吃喝玩樂

　　2018米芝蓮出爐啦！想食得「招積」而價錢又夠貼地？就要快手mark低上榜的街頭小吃店啦！小編仲會同你精選網友們的必食推介呢！

 

　　今年香港共有21間小食店獲得米芝蓮推薦，其中有3間更是首度入圍，包括主打自家農場新鮮雞的外賣店「Fork Eat」、以平價梳乎厘班戟作招徠的「I Love You Dessert Bar」和位於深水埗的「文記車仔麵」。這些餐廳不但反映了香港本地的美食風貌，更以物美價廉著稱。你哋又食過未？

 

1. NEW！ Fork Eat

推薦美食：濃湯浸自家農場新鮮雞 

 

（圖片來源：IG @ho_ag）

 

　　位於元朗鳳攸北街的外賣店Fork Eat，主打自家農場新鮮雞，保證無添加激素、無化學添加劑、無人造色素及人造味精。有網友點評，以慢煮烹調的雞肉「超級滑，真心好味！」

 

地址：元朗鳳攸北街11-15號益發大廈10號舖

 

2. NEW！ I Love You Dessert Bar

推薦美食：梳乎厘班戟

 

（圖片來源：IG @ howinglok）

 

　　近年在香港興起大熱的梳乎厘班戟，外表輕盈震騰騰，入口軟綿鬆化，成功擄獲無數少女心！以平價梳乎厘班戟作招徠的I Love You Dessert Bar，晚晚更吸引不少人排隊等食呢！

 

地址：旺角白布街24號藝興大廈地下3A號舖

 

3. NEW！文記車仔麵

推薦美食：玻璃辣魷魚、牛孖根、蘿蔔、瑞士雞翼

 

（圖片來源：IG @ lps924）

（圖片來源：IG @chikin721）

 

　　深水埗福榮街是一條食街，幾乎人人都知！但文記車仔麵你又試過未？麵底、配菜選擇多之餘，兼且質素有保證！牛腩淋、魷魚爽、蘿蔔甜……加上豉油味超香濃的瑞士雞翼，一個字講晒，正！

 

地址：深水埗福榮街121號地下

 

 

4. Owl's

推薦美食：天鵝絨泡芙

 

（圖片來源：IG @littletravelgirl）

 

　　提到手工雪糕店Owl's，最受網友歡迎的產品一定是天鵝絨泡芙！紅色的泡芙，夾著香滑的Gelato雪糕，還混入了士多啤梨玫瑰醬和天鵝絨蛋糕，單是賣相已非常吸引，咬下去更外脆內軟，滋味十足！

 

地址：尖沙咀麼地道32號地下

 

5. 十八座狗仔粉

推薦美食：狗仔粉、火鴨翅

 

（圖片來源：IG @ linnnn_923）

 

　　麵條僅短短的二至三吋長度的狗仔粉，看起來雖然平庸無奇，但口感軟身，吃起來類似烏龍麵。十八座的狗仔粉以及超級濃湯為特色，加上蝦米、菜脯、豬油渣等配菜，非常滋味。火鴨翅也是另一熱門推介，每一口翅盡是鴨絲，更夾雜著爽脆的木耳絲，口感相當豐富。小編馬上同你精選2間24小時營業的十八座狗仔粉，等你幾時都可以食到！

 

地址：（佐敦店）佐敦寧波街27A地下

　　　（元朗店）元朗建業街59號

 

6. The Butchers Club Burger

推薦美食：The Burger

 

（圖片來源：IG @lydi_aaa）

 

　　在港島區擁有數間分店的The Butchers Club Burger，一直以高級牛扒招攬寫字樓客人。傳統口味The Burger雖然size細細，但材料豐富，除了傳統必備的酸瓜、蕃茄、芝士及煙肉，還有火候控制剛剛好的牛肉餅，表面煎得焦香、中心依然保持嬌嫩的粉紅色！

 

地址：（中環店）中環士丹利街82號地舖

　　　（灣仔店）灣仔蘭杜街2號麗都大廈10號地舖

　　　（鰂魚涌店）鰂魚涌華蘭路12號惠安苑地下

 

 

7. 千色車仔麵

推薦美食：豬紅、蘿蔔、魚蛋

 

（圖片來源：IG @ bon_appetit_hk）

 

　　千色車仔麵已有38年歷史，多年來能夠贏盡食客口碑，全靠用料新鮮。不少網友試過都大讚其豬紅、蘿蔔、魚蛋、魷魚等煮得入味！

 

地址：荃灣兆和街49號地下

 

8. 第三代肥仔小食店

推薦美食：雞腎、豬腸、大墨魚

 

（圖片來源：IG @ blueblue_pink）

 

　　滷味未必人人敢食，但第三代肥仔小食店的雞腎、豬腸、大墨魚卻極具人氣，味道仲同親戚店「肥姐小食」不相伯仲！

 

地址：尖沙咀厚福街3號華博商業大厦G1地舖 

 

9. 合益泰小食

推薦美食：腸粉、燒賣

 

（圖片來源：IG @ chilingippp）

 

　　合益泰的腸粉出名軟滑帶有米香，加上混合豬油的花生醬，十分美味。記得要試埋燒賣喎，粒粒都餡料充實！

 

地址：深水埗桂林街121號地下

 

10. Joyful Dessert House

推薦美食：芒果拿破崙、燒菠蘿雪葩

 

（圖片來源：IG @caraxfoodie）

 

（圖片來源：IG @hoyin28）

 

　　在旺角吃飽飯，最好就是在附近吃個飯後甜品！ Joyful Dessert House的芒果拿破崙、燒菠蘿雪葩均是網友們的大熱推介呢！

 

地址：（旺角店）旺角黑布街74號藝興大廈地下2及3號舖

　　　（銅鑼灣店）銅鑼灣駱克道464號鑽石大樓地舖

 

　　香港地，一講起做飲食業，無論經營者或食客，皆多唉聲嘆氣。前者呻人工材料舖租樣樣貴，根本冇得做；後者呢，同樣呻樣樣加價服務差劣點解唔北上？

 

　　究竟這個是否真像？我肥碌觀察，中咗八成左右啦。剩返兩成，並非如此，反見有食肆日日排長龍兼訂位要三個月至半年！

 

　　隨便舉例，灣仔浙江軒，樂富海鱻城，以及，近日家中「排骨仔」介紹為父的生煎包點心專門店，全部旺到爆。

 

　　香港人口高速老化， 六十歲以上長者邁向三百萬 ，佢哋喜歡乜？十之七八喜歡「懷緬過去常陶醉」。就似小弟，搞親飯局，個個老友都話最好歎懷舊菜，愈舊愈好，若搵到已經消失的菜式更佳。

 

　　前排在九龍家全七福，正正試到瀕臨絕種的雞子戈渣，難做到飛起，長者為食鬼一入口，便話真係神仙企唔穩。

 

　　好嘞，更多兩蚊雞族鍾情的，當然是飲廣東茶，歎其一盅兩件。不過咁，隨著樣樣成本高漲，不少「飽肚」點心，漸趨消失。經營飲食業老友呻：「碌Sir，你估我哋想咩，若個個嚟整個雞球大包、臘腸卷又或懷舊糯米雞，一塞就飽，拍拍屁股走人，咁我哋賺乜呀？」

 

　　唔係冇人想食，係形勢所逼，唔賣！

 

　　講返間生煎包專門店，有乜咁吸引，要排隊？第一，客人如潮，故點心流轉快，全部新鮮出爐；第二，價錢平民化；第三，最重要，不少流失了的點心，呢處有。例如：懷舊雞球大包、鮮蝦腐皮卷、豬膶腸粉、乾蒸牛肉燒賣、梅菜扣肉包⋯⋯

 

久違了的豬膶拉腸粉、雞球大包及乾蒸牛肉。

 

　　而此店招牌，正正是生煎包，非常誇張，每份三大個，只賣三十蚊，幾乎枱枱食。分量好勁，你吞一個，必飽咗大半！

 

招牌生煎包$30 ，三大隻，吞一隻已經半飽。

 

　　是日，我只與老婆大人兩位殺去，盡量叫，食唔晒打包，也只能點六款點心，已經「肚滿腸肥」。去時為上午十一點，仍然人潮如湧，有的是一家大細，有的是師奶買完餸，也有的是提早午餐勞動工友，迫爆，從冇一張空櫈。

 

整個上午座無虛席。門外則有條小人龍。

 

　　嚟呢類食肆，絕不可要求食得寧靜、坐得舒服、事事衛生、招呼週到。

 

　　總之，未來前清楚自己要乜，有位就即坐低即劃點心紙。點心上枱快歎（因人人都趕），你點好意思細嚼？套用廣東術語——唔該o趙完鬆，俾位下個客。

 

　　總結，點心新鮮熱辣好味，Value For Money，旺得有理。

 

蝦餃、潮州粉果及雞紥等例牌點心也「靚仔」。

 

　　但最大弊端，店內冇洗手間，要出街市公廁，真真大鑊，因呢個公廁，也百份百「懷舊」，五六十年代裝修及味道有齊，好惡頂也。

 

食一半，打包一半，埋單拜拜。

 

生煎包點心專門店

地址：何文田忠孝街六十號愛民邨熟食店一號

電話：2363 1968