世事政情

　　今日11月11日，因為有四個1嘅關係，喺內地俗稱為「雙11」，亦叫做「光棍節」。有咁啱又得咁橋，今日四個1嘅日子，人大常委會審議咗《國務院關於提請就香港特別行政區立法會議員資格問題作出決定的議案》，「必須確保香港特別行政區有關公職人員包括立法會議員符合擁護中華人民共和國香港特別行政區基本法、效忠中華人民共和國香港特別行政區的法定要求和條件」。有關議案公布之後，港府同時發出新聞稿，指根據全國人大常委會嘅決定，宣布將立法會議員楊岳橋、郭榮鏗、郭家麒同梁繼昌即時喪失立法會議員資格。

　　人大所作嘅決定，可以話係好明確咁畀咗個金剛箍畀泛民，指明香港嘅立法會議員，因宣揚或者支持「港獨」主張、拒絕承認國家對香港擁有並行使主權、尋求外國或者境外勢力干預香港特別行政區事務，或者具有其他危害國家安全等行為，不符合擁護中華人民共和國香港特別行政區基本法、效忠中華人民共和國香港特別行政區嘅法定要求同條件，「一經依法認定，即時喪失立法會議員的資格」。呢個決定最有趣嘅係，DQ議員唔再需要由立法會自己去搞，亦唔使勞煩立法會主席去做醜人，只要有以上行為，特首就可以直接頒令DQ。

　　有建制派議員就指出，今次DQ表面上就係跟番7月報名時選舉嘅脈胳，但實際上，楊岳橋、郭榮鏗、郭家麒同梁繼昌四人被DQ所反映嘅其實係立法會復會之後泛民全面反抗嘅「惡果」。「泛民喺大會同事務委員會上面點樣玩過火，阿爺係知道得一清二楚，唔單止西環有責任匯報，建制派議員、政府亦一直有向阿爺打報告。阿爺當然想直截了當將玩嘢嘅議員DQ，目標人物最少七八個，但法例上又的確難以入罪，唯一就係以今次咁嘅方式，將曾經涉嫌宣揚港獨嘅人DQ，仲要係阿爺授權特區政府去做，『殺四警百』，希望令到議會長治久安。」

　　不過今次歷史上首次將現職議員「搣柴」，所引起嘅後果的確係難以想像，支持泛民嘅市民以至其他國家會唔會有進一步制裁，都係未知之數。不過呢位建制派議員認為，阿爺行得呢一步，應該就已經考慮到所有最壞情況，估計海外從香港大規模撤資嘅可能性極低，就算係對香港官員、政客實施新一輪制裁，實質影響都係有限，「阿爺做嘅係撥亂反正，用短痛去換來十年、廿年後嘅穩定，DQ係痛，但唔打針又點得好呢？」

　　有媒體日前刊登咗一篇政壇花絮，話今屆立法會同政府關係非常良好，甚至有議席出缺，對立法會運作都完全無影響，議員「多一個都唔多」；更加借住呢個議題，指明年年底立法會選舉可能會大換血，估計有三分一現任議員離任，包括「自然流失」，如資深議員因年齡、黨內交棒退下火線，亦有議員涉及表現等不同因素。文章仲點名三位議員：謝偉俊、蘇長榮同林素蔚。

　　文章一出，立即喺政壇瘋傳。被指「太有個性」、喺現屆議會之中「格格不入」嘅謝偉俊，議會經驗豐富，亦都算得上係稱職嘅議員，對於文章所講，佢四兩撥千斤咁回應一句：「係咪格格都入就好呢？」絕對睇得出佢爐火純青嘅程度。至於蘇同林就被指表現欠佳，兩人都已經親自向其他媒體解釋，Tina都不再詳述。

　　不過呢篇文章亦帶出一個問題，就係來年會有幾多人冧莊繼續做落去呢？Tina亦借機會向多位議員打聽，佢哋有一個睇法係幾一致嘅，就係文章所講嘅「三分一無得連任」應該都係太保守，估計數字遠超三分一。其中一位資深議員分析，香港面臨新形勢、新局面，係極需要新思維，一批舊議員（佢自己都話可能包括佢自己）其實都好可能功成身退，讓路畀新人，將朝氣帶入議會。

有政圈中人認為，香港面臨新形勢、新局面，議會極需要新思維。(iStock)

　　嗰個資深議員仲認為，的確有部分議員喺議會工作上嘅表現同各方期望有落差，特別係部分選委界別議員，「不過又好難怪佢哋，依家每個議題，每個黨都會有固定發言人，涉及一啲行業嘅嘢又有功能組別議員去睇住，選委會界別議員要出位唔容易，太過進取敢言又好易講錯說話，所以唯一敢言嘅江玉歡可以跑得出，市民對佢嘅認知度相信亦係最高，但其他議員要出位真係好困難，做唔到成績，某程度上亦都係『制度』問題。」

　　另一位議員就指出，有部分議員都係當日「臨危受命」上陣參選，本身佢哋工作或者業務就已經繁重，本來對政治地位都無乜特別要求，但要佢哋兼顧咁多議會工作，確實令到佢哋左右做人難，「有唔少議員都私下抱怨，如果要做到『高層』所要求嘅KPI，喺議會要花上唔少時間，呢個係佢哋事先無估計到，所以最少十個八個現任議員都會係因為呢個原因而喺下屆拜拜，如果連同新丁加入競爭，三分一離任實在係太保守！」