【今年減價更抵玩！】AIA歐陸嘉年華2016「必玩」機動遊戲
#xmas2016 #本地玩樂 #樂園攻略嘩嘩嘩，一年一度的AIA歐陸嘉年華返來了！最重要的是今年遊戲竟然大減價！大部分機動遊戲只需$30至$60，較去年的$40至$100抵玩，而且攤位遊戲都只是$20，減幅相當吸引，你又怎可以錯過呢！
今年嘉年華引入了3款新遊戲，其他熱門機動遊戲就照舊，總共有33款咁多，無論大人、小朋友，甚至喜歡挑戰刺激的朋友都一定有心水選擇啦！
除此之外，當然少不了攤位遊戲贏公仔，34款大小攤位遊戲，一百萬個毛公仔等住大家，包括Dreamworks最新動畫電影《Trolls》、漫威（Marvel） 角色、《芝麻街》、《小小兵》、《超級瑪利歐兄弟》等卡通人物。
另外，大會更設全港最大的戶外真雪溜冰場，新設的3D奇幻館及3D立體彩燈園區，咁多遊戲，花多眼亂，究竟有邊款機動遊戲必玩？又有邊個攤位遊戲最易贏到公仔？又有咩影相位？
等小編你精選今年「必玩」機動遊戲，以及教大家攤位遊戲「贏公仔」的攻略啦！
下頁睇 最「嚇到你心離一離之」的４大機動遊戲
最「嚇到你心離一離之」的４大機動遊戲：
今年AIA歐陸嘉年華引入了33款來自歐洲的機動遊戲，包括人氣高企的海盜船、Big Splash激流飛船，以及360度高速飛轉的「Mach5」亦會重臨，不過刺激的機動遊戲與上年都沒有差別，若果你對上一年的機動遊戲念念不忘，就一定要把握機會再挑戰啦！
1. DAS DUN SCHIFF極速巨浪海盜船
如果你以為只是普通海盜船咁簡單，你就太天真了，小編正正以為「小兒科」，就登船挑戰，誰不知呢隻海盜船，上到最高處有差唔多20米高，整隻船近乎垂直，成個人就好似企咗喺度咁，離心的衝擊近乎跳樓機！
驚嚇度：★★★★☆
2. 「水花四濺」Big Splash激流飛船
喜歡玩水又不怕濕身的朋友必定要玩！玩Big Splash的初段，坐著緩緩上爬的小木船，可以飽覽維港的美景，接下來一轉彎，小木船就極速下墜，離心力不小，一瞬間濺起的巨大水花，保證全濕，不過要小心再吹海風會感冒啊！
驚嚇度：★★☆☆☆
3. 360度高速飛轉的「Mach5」
全場最刺激的機動遊戲必數「Mach5」，以時速高達110公里不停360度旋轉，高速地將你不斷拋上高空重覆旋轉，離心力強勁，往年經已被封為「最玩命系列」！小編形容為「來回地獄又折返人間」，只敢遠觀腳軟。膽識過人的你，絕對不能錯過！
驚嚇度：★★★★★
4. 「睇景一流」飛天鞦韆
睇落其實都幾高，而且轉得又急又快，感覺成個人飛出去大海一樣，不過就沒有離心力，又可以看盡嘉年華園內靚景，以及維港景色，對於喜歡居高臨下以及速度感的朋友來說，都是一個不錯的選擇！
驚嚇度：★★★☆☆
自問不是膽識過人的你，一樣有機動遊戲啱玩！
下頁介紹 輕量級機動遊戲！大人小朋友都啱玩
1. Super Giant Slide巨人滑梯
這座充滿馬戲團色彩的高塔，上年都有嚟玩的朋友一家非常熟悉！行入去之前，首先要拎一張草氈，然後就可以進入塔內，行樓梯到塔頂，最後當然係沿著高塔的外圍瀡落嚟啦！
好玩度：★★★★☆
2. Doggems碰碰車
無論去到邊，碰碰車都一樣係咁受歡迎！大家一上車就可以一嘗橫衝直撞的快感，全程笑不停，個心就淨係諗住點樣喺車群中撞嚟撞去，又唔危險，真係好好玩！
不過人龍都頗長，想玩就要給點耐性了！
好玩度：★★★★★
3. Fun House逃出機關屋
Fun House是一個室內闖關遊戲，外型是仿德國巴伐利亞的家居建築，大家進入後就在屋中穿梭行走，入面有多個機關，每一步都會遇上不可預測的機關！
好玩度：★★★★☆
AIA歐陸嘉年華
地點：中環海濱活動空間
日期：2016年12月16日 - 2017年2月12日
成人：港幣125元 (包10個代幣)
小童 (3-11)或殘疾人士：港幣90元 (包7個代幣)
年齡3歲以下，65歲或以上長者免費入場
*另設入場門票港幣35元 (不包代幣) 。每一個代幣為港幣10元。
*今年嘉年華以電子代幣代替實體代幣，入場後須為代幣卡充值以支付遊戲攤位及機動遊戲