世事政情

　　特首李家超上任之後，工作清單頭幾位嘅就係「說好香港故事」。要講香港嘅故仔，當然當面同外國人講香港有幾掂、香港有幾正係最好不過，但如果去唔到咁又會點呢？

（AP）

　　亞太經濟合作組織（APEC）領導人非正式會議將會喺11月 美國三藩市舉行，李家超去唔去到一直受到關注，事關佢一直都係喺美國嘅制裁名單之上。而外媒日前就報道，有4名來自民主、共和兩黨嘅美國國會議員聯署致函美國國務卿布林肯，批評美國政府計劃允許李家超入境美國參加APEC，相當於「向全世界的人權侵犯者發出一個可怕的訊號」。

　　雖然今年年初美國副國務卿舍曼（Wendy Sherman）曾經答覆國會，打算歡迎李家超去美國參與APEC會議，但如果美國兩大政黨議員對反對超超起行有共識的話，拜登政府最後點做都真係好難話得埋，事關拜登都要諗自己連任嘅問題，得罪兩黨議員絕對唔係講笑。

（Wendy Sherman／AP）

　　有政壇中人就話，今次超超去唔去到美國，特區政府估計都會比較低調，亦唔會戰狼上身，事關呢個係關乎到國家外交大事，超超幾叻都好，其實對於呢類外交，少講絕對係少錯，全權交由國家處理。

　　政壇中人分析，要李家超無條件咁去開會，的確好難令美國當局落台，阿爺亦未必會因為超超去唔去到嘅理由而進一步同美國鬧翻；所以估計，最大可能就係中間落墨，邀請就照發邀請，但係超超就醒目「因另有公務」而去唔到，改由無被制裁嘅高級官員去，咁樣就兩邊都落到台喇。

　　不過另有消息就話，美國國務卿布林肯（Antony Blinken）好有機會未來幾周訪華，暫時中美官方無證實亦都無否認。政壇中人就估計，呢個絕對係一個水溫計，如果真係落實訪華，訪華後又釋出極大善意的話，咁超超能夠赴會嘅機會亦都大增。

　　負責為全港超過19萬公務員制定薪酬調整幅度指標嘅「薪酬趨勢調查委員會」，剛剛喺噚日（16日）公布最新嘅2024年薪酬趨勢調查報告，各級公務員加薪淨指標，分別係高級公務員4.01%、中級公務員4.32%同埋低級公務員5.47%，遠遠超過之前市場預期嘅3%至4%。

　　消息一公布，市面「嘩嘩聲」四起，事關成4%至5%人工加幅，對私營市場九成打工仔近幾年嚟講，都係遙不可及。有熟知政府運作嘅政界中人就話，每年嘅薪酬趨勢調查委員會報告，都令到政府高層頭都大埋，佢形容：「私營機構加幾多人工，梗係睇吓公司去年盤數同埋預測未來2、3年經營狀況去決定，簡單好多；但政府加幾多人工畀公務員，要考慮嘅因素唔單止係自己個荷包，仲要睇埋對私營市場嘅影響，絕對係政治學上一門高深學問。」

　　今年公布呢個遠超市場預期嘅加幅，絕對係令到政府處於幾尷尬嘅局面。如果跟足建議去加人工，好處當然係公務員士氣獲得提振，有助現屆政府繼續積極推行各項政策，等下面嘅公務員「攰死」之餘，起碼荷包得以充實。不過現時市場經營環境並唔係一面向好，以往一直係「天之驕子」嘅金融機構更加出現裁員情況，中小企更加喺北上消費熱潮之下「得個做字」，街上、商場吉舖處處，如果政府帶頭加足5%薪酬，對私營市場絕對係沉重打擊。

薪酬趨勢調查委員會建議嘅公僕加薪幅度，遠超市場預期。(Shutterstock)

　　喺面對千億財赤、儲備跌到得番7000億元、政府甚至要加大發債去支持基建項目嘅時候，加薪5%，講緊每年開支要增加超過60億元，政界中人就話：「呢頭你話政府唔夠錢要研究加呢樣收費、減嗰樣使費，到頭來加人工就要每年使多60億至70億元，試問又點樣同市民交代？」

　　而加唔足嘅話，對政府運作亦有唔少影響。有公務員朋友形容，呢幾年行政主導勢頭之下，個個局都要交足功課，上面有任何諗頭，做細嘅就要出頭，唔少部門嘅中高層都做得辛苦過出名工時長嘅四大核數師行，夜晚10點後收工都係等閒事，「人工加得唔夠好，可能就會令到人手流失加劇，特別係30幾歲中層嗰班，佢哋有政府工作經驗，行出去好多私營機構都爭住要，政府人工加唔夠，呢班中堅走咗就好難再填補」。

　　有立法會議員就私底下透露，早排都已經有評論認為公務員要減人工去同政府庫房共度時艱，不過佢自己就覺得，呢種講法無非都係社會嘅一種怨氣，「要解呢口怨氣好簡單，只要最高嗰班官員唔加人工之餘仲自願凍薪，甚至減人工，輿論就自然會覺得高層有承擔，呢啖氣就自然吞得落，下面加得足又點話呢！」