世事政情

　　【晴報專訊】人生如戲，魯振順拍過許多劇集，演活各式人物，現實中的他，人生更是峰迴路轉。魯振順曾因一包香煙，「為啖氣」與父親斷絕關係；80年代，因事業失意患上抑鬱症，自殘身體令母親傷心；到近年遇上真命天女，在談婚論嫁之際，戲劇性將一切推倒重來。魯振順經歷高低起跌，目前認為生活隨心，瀟灑活出真性情就好。

　　魯振順在劇集《靈戲逼人》中飾演寵愛女兒的紙紮店老闆，他自認意外害死雲柳芳（龔嘉欣飾），但原來只是煙幕，真正兇手另有其人。現實中，魯振順過去經常飾演娘娘腔，包括代表作《笑傲江湖》的東方不敗，演出更獲金庸先生認同，不過他亦因此曾被誤會是同性戀者。事實上，他曾渴望生兒育女，擁有自己家庭，可惜年輕時遭拍拖多年的女友拋棄，令他飽受情傷。轉眼間，到了用樂悠咭的年紀，他重遇41年前在歌唱比賽中認識的Julie，雙方一拍即合，更高調表示重啟人生計劃，結婚生子；但深思熟慮，彼此已是黃昏戀，女方身體又能否應付生育？最後決定打消念頭。

在《靈戲逼人》中，魯振順（左）以為自己害死龔嘉欣，因而哭着懺悔。

在《笑傲江湖》演東方不敗，魯振順的演出獲原作者金庸肯定。（網上截圖）

自殘令母親痛心

　　魯振順說︰「想結婚但又咁啱遇上疫情，一年拖一年，驚覺大家年紀都大，體力、金錢未必應付到，其實只要身體健康，生活順遂就足夠。」他笑言二人關係變得像母子，「人生就係咁搞笑，Julie嗌我阿仔，我叫佢老母、母后、太后㗎！佢好囉唆，又話自己係我阿媽派嚟照顧我，成日當我係細路仔，啱呀！我永遠都唔成熟，到依家都鍾意睇卡通片。」他與Julie互相扶持，同居生活舒適，更養了三隻狗，家中充滿生氣，很是熱鬧。

魯振順與Julie的關係既是情侶，亦如親人。（資料圖片）

　　像魯振順般豁然開朗不容易，他也曾經歷驚濤駭浪才有所領悟。1972年，他參演TVB劇集《樂韻雛聲》而對電視圈產生興趣，預科畢業後入讀第八期藝訓班，隨後又參加華星「天才歌星訓練班」。起初發展順利，可惜後勁不繼，事業浮浮沉沉，自言是悲觀主義者的他轉牛角尖，更患上抑鬱症。1987年，魯振順收工後喝到大醉，情緒波動，突然打碎玻璃自殘身體，手掌留下深深疤痕，傷了身體，也傷了母親的心。他坦言，小時候父親行船常不在家，因此他與母親關係密切，媽媽更十分支持他的演藝工作，「我做咗嗰件事（自殘），有報道出咗街，阿媽起初以為係拍戲新聞，直至後來喺細佬婚禮上被人踢爆，阿媽好傷心，好難過，場面好痛心，當時我立即斟茶，不斷安撫佢！」

魯振順侍母至孝，回想曾令亡母傷心，他深感內疚。（資料圖片）

盡孝道彌補父母

　　至於父子關係，卻曾經十分惡劣，「老竇好唔贊成我入呢一行，佢覺得娛樂圈嘅人都係男盜女娼！加上我無人事關係，佢覺得我發展唔到，但我真係鍾意呢行，點解唔支持我呢？所以我同老竇好少傾偈，有斷層。」他曾經一時衝動，與爸爸脫離關係，「老竇鍾意食煙，我就最憎，食煙無益咪叫佢食少啲囉，但又唔聽。到我買包煙畀佢嘞，佢話人哋送嘅煙先係好嘢嚟，我嗰啲『假煙』會食死咩？為咗一包煙，我叩咗三個響頭，脫離父子關係…係呀！就係咁兒戲，阿媽、家姐追出嚟話唔好呀，真係好似拍劇咁，做過呢啲傻事。」事過境遷，魯振順回想當初也感到非常內疚，一度感觸哽咽；幸好父母在生時，他一盡孝道彌補，與父親亦已和好，並寄語大家愛要及時。

憶起已離世的雙親，魯振順不禁感觸落淚。

　　繼《愛回家之開心速遞》兩大主角熊心如（蘇韻姿飾）及龍力士（鄭世豪飾）因合約完結而在劇情中消失後，再有演員宣布離巢的消息，令人大感可惜。譚坤倫飾演接龍集團的IT部「CPU」，一直以毒男的形象演出，深入民心，近來才因為爆肌的劇情而獲得注目，更慢慢開始跟Gigi（羅雪妍飾）的感情線，沒想到最終選擇離開。

　　現年32歲的譚坤倫加入《愛回家之開心速遞》已經接近6年時間，角色CPU是接龍IT部的其中一員，跟Mouse、（吳展驊飾）、Keyboard（李興華飾）再聯同Router亦即Ivan（鄧永健飾）組成「IT狗」早於419集登場，後來李興華離開TVB，改由孟希璘頂上飾演Laptop。今次譚坤倫都講拜拜，似乎IT部又要被瓦解？

　　譚坤倫其實是武打出身，他小時候曾被送到內地的少林寺學校學習北派武術，曾奪得「河南省全市武術比賽-棍術套路冠軍及劍術套路亞軍」。回港後打算做一名髮型師，不過在2011年卻參加了無綫節目《功夫新星》，他曾說：「好開心畀評判惠英紅讚我有演戲潛質。」之後順勢加入TVB做演員，可惜發展平平，他參與的劇集數量多，不過角色較零碎，除了CPU的角色外，近年的《靈戲逼人》中飾演李成昌年輕版，有不少發揮的機會。《功夫新星》節目發掘不少藝人，不過現時仍然在TVB的只剩阮政峰、容天佑、李君妍及曾海昌。

　　譚坤倫在IG撰長文表示：「TVB 再見！首先要多謝攪出《功夫新星》呢個節目嘅所有人，令到我好衝動咁參加咗，從而進入咗呢個行業。過咗非常精彩嘅13年，訓練班畢業之後，多謝監製潘嘉德先生，令我可以參與《On call 36小時2》、《拆局專家》、《醋娘子》、《流氓皇帝》、《三個女人一個”因”》。然後要多謝莊偉健監製嘅信任，令到我可以參與《天命》呢套劇集，第一次有感情線，以及有機會展露我嘅三腳貓功夫。然後再多謝監製同埋導演嘅堅持之下，我先再有機會參與《包青天之再起風雲》，雖然經歷咗一個相當辛苦嘅拍攝過程，但令我得到非常難得嘅回憶。可以參與兩位金牌監製嘅劇集，真係會好開心，因為細個嘅時候，就睇過佢哋製作嘅《尋秦記》、《衝上雲霄》。然後兩位監製離開TVB之後，我經歷咗好長時間嘅”失業”，之後就要多謝監製陳耀全、方駿釗，俾我參與咗好多套劇集。2018年多謝一位副導演，搵我做IT狗，其實好耐之前我就好想加入《開心速遞》，呢套劇集幫咗我好多，令到一個內向嘅我，慢慢打開自己，尋找演員嘅自我創作，然後得到觀眾嘅笑聲，慢慢增加咗我嘅自信心。然後多謝珍姐，監製林建祥，俾咗更多演出機會我哋，亦都好多謝編劇知道我鍾意健身，寫咗個腹肌IT男出嚟，令到我終於終於有感情線，我對唔住Gigi，要你再發掘下一個腹肌男。仲要多謝TVB呢個大家庭，無論幕前幕後，未能一一多謝嘅人，你哋都會在我心中，能與你哋一齊捱更抵夜，日曬雨淋，好多精彩嘅回憶。多謝你哋嘅照顧，包容，教導，提攜。仲要多謝好多記者，估唔到當時為咗拍攝腹肌需要斷食，會有咁多報道，令到我有咁多人留意到。多謝我嘅fans，你哋咁多年一直依然到場支持，實在榮幸！我依然會繼續一直係呢個行業發展，歡迎大家揾我合作！各位江湖再見！#cpu #再見 #譚坤倫 #it狗 #考慮三年決定」