世事政情

　　吳若希（Jinny）日前去到內地工作，到達冇幾耐佢就出Post分享佢又再次畀人偷嘢，今次被偷嘅嘢仲好特別，真係估二百次都估唔到呀。

　　Jinny早前喺IG Story post出一張閉路電視嘅截圖，圖中有一名男子戴住帽，拎住一個手提袋，環境疑似係喺商場入面，Jinny留言：「我今年條命係咪要keep住畀人偷嘢？今次影到邊個偷～來回兩次先嚟攞走。」Jinny都好無奈，「沒好氣」咁為賊人送上祝福：「Any肥（無論如何），希望幫你過咗呢個難關先，祝你食得開心。」

　　Jinny冇提到被偷嘅係咩，佢回覆本網記者訪問時搞笑表示估唔到有人同佢一樣咁鍾意食呢樣嘢：「 都估唔到有人同我一樣，咁鍾意食栗子，價值$200人民幣嘅栗子。好啦～有人同我一樣咁有taste，我原諒佢。」估計Jinny係用外賣平台落Order，但就被賊人順手牽羊。

　　Jinny咁豁達都唔係冇原因，因為喺唔夠一個月前佢先被盜手機，栗子可以話係「小巫見大巫」！Jinny當時出post表示佢手機唔見咗，但用find my IPhone功能時發現電話近在咫尺，但佢就無辦法搵得番：「話說，我尋日喺灣仔滙豐銀行附近俾人偷咗部電話，電話嘅IMEI係35 323395 805050 216分鐘之前，佢喺將軍澳出現過！其實我都報咗警㗎啦～不如你乖乖哋攞番返嚟TVB畀返我啦～～何必呢？」Jinny之後接受訪問表示自己只係放手機入袋去撳錢，短短幾分鐘時間手機就已經被偷，非常黑仔。睇怕Jinny經過呢兩次之後都會長期「紅色警戒」，提防小偷。

　　不少都市人因患濕疹而大受困擾，不停尋求醫治方法，《東張西望》20日接到一名濕疹患者的太太投訴，指丈夫向一名自稱女中醫「阿紅」求助醫濕疹，竟被對方要求除褲檢查精液！《東張》發現在召妓指南網站上竟有阿紅的資料，並派員放蛇，揭露阿紅聲稱全球獨創的「精液顏色斷診」真面目！

　　報料人Dana指其夫受濕疹困擾多年，從網上看到女中醫「阿紅」聲稱醫濕疹三次斷尾，於是上門求醫。阿紅先在Dana老公的濕疹患處上刮痧，「之後嗰位女士話『可能係濕疹，性功能方面有問題』，繼而要求我先生除晒啲衫，喺佢肚上面按摩，同時喺肚臍附近拔罐，話係前列腺。」阿紅進一步要求看Dana老公的精液：「要求佢除褲，想幫佢攞精液出嚟。」Dana老公深感「唔對路」，以趕時間為由離開。

　　Dana質疑阿紅另有所圖，致電對方對質：「佢啲態度好閃縮，佢話『邊個同你講㗎？點解你會知㗎？我好多客㗎！』支吾以對。」由於香港規定只要註冊中醫或表列中醫才能執業行醫，阿紅沒有透露全名，只以「阿紅中醫理療」為名，故無法查證她是否無牌行醫。

　　《東張》派出男工作人員，自稱濕疹病人向阿紅求醫，兩名工作人員前往阿紅位於尖沙咀一棟大廈內的樓上診所，門外連水牌也沒有，環境簡陋。阿紅以安全為由只肯讓患者一人入內，診斷期間，阿紅全程無細看工作人員後頸的濕疹，只不停強調其醫學理論，並要求檢查工作人員全身，又「恐嚇」道：「檢查你皮膚顏色、溫度、硬度…你濕疹困住喺裏面，唔單止痕咁簡單，你睇你面色黃黃哋，成個人都冇精神…佢破壞你腸胃功能、前列腺功能、心肺功能，你喘氣都有問題。」

　　當提到要病假紙時，成功令阿紅「鬼拍後尾枕」：「我冇得開，我冇嗰啲中醫牌呀！」她強調自己在網上賣廣告十年：「我就是大陸過來的中醫，好中醫都是大陸的。」她強調即使無牌，依然有病人找她：「我哋係中醫慨念，但我係獨家嘅一個嘢。」《東張》在網上搜尋阿紅，竟連接去召妓指南網站，阿紅的廣告以「男人唔補好易變虧佬！對自己好！中醫做得到！」、「全球獨家首創，精液顏色斷診」作招徠，明碼實價列明男士性功能、前列腺療程的價錢。曾參加《中年好聲音2》的中醫徐澤昌亦質疑阿紅的療法：「佢話花20年創立全球首創治療方法，第一我哋唔知內容係乜，第二唔知佢根據係乜。喺我眼中，佢一定係無稽之談。」昨晚《東張》播出放蛇人員「犧牲色相」讓阿紅檢查的情況，以及直擊《東張》女神黎寬怡（貓仔）跑樓梯追訪阿紅。