世事政情

　　23條立法之後，中環精英都真係要同阿爺交功課，拼經濟、謀發展，不過第一大關「垃圾徵費」睇嚟就受到各大政黨嘅壓力，唔胎死腹中都會一定程度延後，唔多唔少都幾落中環面。而另一大關「沙田T4項目」，又再一次考驗各路人馬嘅政治智慧。

　　沙田T4主幹路工程，造價高達71.6億元，喺政府莫財乜都要減之下，當然惹起爭議，早前更要臨時抽起撥款申請，或要增潤一下文件。日前立法會財委會特別會議上，唔少議員都關注政府有無可能再調低價錢，有傳聞就話，政府左減右減，最多都只係微減到2億至3億元，九牛一毛，未必回應到部分議員嘅期望，但仍然計劃下月初提交財委會審議。

　　今次呢個撥款申請，帶頭反對得最勁嘅就係從屬政治聯盟C15+嘅新界東南立法會議員林素蔚，佢接受傳媒查詢時就講過項目造價離譜，如工程造價最後無大幅降低，或無替代方案，就算再上財委會，個人都會投反對票。同佢同一陣線嘅另外三位議員楊永杰、張欣宇同梁文廣（都係屬於C15+，不過佢哋另外稱自己係A4聯盟），都某程度上表示過難以支持撥款，最終會唔會反對都係睇政府最後定案。

政府指T4可解決沙田、火炭、石門及馬鞍山等地區的交通擠塞問題；圖中黃色線路為模擬T4路段。（運輸及物流局fb圖片）

　　Tina聽聞，政府對今次撥款申請可以話係如臨大敵，已經四出拉攏其他黨派，務求可以在高票之下通過有關撥款。據透露，政府最唔想見到就係幾路人馬齊齊聲言反對，咁樣喺壓力之下都難以硬闖；而C15+總共有15位議員，政府亦唔希望見到佢哋全體反對，據聞政府將會採取「分化」手段，希望將反對票僅限於聯盟內少數。

　　而政府之所以咁高度設防，正正就係因為「垃圾徵費」呢個前朝遺留嘅待上馬政策，去到埋門一刻受制於民意同議員嘅反對聲音，無乜可能短期內落實，「政府梗係覺得管治威信受損，萬一T4項目都一樣要撤回的話，對於現屆政府就更加係無晒面，亦難以展現行政主導嘅威嚴，所以今次T4絕對係一個大考！」

　　政府難搞之外，對各政黨嚟講亦係考牌之作，事關呢個工程昂貴係鐵一般事實，作為以監督政府花錢為重任嘅立法會，喺發揮到呢個功能之餘又要唔得罪一眾中環精英，的確唔易掌握。政壇中人都話，場戲有排睇。

　　如果問依家有咩嘢可以令到全香港市民槍口一致嘅，的士業可以話係唯一。自從有的士行家自行放蛇捉Uber司機之後，全香港市民(除咗的士從業員)都齊心聲討的士行業，將過往坐的士受過嘅冤屈氣都發晒出嚟。雖然的士業將會有重組，推出的士車隊，而的士業最近亦都搞禮貌活動，但都無阻政府全面檢討網約車規管嘅決心，似乎政府已經心裡有數，香港即將落實Uber合法化。

　　Tina最近同一位執法部門高層飯局，佢就直言，Uber今時今日喺夾縫之中生存，擺到明就係得到政府嘅首肯；Uber嘅業務肯定唔會係合法，以政府今時今日嘅行政主導，再加上警隊嘅雷厲風行，有心要打擊Uber的話，肯定佢地明日就連上線都上唔到。「點解政府唔郁手？最重要就係Uber解決到的士行業永遠都解決唔到嘅問題：唔會揀客、唔會拒載、唔會濫收車資，所有行程都有後台去監察，有咩問題都投訴有門。更重要嘅係， 政府依家係要『無處不旅遊』，全世界大部分嘅旅客都會有Uber App去叫車，Uber就正正係幫到政府解決呢個大難題，試問的士業又點會有條件去同政府講數？」

的士業最近推行禮貌活動，但無阻政府全面檢討網約車規管（資料圖片）

　　有立法會議員就坦言，Uber所代表嘅網約車行業喺全世界都已經證明咗畀的士更有效率，而內地更加係其中之一，「網約車喺內地成行成市，亦都見到網約車同的士係可以拼行，你好難同阿爺講點解香港就只可以有的士而無網約車」。不過呢位立法會議員亦都坦言，特區政府亦都有責任平衡各方利益，全面開放市場令到的士牌價大幅下跌亦都唔係政府願意見到，所以佢都私下建議，下一步開放網約車的話，亦都要將網約車同的士嘅功能劃分，「的士可能係繼續打大眾化市場，而網約車就可以定更高嘅價格，係畀啲捨得花更多錢買服務嘅人士，咁就各有各嘅市場，河水不犯井水。」

　　議員亦都向的士業界派定心丸，認為如果網約車合法化，網約車司機亦都要喺規管之下營業，咁就自然要交牌照費、更高嘅保險費等等，「佢地嘅經營成本亦都會大增，唔會好似依家咁，有車牌、有架車就可以做，所以估計只會有部分網約車司機會正式登記，某程度上亦都會令到客源流返去傳統的士業嗰邊，同依家比，應該係有利無害。」