世事政情

　　【晴報專訊】無綫處境劇《愛‧回家之開心速遞》收視高企，劇中的「送水輝」許家傑與「龍力蓮」林淑敏是恩愛夫妻，但現實中許家傑卻被爆戀上「秘書Elaine」李芷晴。有周刊拍得許家傑與李芷晴拍拖睇戲，昨日許家傑回應本報時否認戀情，強調雙方只是朋友；李芷晴亦表示視男方為前輩。

許家傑與李芷晴屬俊男美女，身形同樣有睇頭。（IG圖片）

　　《愛‧回家》的「送水輝」、「Elaine」兩個角色，在劇中風馬牛不相及，不過昨日許家傑及李芷晴驚爆戀情。有報道拍得二人早前到銅鑼灣一間戲院拍拖欣賞西片《調教你處男》，為避途人目光，他們先在附近撑枱腳，再前後腳現身戲院，令不少劇集粉絲大表驚訝。不過，許家傑否認緋聞︰「唔係追求佢，我哋係普通朋友，雜誌影到當日係電影優先場，好多藝人朋友出席。」他澄清當日除了自己與李芷晴外，其實還有簡家麒及何泳芍一齊睇戲。二人可有發展空間？他只表示︰「雖然我係公眾人物，不過私人生活一向都唔講，自己係演員，大部分時間投入工作，呢幾年盡力做好作品畀大家睇，做好演員呢份工。」他強調跟李芷晴是朋友，日後拍劇或朋友聚會也不會尷尬。

李芷晴讚送水輝好前輩

　　另一邊廂，李芷晴同樣否認拍拖︰「唔係呀，（許家傑）只係一個普通朋友同埋一個好好嘅前輩。發展空間就唔諗咁多啦，因為想focus（專注）番喺工作上多啲。」她表示「Elaine」一角近日在劇中加入「尋寶圖」，增加演出機會，下月亦會開拍新劇︰「我都要開始着手準備溫習劇本，暫時都係專注喺工作上，希望表現得更好畀觀眾睇。」

二人被指拍拖睇戲當日，其實尚有簡家麒及何泳芍結伴同行。（IG截圖）

　　《愛回家之開心速遞》連續三名主要演員因離巢TVB而被逼離開劇組，蘇韻姿飾演的熊心如、鄭世豪飾演的龍力士及譚坤倫飾演的CPU都先後離開，人事大地震，難免在劇情上有所改動。許家傑及林淑敏在劇中跟鄭世豪有不少對手戲，特別是大小姐跟龍力士經常都爭取成為龍家話事人，經常都鬥嘴兼背後互放毒針，過程中不時發放笑彈。

　　許家傑表示：「坦白講我都覺得係一個循環，大家都冇經歷過拍7年嘅劇集，好多演員都出出入入，已經變得一個常態，冇可能7年都係同一班人做，始終都要有新鮮感。每個人發展方向都唔同，世豪離開我哋，我當然好唔捨得，不過同時都期待嚟緊劇情上發展。」林淑敏說：「我對世豪好有信心，佢唱歌好叻，可以試吓發展唱歌事業，工作上冇得做兩姊弟啫，但可以睇佢喺舞台上發光。」許家傑指相當欣賞鄭世豪，拍劇的同時又要創作歌曲，推出多首自己的作品，既然他人生上決定去改變，一定會支持他，「既然佢喺《愛回家》做細龍生咁成功，相信佢喺出面亦可以獨當一面，歌唱方面絕對成為佢一種成就。」至於《愛回家》劇情中，大小姐同龍力士的爭接班人地位鬧到面紅耳赤，網友估計大小姐將會繼位別無他選，林淑敏笑言：「點會咁易？編劇寫咩都得，可能龍家冇啦啦多個私生子呢？講唔埋嘅。」

　　至於譚坤倫飾演的CPU同樣離開，IT部又少一個，鄧永健及孟希璘接受訪問，他們表示難免不捨，孟希璘說：「好唔捨得，我有喊，合作咗幾年，我哋全部戲都一齊呀嘛，同埋呢個角色係好特別，無論係演或者喺觀眾心入面都好特別。我出到街，大家都恭喜我升職，仲問我係咪幾皮嘢一個月，睇得好投入。雖然演員離開都幾常發生，但真係冇得慣，因為我哋每次都一齊夾戲，大家都好有火花，玩得好開心。」

　　鄧永健說：「唔捨得會嘅，上網睇到佢話會有唔同發展同嘗試，希望佢有新轉變，做到自己想做嘅事，未嘗唔係壞事。（IT部瓦解？）Mouse仲喺度，IT部唔會瓦解，我係咪會繼續做Router定Ivan就大家繼續留意啦，之後會有少少唔同嘅發展，唔可以劇透住但有少少轉變。IT部每次演出都好開心，大家夾得好好，一齊去研究點樣呈現得有趣啲，但演員出出入入係常有，始終大家仲喺呢一行，會喺唔同地方再相見，而且大家都有保持聯絡。」鄧永健在劇中飾演的Ivan，先後跟Anita（梁茵飾）、侯蔡欣（邵珮詩飾）及May（趙希洛飾）拍拖，不過三位女演員都先後離巢TVB，加上好兄弟杜大偉又因事暫別劇組，認真可憐，當建議孟希璘跟鄧永健在劇中湊成一對，鄧永健笑言：「唔好喇！同親我一齊嗰啲都走呀！」原來除了歐瑞偉飾演的KC外，Ivan都是一位感情路坎坷的可憐蟲。