世事政情

　　【晴報專訊】鑽石山荷里活廣場日前發生斬人案，兩名女子遭一名男子持魚生刀斬死，慘劇轟動全港。一向愛抽水的林作，日前在IG上載與疑兇打扮相似的照片，聲言放售與疑兇同款的波鞋，遭網民狠批冷血。林作及後雖然刪帖，但有網民揚言向保監會投訴，並表示不幫襯他所任職的保險公司保誠香港。昨日保誠發聲明與林作割席︰「保誠知悉有個別理財顧問於社交平台就近日的社會悲劇作出不當言論及行為，這與我們公司的價值觀背道而馳。此個別理財顧問的言論及行為絕不代表保誠立場。經過內部調查後，公司已決定與有關理財顧問終止合約。」

林作以命案疑兇的打扮抽水，備受各界批評。（FB圖片）

　　林作昨日接受本報電話訪問，直認被保險公司解僱︰「我都係今朝早（昨晨）收到公司電話，係最高層搵我，咁我都尊重公司決定，亦無問任何問題，都估到係咩事，我依家無官一身輕，可以做番自己，向極端嘅網民挑機。」

林作表示旗下有80人團隊跟他「搵食」。（FB截圖）

　　他表示現時盡快安排旗下80多位員工的去向及交接事宜，問他會否過檔其他保險公司？他回應︰「我未有任何諗法，但林作保險顛覆保險業，林作保險長存。（後悔留言抽水？）絕對無後悔，呢個係林作本色同特色，我喺保險業界比任何人都有價值，反而畀更多了解我嘅人，更了解同支持我。呢次事件好似滑浪，風浪愈大，滑嘅浪愈靚，今次係我人生暫時遇過最大嘅風浪，但我關關難過關關過，我都過到，總之就係小菜一碟啫！」

　　麥明詩（Louisa）同盛勁為昨日舉行第二場婚禮，廣邀親朋好友，當中有唐詩詠、曾俊華、黃德斌、戚其義、林正峰，翁嘉穗以及其夫鄔友正；另外仲有江美儀、陳庭欣、吳業坤、戴祖儀、劉佩玥、鄧卓殷同郭子豪，不過最爆嘅就係佢邀請咗前度林作嘅媽媽王莉妮到場。

　　王莉妮表示係麥明詩請佢嚟，大方接受訪問，妙語連珠，佢表示同麥明詩一直保持友好關係，仲會不時見面：「做唔到新抱做契女，有時都約出嚟飲茶傾偈。」王莉妮話婚禮前已經以「前度媽咪」身份見過盛勁為，指三人都冇尷尬，仲大讚盛勁為：「好靚仔、好有型、好有擔當，好開心Louisa搵到幸福。（個髮型呢？）型過我個仔，我個仔個頭撐嚟撐去，（盛勁為）又夠高，比起嚟我個仔……哈哈，唔係話踩我個仔，一比起嚟呀盛……」

　　王莉妮又大嘆覺得好婉惜：「我之前一味想箍煲，用咗好多方法，之前娛樂圈都好多啦，鄭秀文7年、8年後復合，我都帶有希望可唔可以返嚟，足之都唔得啦！嗰時未來奶奶……做唔到新抱，只能夠祝福，做唔到新抱做契女，佢（Louisa）都話好開心。」被問到點解今日林作冇到，王莉妮就大笑：「冇人邀請佢嚟喎！佢有同我講：『你玩得開心啲啦，祝Louisa新婚快樂，早生貴子。』」

　　王莉妮講到幾時到佢做奶奶，佢就話自己都好想，唔想林作養狗，想快啲抱孫。王莉妮又話有時啲嘢要睇開啲，自己已經開始接受裕美：「開始接受到，自從我仔入院。」被問到幾時好日子，佢就話想今年內娶新抱：「Louisa完咗（結完婚），我又度下，到時我個仔結婚我又請Louisa去。」但講到裕美有幾多分時佢就有啲猶豫：「慢慢嚟啦，我舊年8月先開始接受。」而林作事業方面，王莉妮都指佢開始上軌道，唔使經濟資助佢，仲會問番佢有冇錢使，o氹到佢好開心。

　　問到王莉妮今日預備咩禮物畀Louisa，佢又忍唔住「爆」：「送紅包最實際，同埋用心寫咗好多嘢。Louis好乖女，之前都寫好多嘢畀我，呢世都留喺心，保存喺我手機好遺憾……佢真係好乖，如果做到我（新抱）今日就係……唉……唔可以再講喇要收口，祝Louisa新婚快樂、永結同心、早生貴子，多謝大家！」

　　林作幾年前曾與母親王莉妮為香港開電視節目《搵陣》任嘉賓，林媽媽希望兒子可以找個門當戶對的人，蘇師傅贈言林作命格要找強悍女人，不能小鳥依人，林母聞言即有所領會說：「咁我知喇！緣分嘅嘢可能兜兜轉轉都會返嚟。」林媽媽一直都對麥明詩念念不忘：「唔開名，總之呢啲嘢好難講，我好相信有嗰一日，總之佢翻兜或另結新歡兩個方案我都接受，佢以前啲女朋友我個個都夾到。師傳幫忙擺個桃花陣，幫我搵返個『好新抱』！」