吃喝玩樂

　　大家去旺角掃街就掃得多，咖喱魚蛋、煎釀三寶等等，更是世界聞名的香港特色街頭小食，但你有沒有想過這些小食如果全部都變身素食，味道又會怎樣？今次小編就帶大家嚟到Green Common的旺角新店，一嚐店內最新推出的菜式，包括：咖喱三寶及煎釀三寶、焗港素豬扒飯以及四川風味的流口水雞配豆乳家常麵。

咖喱三寶 $39

　　茹素也可以「篤」魚蛋！咖喱三寶包括素魚蛋、蘿蔔以及用雞髀菇製成的「魷魚」，每一口都可細嚐到秘製咖喱醬汁的辣香，充滿旺角街頭風味。

煎釀三寶 $45

　　以青紅椒、茄子及冬菇，釀入紅蘿蔔蓉、蓮藕、金菇等自家製「魚肉」餡料再煎香，爽口彈牙，醮以港式風味甜豉油，更添惹味。

焗港素豬扒飯 $82

　　外脆內嫩的厚切黃金素酥排、香濃的番茄醬汁，再灑上半溶的Daiya純素芝士已叫人垂涎，配以美味健康的黃薑飯，風味十足。

流口水雞 $68

　　選用五種不同「素」材包括腐皮、粉皮、素雞、Beyond Meat植物雞及秀珍菇手工而成，再配上麻辣醬及青瓜絲，入口有如真雞肉的質感，不但無激素及膽固醇，營養價值也可媲美真雞肉。

豆乳家常麵 $42

　　以蘿蔔、鮮腐竹及豆漿等材料熬煮的秘製豆乳湯底，配上嫩滑的陽春麵，入口香濃順滑，每一口也感受到溫暖的家常味道。

菠蘿熱情果杏桃沙冰 $58、青檸薄荷龍舌蘭蜜沙冰$58

　　兩款全新夏日沙冰，入口冰爽消暑。菠蘿熱情果杏桃沙冰，味道清新帶有果香；青檸薄荷龍舌蘭蜜，加入龍舌蘭蜜提味，屬低卡路里及低GI之選。

H-Factor氫氣水 $21.5

　　美國H-Factor氫氣水(Hydrogen Water)通過天然方法將純氫氣直接注入水中，研究指氫氣分子(H2)能溶解於水中，可與身體的氧化物結合，幫助降低氧化物對身體的傷害。飲用後，有助降低劇烈運動後的肌肉疲損勞、提升身體恢復能力、紓緩皮膚炎症，改善過敏反應及血液循環等，不但成為NBA球星近年熱愛的飲品，連荷里活明星Blake Lively和Ryan Reynolds也追捧。

Berri Pro有機運動飲品 $26

　　獲USDA有機認證的運動飲品Berri Pro，以有機椰子水、馬卡、麥盧卡蜂蜜、人參及馬基莓果等超級食物作為主要成份，比坊間的運動飲品更低熱量、低糖份並含更豐富電解質，更不含防腐劑、代糖及人工合成電解質，連國家美式足球運動員也推介。有芒果、巴西莓、檸檬及火龍果四種口味。

冷壓果汁

　　午間優惠：逢星期一至五下午六時前於餐廳惠顧，主菜每份減$10，小食、湯、甜品及飲品每份減$5(冷壓果汁除外)

Green Common The FOREST

地址：旺角奶路臣街17號The FOREST 1樓110號鋪

營業時間：星期一至日11:30am- 10:30pm

查詢電話：+852 2110 0194

　　香港地，一講起做飲食業，無論經營者或食客，皆多唉聲嘆氣。前者呻人工材料舖租樣樣貴，根本冇得做；後者呢，同樣呻樣樣加價服務差劣點解唔北上？

　　究竟這個是否真像？我肥碌觀察，中咗八成左右啦。剩返兩成，並非如此，反見有食肆日日排長龍兼訂位要三個月至半年！

　　隨便舉例，灣仔浙江軒，樂富海鱻城，以及，近日家中「排骨仔」介紹為父的生煎包點心專門店，全部旺到爆。

　　香港人口高速老化， 六十歲以上長者邁向三百萬 ，佢哋喜歡乜？十之七八喜歡「懷緬過去常陶醉」。就似小弟，搞親飯局，個個老友都話最好歎懷舊菜，愈舊愈好，若搵到已經消失的菜式更佳。

　　前排在九龍家全七福，正正試到瀕臨絕種的雞子戈渣，難做到飛起，長者為食鬼一入口，便話真係神仙企唔穩。

　　好嘞，更多兩蚊雞族鍾情的，當然是飲廣東茶，歎其一盅兩件。不過咁，隨著樣樣成本高漲，不少「飽肚」點心，漸趨消失。經營飲食業老友呻：「碌Sir，你估我哋想咩，若個個嚟整個雞球大包、臘腸卷又或懷舊糯米雞，一塞就飽，拍拍屁股走人，咁我哋賺乜呀？」

　　唔係冇人想食，係形勢所逼，唔賣！

　　講返間生煎包專門店，有乜咁吸引，要排隊？第一，客人如潮，故點心流轉快，全部新鮮出爐；第二，價錢平民化；第三，最重要，不少流失了的點心，呢處有。例如：懷舊雞球大包、鮮蝦腐皮卷、豬膶腸粉、乾蒸牛肉燒賣、梅菜扣肉包⋯⋯

久違了的豬膶拉腸粉、雞球大包及乾蒸牛肉。

　　而此店招牌，正正是生煎包，非常誇張，每份三大個，只賣三十蚊，幾乎枱枱食。分量好勁，你吞一個，必飽咗大半！

招牌生煎包$30 ，三大隻，吞一隻已經半飽。

　　是日，我只與老婆大人兩位殺去，盡量叫，食唔晒打包，也只能點六款點心，已經「肚滿腸肥」。去時為上午十一點，仍然人潮如湧，有的是一家大細，有的是師奶買完餸，也有的是提早午餐勞動工友，迫爆，從冇一張空櫈。

整個上午座無虛席。門外則有條小人龍。

　　嚟呢類食肆，絕不可要求食得寧靜、坐得舒服、事事衛生、招呼週到。

　　總之，未來前清楚自己要乜，有位就即坐低即劃點心紙。點心上枱快歎（因人人都趕），你點好意思細嚼？套用廣東術語——唔該o趙完鬆，俾位下個客。

　　總結，點心新鮮熱辣好味，Value For Money，旺得有理。

蝦餃、潮州粉果及雞紥等例牌點心也「靚仔」。

　　但最大弊端，店內冇洗手間，要出街市公廁，真真大鑊，因呢個公廁，也百份百「懷舊」，五六十年代裝修及味道有齊，好惡頂也。

食一半，打包一半，埋單拜拜。

生煎包點心專門店

地址：何文田忠孝街六十號愛民邨熟食店一號

電話：2363 1968