世事政情

　　【晴報專訊】即將推出賀年歌的陶大宇，早前接受YouTuber希比訪問時盡訴心中情。大宇分享翻唱《倒轉地球》爆紅的感受外，更感慨指97年離開無綫後，才出現台慶頒獎禮，令他與視帝獎項擦身而過，「遺憾係有，但無辦法，做人要講timing。」

一向玩得的大宇，在訪問中重演《心花放》中的招牌掩面動作。(網上截圖)

　　無綫的台慶頒獎禮源自97年的《萬千星輝賀台慶》，當時節目中有一個頒獎禮環節，頒發最佳男主角、最佳女主角及最佳劇集等，首屆視帝、視后分別為羅嘉良及關詠荷。由於觀眾反應熱烈，無綫逐漸增設獎項，並獨立發展成為一年一度的大騷。日前大宇回港，抽空接受不同本地媒體訪問，他接受YouTuber希比專訪時，激罕大談自己從未贏過視帝的感受。片中，希比表示有網民問及大宇在無綫多年從未贏過視帝，這位90年代師奶殺手大方回應︰「我個年代無乜嘢頒獎禮，當時係有遺憾，但無辦法，我記得1997年回歸當日同無綫約滿，隔咗一陣間就搞頒獎禮，做人要講timing，我拍劇為娛樂大家，有獎就錦上添花。」

回憶與黎耀祥同撈同煲

大宇在訪問中無所不談，戲言黎耀祥比自己賺得多。(網上截圖)

　　大宇強調現時與無綫關係不錯，否則去年尾身在內地時，也不會助陣《歡樂滿東華》隔空高唱《倒轉地球》。對於黎耀祥（祥仔）早年曾在訪談節目公開感謝大宇帶他登台吸金，大宇笑稱︰「無咁嘅事，祥仔無窮過。」他回帶指拍亞視劇集《影城大亨》時與祥仔日對夜對九個月，大家感情好又啱傾，那時大宇開始有商演，於是找祥仔一起北上工作，酬勞一人一半。大宇笑言︰「唔好以為佢好窮，佢買豪宅、買靚車，亦係重情重義嘅人。」此外，提到其代表作之一《大時代》，大宇坦言現時已無法再演劇中「丁益蟹」一角，因角色霸氣又有火，需要大量體力，他笑言自己已非當年的小鮮肉。

大宇前晚亮相《東張西望》，更應承林淑敏客串《愛•回家之開心速遞》。（FB圖片）

　　【晴報專訊】陶大宇前日在微博上載與吳啟華、張兆輝拍演唱會海報的照片，原來三位「師奶殺手」將於11月中合體假佛山開騷。大宇接受本報訪問，豪言必唱「飲歌」《倒轉地球》外，又透露三人不止唱歌咁簡單︰「我哋有遊戲、互動同小品劇，開開心心做場騷！」

陶大宇、張兆輝、吳啟華合作開騷，粉絲高呼「回憶返晒嚟」。（微博圖片）

　　三位90年代無綫當家小生，今年初重返無綫任《萬千星輝頒獎典禮2022》頒獎嘉賓，陶大宇、吳啟華及張兆輝的出現勾起觀眾集體回憶，重提他們的角色，包括《刑事偵緝檔案》張大勇、《倚天屠龍記》的張無忌及楊逍；不少網民期待他們合作拍劇，可惜至今未有聲氣。不過，近日他們合體拍攝海報，預告在11月中假佛山舉行演唱會。前日，大宇在微博上載他們拍攝演唱會海報的花絮，只見三人穿上黑西裝，打扮型到爆。內地網民紛紛留言表示準備搶飛，又指「好期待大宇哥的首場演唱會」、「期待倒轉地球」、「建議全國巡演」。

早前華仔開生日派對，大宇和壽星仔「世紀同台」。（資料圖片）

嘆幾十歲人拒騷肌

　　大宇接受本報訪問時，透露三人屆時有不少表演，「我哋又唔係完完全全淨係唱歌，當中有遊戲、互動同小品劇，開開心心做場騷。因為大家都認識咗幾十年，又拍咗咁多經典港劇，想搵個機會當係紀念！」問到三人有甚麼開心回憶？大宇稱︰「以前大家都唔成熟，但又要扮大個，做一啲有型嘅角色。（到時會否騷肌？）大家都幾十歲，而且又唔係真正歌星，唔會騷肌喇！」

　　談及他近年因翻唱劉德華金曲《倒轉地球》而成為網民寵兒，屆時可會再次演繹這首金曲？大宇笑說︰「一定走唔甩啦，到時我哋會唱四、五首歌，仲有啲合唱歌。」大宇早前在華仔的生日派對同台合唱《倒轉地球》，他開心說︰「我好榮幸參與，當時感覺真係好夢幻。」