世事政情

　　【晴報專訊】明天便是農曆年初一，《聲夢傳奇》四小花炎明熹（GiGi）、姚焯菲（Chantel）、鍾柔美（Yumi）及詹天文（Windy）應本報邀請，在虎年來臨之前，親手繪畫老虎畫及揮春，預祝讀者龍精虎猛、虎年行大運。其中GiGi分享了最難忘的農曆新年，自爆某年回鄉玩炮仗時不慎被炸傷手，令其他小花為之譁然。

《聲夢》四小花畫虎揮春向讀者拜年

　　去年組成女團「After Class」的四小花，唱而優則演，除了推出新歌，又拍攝劇集《青春本我》作雙棲發展，可謂事業大豐收。四人除了唱歌和演戲，畫功方面亦備受考驗，皆因她們要齊齊揸住毛筆畫老虎，首次公開繪畫及寫揮春的GiGi、Chantel、Yumi和Windy，創作過程中笑料百出，不擅寫毛筆字的Yumi執筆姿勢像揸筆，右手更沾到墨水，要四處問人拿紙巾抹拭，又不斷偷望其他人攞靈感。

姚焯菲自誇有藝術細胞

Chantel（右二）一臉浮誇大讚GiGi（左二）的老虎畫得漂亮，令GiGi哭笑不得。

　　GiGi畫功公認最了得，但她連自己的名字亦寫錯，最後更要「塗鴉」改錯字。Chantel發揮最平穩，老虎畫得靚，寫揮春時亦創意十足，難怪她沾沾自喜︰「我真係好有藝術細胞。」畫作最稚嫩的Windy，被取笑畫功程度只達幼稚園，她在老虎頭兩旁畫了兩筆「風」，並笑着解釋︰「畫風係因為我叫Windy，哈哈！」之後寫揮春時又寫錯「年」，難怪她自嘲︰「我隻老虎畫到好似老鼠同兔仔混合體。」雖然四人烏龍百出，但創作時十分認真，絕對誠意可加。

親手煎糕答謝工作人員

　　今年是四小花入行首個度過的農曆新年，礙於疫情及限聚令，未能舉行大型團拜，不過窩心的四人正計劃親手下廚煎賀年糕點給身邊工作人員品嘗，感謝他們過去一年勞心勞力的照顧。GiGi表示︰「上年聖誕節我哋實行咗個大計劃，就係派啲曲奇餅畀幫助過我哋嘅工作人員，成個公司都差唔多派晒，入面寫住我哋嘅心意，係非常之有意義嘅事。新年我哋可能親自煎年糕或蘿蔔糕畀大家食，所以唔一定派利市，但如果我哋派到利市嘅話，咁大家唔使擔心喇，代表我哋有收入。」

（左起）Yumi、Windy、Chantel及GiGi異口同聲表示會將利市錢儲起。

　　提起過往最難忘的新年？GiGi稱小時候會跟家人回鄉拜年，最興奮是可以燒炮仗，她手舞足蹈表示︰「唔同炮仗有唔同玩法，各式各樣都有，非常好玩。有次玩炮仗時，掟遲咗個炮仗落地，佢就喺我隻手上爆咗。」身旁三人不禁嘩一聲，GiGi續說︰「但又唔係好痛，正所謂初生之犢不畏虎，所以唔係幾驚。」

今年因疫情未能回鄉過年的GiGi，最懷念家鄉的濃厚節日氣氛。

　　疫情下未能回鄉過年，GiGi坦言十分失望，「好懷念過年時嘅氣氛，尤其放炮仗就知道係過年，成條村都會放，非常熱鬧，好想可以快啲返去探吓啲屋企人。」Yumi、Windy和Chantel自言過往新年十分平淡，都離不開跟食有關，最愛吃湯圓和年糕，笑言過年有藉口讓自己大吃一頓；Chantel則會穿上旗袍向家人拜年，又會替家中寵物穿上新年服飾。

Chantel新年期間最愛吃湯圓和年糕，她笑言︰「我樣樣都想食，除咗唔食得之外。」

　　《聲夢傳奇》出身的姚焯菲（Chantel）到新西蘭讀書後，自覺成長不少，近日推出新歌《初心小島》，原來今次歌曲的主題由她親自發辦，更大膽向唱片公司說「不」。Chantel認為入行幾年來的急促成長，回不去童年，亦不太想急於做大人，希望憑歌記錄此時此刻的自己，為同年齡層發聲。至於情歌，她笑言仍未能拿揑得最好，但現時不急於拍拖，因為光應付學業和工作已忙到喘不過氣。

（本網圖片：何家賢攝影）

（本網圖片：何家賢攝影）

（本網圖片：何家賢攝影）

　　Chantel坦言收到《初心小島」的Demo時，公司已經準備好為她打造情歌，但她卻大膽提出反對。「Demo其實好有韓劇主題曲嘅感覺，佢哋想填情歌，但我就反對，我覺得呢個世界太多情歌，同其他歌手比起，我唔覺得有咩帶到出嚟或者可以勝過其他人，所以我就將聽到呢個Demo嘅最深感受講出嚟。」她坦言自從在新西蘭升學以來，壓力好大，讀書生活帶來很大的抑壓，很想盡快成長，但又預視到長大會好辛苦，所以決定將這個複雜感受放入歌曲，「《初心小島》就係我細個嘅自己，無憂無慮嘅我，想食咩就食咩，想玩咩就玩咩，係一個好開心嘅小島。大人好多嘢要顧慮，金錢、人際關係...總知好多問題要處理，而家我返唔到細個嗰陣，又唔想大個，好開心填詞人接受我呢個諗法。我覺得自己今次都少少大膽，拒絕公司唔想出情歌，情歌等大少少先，趁青春期記錄呢個感受，14歲出道嘅人唔多，出歌曲希望貼近自己多啲。」

　　回想起自己《初心小島》的時期，Chantel認為是中三的時候，當時正值COVID的時候，「返學只係用Zoom，想食咩就咩，冇得出街但都好開心，同朋友一齊電腦打機一齊聽歌，個感覺好Chill。（後悔入行？）有時會後悔，成日諗如果冇入行會點呢？可能我《初心小島》嘅時間會逗留得耐啲啲，但我都好開心早啲接觸呢個世界，令我要隻身去新西蘭讀書就冇咁焦慮，冇咁易喊，呢一行令我急促成長，令我接受好多新鮮事物，同時間我失去好多童真同純正。」Chantel坦言朋友仍在，但事實上有部分已經不如以前老友，「有個好朋友冇再搵我，我問佢點解，佢話驚我入行會變，咁我問佢覺唔覺得變咗，佢話有少少但冇想像中咁大！」

（本網圖片：何家賢攝影）

（本網圖片：何家賢攝影）

（本網圖片：何家賢攝影）

　　Chantel在新西蘭的時間學習自主，不再依賴家人，不過要應付學業，又要往返香港工作，難免吃力。「一定有思鄉病，曾經有一次去圖書館上堂，大家自修，我聽住音樂頂唔住衝出去廁所喊15分鐘先返，好多情緒，掛住屋企又準備緊考試，忍唔住就崩潰。」她預計今年不會太密返港，因為每次離港的心情都特別難受，她亦要慢慢在當地建立自己的社交圈子，「捱埋去囉，上到大學應該冇咁辛苦，大學都考慮緊幾個唔同地方升學，未有決定。爸爸好支持我，鍾意讀邊間就邊間，最緊要入到好嘅大學，同埋話畀大家知，我唔係淨係唱歌，我學業都一樣可以兼顧到。讀大學最重要嘅係希望我成為有修養嘅人。」

　　情歌將來絕對避不了，問到是否會多拍拖增加戀愛經驗？Chantel笑言：「18歲先啦，中學畢業先啦，而家真係好忙，（咁追求者點算？）Reject晒，哈哈哈，講下笑啫，身邊好多男仔朋友，我覺得男仔好似易相處啲！我有少少男仔頭，而家唔急拍拖，因為太忙真係冇時間，拍拖好煩呀，唔想理咁多先，畀我讀埋個書先。（戀愛腦？）我覺得我係，所以想專心一樣嘢先，完成目標，大家大學先再搵我！」

髮型：Hugo Poon @private i salon

化妝：King Yip, Bingo Chan @Kings Makeup