世事政情

　　「完善選舉制度」之下嘅立法會，果然係五光十色，更加係閃到火花四射。

　　工聯會立法會議員、自稱係KOL（意見領袖）嘅陳穎欣，日前喺佢自己擁有超過30萬粉絲嘅YouTube頻道，向立法會前主席曾鈺成發炮，批評呢位民建聯殿堂級人物就《基本法》23條立法發表嘅觀點係「關鍵時刻造反」。一片激起千重浪，兩年立會經驗挑戰元祖級人馬，結果民建聯何俊賢要喺咪兜前面發炮還擊，暗批陳穎欣行為係「博取流量及違反愛國者治港」，仲話強烈譴責。

　　唔係陳穎欣咁樣提起、唔係何俊賢咁樣回應，Tina都留意唔到曾鈺成嘅講法，證明曾所言其實係幾咁mild，難以講到話會影響到23條立法，更加唔會令市民反對23條立法。再加上，曾鈺成政治智慧之高，唔由得Tina評論，一個堅實愛國者之口講得出嘅，又點會係「造反」之言？「博取流量」呢個形容，絕不為過。

建制派後輩陳穎欣在網上批評元祖級人馬曾鈺成「關鍵時刻造反」，惹來政圈熱論。（陳穎欣YouTube影片截圖）

　　事件發生之後，立法會內私底下議論紛紛，據聞大部分人都認為，陳既然貴為立法會議員，一言一行確實應該謹慎，唔可以因為自己有另一頂帽係KOL，就可以喺社交平台口沒遮攔去博取流量，有議員更加形容：「我就唔信佢夠膽喺議事堂上對阿曾發出同一樣嘅批評，既然係咁，即係佢應該都知道有啲咩應該講、有啲咩唔應該講。」

　　有政界中人就指出，今次事件更加反映出，現時愛國陣營之中已經出現不少裂痕，長此下去會唔會為政局添煩添亂，真係未知之數。嗰個政界中人又話，何俊賢咁高調企喺咪兜反擊陳穎欣，其實係將事件放到最高層次，等同係代表民建聯向工聯會下戰書，將兩個以前一直合作無間嘅基層藍營政黨放喺對立面，「根本就等於話畀大家知，兩個最大基層政黨依家已經無合作空間」。

　　至於裂痕從何而來，應該係由完善選舉制度之後，多次嘅選舉，包括立法會選委會議席補選、區議會選舉等等，工聯會都明顯大幅落後民建聯，聽聞「工記」內部已經有不少微言，話「民記」以大欺小、盡攬資源等等。早前立法會爆出一單感情糾紛，當中主角更傳聞係「民記」中人，據聞最大嫌疑嘅爆料者，亦正正係陳。綜合一路以來嘅脈絡，睇得出「工記」「民記」兩大政黨已經難以再有合作機會。

　　如果問依家有咩嘢可以令到全香港市民槍口一致嘅，的士業可以話係唯一。自從有的士行家自行放蛇捉Uber司機之後，全香港市民(除咗的士從業員)都齊心聲討的士行業，將過往坐的士受過嘅冤屈氣都發晒出嚟。雖然的士業將會有重組，推出的士車隊，而的士業最近亦都搞禮貌活動，但都無阻政府全面檢討網約車規管嘅決心，似乎政府已經心裡有數，香港即將落實Uber合法化。

　　Tina最近同一位執法部門高層飯局，佢就直言，Uber今時今日喺夾縫之中生存，擺到明就係得到政府嘅首肯；Uber嘅業務肯定唔會係合法，以政府今時今日嘅行政主導，再加上警隊嘅雷厲風行，有心要打擊Uber的話，肯定佢地明日就連上線都上唔到。「點解政府唔郁手？最重要就係Uber解決到的士行業永遠都解決唔到嘅問題：唔會揀客、唔會拒載、唔會濫收車資，所有行程都有後台去監察，有咩問題都投訴有門。更重要嘅係， 政府依家係要『無處不旅遊』，全世界大部分嘅旅客都會有Uber App去叫車，Uber就正正係幫到政府解決呢個大難題，試問的士業又點會有條件去同政府講數？」

的士業最近推行禮貌活動，但無阻政府全面檢討網約車規管（資料圖片）

　　有立法會議員就坦言，Uber所代表嘅網約車行業喺全世界都已經證明咗畀的士更有效率，而內地更加係其中之一，「網約車喺內地成行成市，亦都見到網約車同的士係可以拼行，你好難同阿爺講點解香港就只可以有的士而無網約車」。不過呢位立法會議員亦都坦言，特區政府亦都有責任平衡各方利益，全面開放市場令到的士牌價大幅下跌亦都唔係政府願意見到，所以佢都私下建議，下一步開放網約車的話，亦都要將網約車同的士嘅功能劃分，「的士可能係繼續打大眾化市場，而網約車就可以定更高嘅價格，係畀啲捨得花更多錢買服務嘅人士，咁就各有各嘅市場，河水不犯井水。」

　　議員亦都向的士業界派定心丸，認為如果網約車合法化，網約車司機亦都要喺規管之下營業，咁就自然要交牌照費、更高嘅保險費等等，「佢地嘅經營成本亦都會大增，唔會好似依家咁，有車牌、有架車就可以做，所以估計只會有部分網約車司機會正式登記，某程度上亦都會令到客源流返去傳統的士業嗰邊，同依家比，應該係有利無害。」