有「智慧」嘅一個議員形容，要否決政府方案其實都好容易，事關庫房有排缺水，揀一個最慳錢嘅方案自然就係最符合公眾利益，咁理應揀個變動最少嘅方案就最妥當，擺到明就係會否決政府嘅初步建議。

　　如果問依家有咩嘢可以令到全香港市民槍口一致嘅，的士業可以話係唯一。自從有的士行家自行放蛇捉Uber司機之後，全香港市民(除咗的士從業員)都齊心聲討的士行業，將過往坐的士受過嘅冤屈氣都發晒出嚟。雖然的士業將會有重組，推出的士車隊，而的士業最近亦都搞禮貌活動，但都無阻政府全面檢討網約車規管嘅決心，似乎政府已經心裡有數，香港即將落實Uber合法化。

　　Tina最近同一位執法部門高層飯局，佢就直言，Uber今時今日喺夾縫之中生存，擺到明就係得到政府嘅首肯；Uber嘅業務肯定唔會係合法，以政府今時今日嘅行政主導，再加上警隊嘅雷厲風行，有心要打擊Uber的話，肯定佢地明日就連上線都上唔到。「點解政府唔郁手？最重要就係Uber解決到的士行業永遠都解決唔到嘅問題：唔會揀客、唔會拒載、唔會濫收車資，所有行程都有後台去監察，有咩問題都投訴有門。更重要嘅係， 政府依家係要『無處不旅遊』，全世界大部分嘅旅客都會有Uber App去叫車，Uber就正正係幫到政府解決呢個大難題，試問的士業又點會有條件去同政府講數？」

的士業最近推行禮貌活動，但無阻政府全面檢討網約車規管（資料圖片）

　　有立法會議員就坦言，Uber所代表嘅網約車行業喺全世界都已經證明咗畀的士更有效率，而內地更加係其中之一，「網約車喺內地成行成市，亦都見到網約車同的士係可以拼行，你好難同阿爺講點解香港就只可以有的士而無網約車」。不過呢位立法會議員亦都坦言，特區政府亦都有責任平衡各方利益，全面開放市場令到的士牌價大幅下跌亦都唔係政府願意見到，所以佢都私下建議，下一步開放網約車的話，亦都要將網約車同的士嘅功能劃分，「的士可能係繼續打大眾化市場，而網約車就可以定更高嘅價格，係畀啲捨得花更多錢買服務嘅人士，咁就各有各嘅市場，河水不犯井水。」

　　議員亦都向的士業界派定心丸，認為如果網約車合法化，網約車司機亦都要喺規管之下營業，咁就自然要交牌照費、更高嘅保險費等等，「佢地嘅經營成本亦都會大增，唔會好似依家咁，有車牌、有架車就可以做，所以估計只會有部分網約車司機會正式登記，某程度上亦都會令到客源流返去傳統的士業嗰邊，同依家比，應該係有利無害。」