世事政情

　　【晴報專訊】著名音樂人伍仲衡將於下月16日、17日假九展Star Hall舉行兩場《伍仲衡再搞花臣音樂會》，今次伍仲衡邀請了不同年代的歌手獻唱，當中包括《聲夢傳奇》學員鍾柔美（Yumi）及冼靖峰（Archie），三人日前齊集在伍仲衡母校聖芳濟書院受訪，齊齊分享在校園的百厭經歷，有人走堂，有人帶食物上班房「偷食」，少少曳又不失搞笑。

 

 

　　繼今年三月《伍仲衡搞乜花臣音樂會》後，今次《再搞花臣》音樂會將移師到九展舉行，八成半座位約有近3,000名觀眾，演出嘉賓由80年代歌手橫跨至00後樂壇新星。伍仲衡透露今次邀請了很多新朋友參加，「有一半嘉賓都係新嘅，例如林志美、泳兒、吳業坤同劉威煌，佢哋上次無嚟。有人問我點解唔請我嘅女神周慧敏，佢喺我嘅騷出現都唔係乜嘢驚喜，上次啲粉絲話一啲都唔神秘，估都估到佢會嚟。今次神秘嘉賓大家都估唔到？到時大家咪知！」伍仲衡今次更成功撮合跳唱組合EO2屆時「合體」演出，四子揚言要教伍仲衡跳舞，伍仲衡笑言：「我都好期待自己跳舞，玩下咋嘛！」

 

Archie戒食炸雞護聲

 

伍仲衡與兩位新世代全無代溝，他與鍾柔美搞笑扮「乖學生」，冼靖峰則上堂「恰眼瞓」。

 

　　談到邀請鍾柔美和冼靖峰兩位年輕歌手擔任嘉賓，伍仲衡對兩人有讚無彈，「Yumi跳舞好叻，一睇佢跳舞就知佢唔單止後天努力，佢血液裏面一定有呢種細胞，扭一扭已經感覺到佢好有天份。至於Archie嘅唱功更加唔使講，我揀咗一首難度好高嘅歌畀佢唱，要不斷升key，所以有一個環節畀佢solo。」Archie聞言表示會努力練歌，亦會戒掉最愛吃的炸雞，力保靚聲。

 

冼靖峰被鍾柔美「擇名」罰留堂，在班房玩得不亦樂乎。

 

　　是次訪問選在伍仲衡的母校進行，畢業超過30年的他，跟母校關係十分要好，雙方經常在音樂上合作，「我中二已經開始寫歌，作歌畀同學玩歌唱比賽，但80年代無卡啦OK，歌唱比賽一定要有人彈鋼琴，所以基本上全校嘅歌都係我彈，男校無人唱女仔歌，無論譚詠麟、張國榮或陳百強嘅歌都係我彈，我啲音樂造詣就係喺呢度練番嚟，彈到肌肉有晒記憶。」期間，三人分享讀書趣事，伍仲衡率先自爆，「我成日走堂，因為聖經堂好悶，我就會偷走，去禮堂彈琴，點知老師發現唔見咗我，後尾記一個小過；但我一彈琴就好享受，係琴癡。」

 

Yumi擅闖音樂室高歌

 

鍾柔美十分重視每次演出，希望汲取更多舞台經驗。

 

　　至於Yumi同樣百厭，趁小息時偷偷去音樂室練歌，「我小息嗰陣好鍾意去音樂室，因為無人會理，電腦又開住，我同同學會開住YouTube，播住歌係咁唱，試過被老師捉，話我擅闖音樂室，又立亂用佢哋啲嘢。」而Archie則自爆小時候十分為食，每次小息都會購買大量食物醫肚，有次買了太多吃不完，老師就讓他拿回班房繼續吃，「班房唔畀食嘢，但同學見到就每人行埋嚟食一啖，到最後被人食晒，我決定以後唔會攞食物上班房。」

 

 

　　《中年好聲音2》其中18位參賽者舉行一連兩場的《中年好聲音2隆重登場慈善演唱會》早前開鑼，全場爆滿，18位參賽者的粉絲都各自為偶像準備應援區，供粉絲們打卡留念，令伊利沙伯體育館非常熱鬧。除了《中2》其他的108強參賽者到場支持外，《中年好聲音》大家庭的周吉佩、羅啟豪、李佳、肥媽、周國豐、伍仲衡、張佳添等都有捧場，場面星光熠熠。

 

 

 

 

 

　　《中年好聲音2隆重登場慈善演唱會》早前在伊館上演，18位參賽者包括古淖文、譚輝智、顏米羔、黃劍文、沈宗賢、陳俞霏、安雅希、陳燕娜、劉威煌、甘永傑、林若盈、梁浩賢、鄭梓浩、劉可、王學琳、陳蒨葶、王玥及尹新杰施展渾身解數，輪流登台演唱。譚輝智的爸爸媽媽、安雅希的媽媽愛女都有在台下睇騷，18位之中，最令人驚喜的絕對是黃劍文，一向是抒情歌擔當的他，今次勁舞連場掀起氣氛，見劍文跳得有板有眼，原來只得大約十日時間排練，相當不容易。而劍文聯同陳蒨葶和林若盈的音樂短劇中飾演渣男，周旋在三角關係之中，期間他從後攬實林若盈，但又跟陳蒨葶跳熱舞，最終兩人台上激吻，引起全場嘩然。而同樣「激」的有顏米羔加上古淖文合唱《芳華絕代》，兩人造型妖味沖天，一邊唱一邊互摸身體，睇到觀眾們熱血沸騰，最終兩人當眾咀嘴，尖叫聲不斷。

 

 

 

　　「人氣王」譚輝智都有不少粉絲舉牌支持，當他獨唱時的尖叫聲最大，而他亦非常識做，邀請兩位「姐姐級」粉絲上台聽他唱歌，伸手拖住對方發放「電眼攻勢」，相當厲害。而輝智除了大唱《歸來吧》、《抉擇》等參賽歌曲外，少不免就是挑戰快歌《屈到病》，他獨特的舞蹈喜感，令在場觀眾夾雜笑聲和歡呼聲，睇得相當投入。而輝智與最後六強的參賽者走落台跟觀眾握手時，輝智走到「超級粉絲」拉姑狄波拉身邊，即時握手又合照，興奮莫名。

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

　　完騷後，古淖文、譚輝智及顏米羔接受訪問，他們表示家人都會分別在兩場演唱會捧場，輝智笑言：「爸爸坐得好後，冇辦法啦Budget唔夠！仔女就因為太細個喇，睇騷好夜，所以冇叫佢哋睇！」而顏米羔甫出場獻唱時，見到台下的媽媽心情激動，他都不敢要望住媽媽唱歌，怕流下男兒淚失禮，而古淖文的父母尾場會由澳門來港捧場。古淖文一身強勁肌肉，但演唱會卻「守身如玉」，他表示：「大家唔好睇我以為大大嚿，其實係水腫，我呢排忙綵排，根本上完全冇時間做Gym，所以梗係唔會除衫啦！」顏米羔摸勻阿古全身，他笑言沒有真摸，只是舞台效果，「我哋係真錫，不過我錫我手指公（借位），（黃劍文真錫！）吓？佢兩個真錫咩？勁喎！」身旁輝智即時「食花生」：「真錫？咁我覺得應該要交換，我都可以犧牲一下！」

 

 

 

 

 

 

 

 

 

 

 

 

 

 

 

 

 

 

 

 

 

 

 

 

　　至於黃劍文今次超突破演出，他表示都是跟導演指示，「本身決賽跳完舞，佢哋都覺得應該可以繼續跳，但我冇諗過係Medley，原來扮郭富城真係好辛苦！其實我一直都好想做唱跳歌手呀，今次終於可以喺舞台上圓夢！」提到錫錫陳蒨葶，他表示劇本原來寫法沒有吻戲，不過經過不斷更改後，兩日前有這個決定，他們綵排時都有「真錫」，沒有尷尬，但陳蒨葶笑言：「我冇乜所謂，不過係驚出唔到呢個伊館門口。」劍文笑言：「我已經事前話畀粉絲聽係劇情需要，但佢哋好激動，話根本冇需要！（一地玻璃碎？）冇辦法啦，今次係熒幕初吻，7年前原本錫過一次不過冇出到街。」而音樂劇中慘被背叛的林若盈笑言為投入角色，綵排時換上手機熒幕成兩人劇照，心裡常常罵他是「渣男」傷透她的心。