世事政情

　　候任特首李家超明天(28日)上京，預計北上見領導人嘅時候，就會將新班子嘅清單一同遞上(當然呢個只係儀式，正路新班子人選已經齊備並已經得到領導人首肯)。亦即是話，各個崗位已經搵到佢地覺得合適嘅人選，新班子人選亦將會陸續曝光。

　　Tina之前都提及過，三個司長最大變數將會係政務司司長，譚志源婉拒之後，明眼就得返保安局局長鄧炳強同埋政制及內地事務局局長曾國衞之爭，當時聽返來就似乎李家超仲有其他猛將想揀下。不過經歷一輪「尋人記」之後，似乎「那人卻在燈火欄柵處」，那人仍然係鄧炳強。直升機直上的話，保安局局長一職又要再搵過人，整個保安系統又會有一連串升遷動作。

　　新政府同時搞緊重組，加多三個副司長職務，Tina仲未打聽到政務司副司長由邊位「賢能」出任。不過律政司副司長嘅人選就呼之欲出，聽聞教法律出身嘅經民聯梁美芬，喺立法會打拼多年之後終於入到政府，出任呢個新職位。有建制中人就話，議員一般轉跑道去政府，通常都係做副局長先，芬姐真係出任副司長的話，稱得上係三級跳。佢仲透露，近日梁美芬明顯變得低調，更聽聞佢已經好積極咁安排緊一眾幫佢手嘅助理，轉職至其他議員辦事處，大有處理辭職後事嘅意味。

(圖片來源：梁美芬facebook)

　　建制中人對於芬姐恨入政府唔敢到意外，不過呢位建制中人早有聽聞，芬姐同埋現任律政司司長鄭若驊一直以來都係無偈傾，由於盛傳鄭將會留任至下任政府，對於芬姐肯入去做鄭副手，建制中人無不嘖嘖稱奇。「識得芬姐嘅都知道，佢無可能甘心去做鄭若驊嘅副手，再加上芬姐一直只係一個法律學者，所以估計好多日常執行上嘅嘢將會交返晒畀鄭若驊，而芬姐主力將會代表律政司處理立法會事務為主，不過日後兩人會唔會爭野做，例如一啲同內地嘅司法合作之類，將會係未來嘅重頭戲。」建制中人咁樣形容。
　

　　有媒體日前刊登咗一篇政壇花絮，話今屆立法會同政府關係非常良好，甚至有議席出缺，對立法會運作都完全無影響，議員「多一個都唔多」；更加借住呢個議題，指明年年底立法會選舉可能會大換血，估計有三分一現任議員離任，包括「自然流失」，如資深議員因年齡、黨內交棒退下火線，亦有議員涉及表現等不同因素。文章仲點名三位議員：謝偉俊、蘇長榮同林素蔚。

　　文章一出，立即喺政壇瘋傳。被指「太有個性」、喺現屆議會之中「格格不入」嘅謝偉俊，議會經驗豐富，亦都算得上係稱職嘅議員，對於文章所講，佢四兩撥千斤咁回應一句：「係咪格格都入就好呢？」絕對睇得出佢爐火純青嘅程度。至於蘇同林就被指表現欠佳，兩人都已經親自向其他媒體解釋，Tina都不再詳述。

　　不過呢篇文章亦帶出一個問題，就係來年會有幾多人冧莊繼續做落去呢？Tina亦借機會向多位議員打聽，佢哋有一個睇法係幾一致嘅，就係文章所講嘅「三分一無得連任」應該都係太保守，估計數字遠超三分一。其中一位資深議員分析，香港面臨新形勢、新局面，係極需要新思維，一批舊議員（佢自己都話可能包括佢自己）其實都好可能功成身退，讓路畀新人，將朝氣帶入議會。

有政圈中人認為，香港面臨新形勢、新局面，議會極需要新思維。(iStock)

　　嗰個資深議員仲認為，的確有部分議員喺議會工作上嘅表現同各方期望有落差，特別係部分選委界別議員，「不過又好難怪佢哋，依家每個議題，每個黨都會有固定發言人，涉及一啲行業嘅嘢又有功能組別議員去睇住，選委會界別議員要出位唔容易，太過進取敢言又好易講錯說話，所以唯一敢言嘅江玉歡可以跑得出，市民對佢嘅認知度相信亦係最高，但其他議員要出位真係好困難，做唔到成績，某程度上亦都係『制度』問題。」

　　另一位議員就指出，有部分議員都係當日「臨危受命」上陣參選，本身佢哋工作或者業務就已經繁重，本來對政治地位都無乜特別要求，但要佢哋兼顧咁多議會工作，確實令到佢哋左右做人難，「有唔少議員都私下抱怨，如果要做到『高層』所要求嘅KPI，喺議會要花上唔少時間，呢個係佢哋事先無估計到，所以最少十個八個現任議員都會係因為呢個原因而喺下屆拜拜，如果連同新丁加入競爭，三分一離任實在係太保守！」