世事政情

　　「立法會行政長官答問會」其實都玩咗好多年，歷史都無謂再講返，亦可能有返咁上下歷史，所以就有啲「行禮如儀」嘅感覺。無乜新意又好、欠缺火花又好，亦有可能係為咗提升特首喺立法會答問嘅受關注程度，特首李家超就創新猶，取而代之係下周四（18日）舉行「立法會行政長官互動交流答問會」（互動會），話要提升議會所能創造嘅價值，建立共識。

（資料圖片）

　　所謂「互動會」，最特別就係設有「主題討論」，希望議員集中喺主題上面遊走。另外互動方面，唔再單一係議員問、特首答，而係可以調返轉，特首亦可以問返要議員答，咁先稱得上係互動。

　　不過有添馬中人就估計，超超諗到呢個「互動會」，應該係有幾重意義。首先，唔少議員喺過往，特別係完善選舉制度之前，趁住呢個答問會或者質詢，向特首諸多留難，感覺上特首係去立法會畀議員「糟質」。呢種做法喺現今政治大環境自然就唔多合適，雖然依家班議員亦唔會「糟質」超超，但行政「超然」主導之下，特首被議員質問確實變相有特首「匯報」畀議員嘅感覺。所以「互動會」係雙向性，「你問我，我又問返你，大家交換意見，充分體現行政立法配合，而唔係立法向行政問責」。

　　添馬中人仲話，政府內部一直對有部分議員有微言，指政府一向都接受批評，但批評之餘亦希望有啲實質建議可以畀到政府；但係有部分議員就批評得天花亂墮，一樣建議都無，有建議嘅，就更加係天馬行空，政府無辦法將建議落地，覺得部分新丁議員嘅質素的確係普普通通。

　　透過「互動會」，議員有問題想考超超之餘，超超亦可以掉返轉頭將個波拋返畀個議員，甚有「考牌」嘅味道，等議員批評還批評，亦都要做好晒功課先上陣，唔好無的放矢。

　　另外「互動會」設有主題亦都係「有心之舉」。過去答問會問題方向包羅萬有，房屋交通醫療，關注唔同議題嘅議員問嘅嘢都好唔同，變咗每個局都要特別同特首事前做好功課。定咗一個主題，雖然就話議員都可以離題問，但十之八九都係會跟返主題去發揮，令到超超更容易準備。而第一個主題「討論中共二十大及兩會精神」，亦都係超超早已經背到滾瓜爛熟，應該可以好好應付同發揮，可以話先立一個「下馬威」。

　　話且說回來，雖然今次互動會雖然感覺上係幫議員「考牌」，但同時間亦都增加咗超超嘅難度，無返咁上下急才都未必識得問返議員轉頭，更遑論係問到議員口啞啞。無論如何下周四將會係政壇嘅焦點所在。

　　有媒體日前刊登咗一篇政壇花絮，話今屆立法會同政府關係非常良好，甚至有議席出缺，對立法會運作都完全無影響，議員「多一個都唔多」；更加借住呢個議題，指明年年底立法會選舉可能會大換血，估計有三分一現任議員離任，包括「自然流失」，如資深議員因年齡、黨內交棒退下火線，亦有議員涉及表現等不同因素。文章仲點名三位議員：謝偉俊、蘇長榮同林素蔚。

　　文章一出，立即喺政壇瘋傳。被指「太有個性」、喺現屆議會之中「格格不入」嘅謝偉俊，議會經驗豐富，亦都算得上係稱職嘅議員，對於文章所講，佢四兩撥千斤咁回應一句：「係咪格格都入就好呢？」絕對睇得出佢爐火純青嘅程度。至於蘇同林就被指表現欠佳，兩人都已經親自向其他媒體解釋，Tina都不再詳述。

　　不過呢篇文章亦帶出一個問題，就係來年會有幾多人冧莊繼續做落去呢？Tina亦借機會向多位議員打聽，佢哋有一個睇法係幾一致嘅，就係文章所講嘅「三分一無得連任」應該都係太保守，估計數字遠超三分一。其中一位資深議員分析，香港面臨新形勢、新局面，係極需要新思維，一批舊議員（佢自己都話可能包括佢自己）其實都好可能功成身退，讓路畀新人，將朝氣帶入議會。

有政圈中人認為，香港面臨新形勢、新局面，議會極需要新思維。(iStock)

　　嗰個資深議員仲認為，的確有部分議員喺議會工作上嘅表現同各方期望有落差，特別係部分選委界別議員，「不過又好難怪佢哋，依家每個議題，每個黨都會有固定發言人，涉及一啲行業嘅嘢又有功能組別議員去睇住，選委會界別議員要出位唔容易，太過進取敢言又好易講錯說話，所以唯一敢言嘅江玉歡可以跑得出，市民對佢嘅認知度相信亦係最高，但其他議員要出位真係好困難，做唔到成績，某程度上亦都係『制度』問題。」

　　另一位議員就指出，有部分議員都係當日「臨危受命」上陣參選，本身佢哋工作或者業務就已經繁重，本來對政治地位都無乜特別要求，但要佢哋兼顧咁多議會工作，確實令到佢哋左右做人難，「有唔少議員都私下抱怨，如果要做到『高層』所要求嘅KPI，喺議會要花上唔少時間，呢個係佢哋事先無估計到，所以最少十個八個現任議員都會係因為呢個原因而喺下屆拜拜，如果連同新丁加入競爭，三分一離任實在係太保守！」