「不任命」論可以幫曾俊華一把？
#特首 #2017特首選舉 #選舉 #曾俊華 #林鄭月娥執筆之時，選舉事務處正式宣布，曾俊華160個提名全數有效，正式成為2017年特首選舉嘅第一位正式候選人。
大家亦都知道，曾俊華手上面嘅提名票，125張係來自泛民，佔比達到78%。正如Tina之前提及，一個點秤都係屬於建制派嘅特首候選人，提名票最好要有超過一半，甚至係七八成來自建制；如果八成來自泛民的話，咁阿爺對佢嘅信任程度，可以去到咩位置呢？
不過，出現咁嘅情況，源頭又喺邊度呢？簡單咁講，係強力部門一開始就已經要力捧林鄭去搬入去禮賓府，所有建制派嘅選委都收到來自北面同西面嘅電話，強烈表明「阿爺非林鄭不揀，提名票一定要遞畀林鄭」。咁嘅情況之下，建制選委真心捧林鄭嘅，自然好高興咁遞張提名票畀佢；心目中仲諗緊揀邊個嘅，由於提名係要開名，無可避免就得兩條路揀：一係就畀林鄭以示對阿爺效忠，有啲「吉士」嘅就好似李超人咁，索性個個都唔畀。試問咁樣曾俊華又點能夠搶到堅實建制派嘅提名票？更何況，佢提交嘅25張建制選委票，根本全部都唔能夠講係建制派，只能夠將佢哋歸納為中間派。
呢個本來係「雞先定蛋先」嘅問題，但再睇得深入啲的話，其實係五年前唐梁之爭令建制大撕裂，同時令阿爺唔再相信建制對建制嘅牌面，係會有公平競爭，必定係搶得血肉模糊。既然係無公平的話，倒不如一開始就一錘定音指定一個人，咁樣所有建制派歸邊，容易控制。而指定呢一位候選人嘅其他所有建制派，都唔會係選擇之列。
可能建基於呢個觀點，有報道就引述董伯伯喺一個非公開場合就話，如果特首選戰係曾俊華勝出的話，中央唔會任命佢，惹來干預選舉嘅指控，而董伯伯亦急忙澄清無講過呢番說話。不過，有位堅實親中嘅選委同Tina講，董伯伯有無講過唔係重點，因為好多人對佢會講呢番說話根本唔會存在疑問。而報道一出，好大可能會帶來反效果，因為作為多年香港高級官員嘅曾俊華，要打到佢成為反對派係匪夷所思嘅事；有關言論就更令到其他中間派人士心寒，因為無論之前做到幾高幾好幾忠誠，阿爺唔鍾意就可以打到你變反對派。
再者，萬一選到曾俊華而阿爺不任命，呢個政治後果之大，比起繼續硬撐梁振英做多五年，對香港嘅損害更大，所以呢位堅實親中選委都相信，傳聞中董伯伯嘅言論，未必真係代表中央最高層思想。佢相信，「不任命」嘅說法，可能會激發更多表面忠實心裏唔多誠實嘅人會「人格分裂」，明票暗票分頭行事。
但曾俊華最終要打得贏呢場逆境波，機會仍然係細過香港隊踢波贏到皇馬。