【特首選戰】入閘的學問
#特首 #選舉
一個爛到透嘅立法會真係唔想再繼續講落去，好彩今個星期特首跑馬仔正式開始，但估唔到揭開序幕嘅竟然係超級大冷門，由「胡官」胡國興率先行去沙圈踱步，其他熱門馬仔就仍然未出嚟。
除咗無乜可能唔競逐連任嘅CY之外，仲有財爺曾俊華、新民黨主席葉劉淑儀，仲有疑幻疑真嘅曾鈺成、梁錦松等，都可能係最終嘅出選人馬。如果胡官喺事前聲都唔聲之下，都可以走出嚟話選，可以想像今屆特首選舉，競爭係幾咁激烈。
好多人都會問一個問題，究竟多人參選對於應該會爭取連任嘅CY係有利定係不利呢？Tina噚晚出席一個俾面派對，遇上兩位佢地都係上一屆特首選舉嘅選委，難得一見，又撞正胡官宣布參選，話題當然係圍繞跑馬仔。
Tina：「CY面對多過一個建制嘅對手，理應係更有利，因為攤薄咗反梁嘅票源，你地點睇？」
選委A：「你呢個講法係大部分人嘅想法，但好表面。」
選委B：「的確係好表面。從另一個睇法，多有名望嘅人想參選，第一個睇法，就係阿爺對於硬撐CY連任都有所猶疑，如果係一早一條心想畀佢連任，自然就會禁住大部分人嘅不切實際願望。呢個時刻阿爺都無明確表示，CY喺禮賓府都坐得唔安落。」
Tina：「但係咁多人爭，分薄票源始終都係CY高啲呀？」
選委A：「我就唔係咁睇，最緊要係睇下有幾多人拎夠飛入到閘。如果多人入到閘，個個都打住CY撕裂香港嘅旗幟，你話阿爺會點諗？到時搞選舉論壇，CY本身民望都已經最低，又有多過一個建制對手的話，肯定全部圍住佢分裂香港社會而插佢，你話到時阿爺又有咩諗法。」
選委B：「所以萬大事就係要睇阿爺最終畀幾多人入閘，特別係財爺得唔得到聖旨畀佢去馬。你睇下CY咩『期望政府內所有同事均責無旁貸、心無二用在政府內為社會做事』呢種酸溜溜嘅講法，就知佢最忌就係阿爺點唔點頭。」
選委A：「不過做左幾次選委，我最想睇嘅係要投多過一輪，即係第一輪無一個候選人過半數。如果出現呢個歷史情況，CY應該係輸得最慘烈……」