世事政情

　　復活節假期尾聲，喺噚日4月1日愚人節嘅日子，政府宣布將近3000人嘅委任名單，呢個名單係擔任俗稱「三會」嘅分區委員會、地區撲滅罪行委員會同埋地區防火委員會嘅委員。委任人數眾多，本來市民都無乜特別感覺，之但係今次政府委任三會成員嘅名單，不單止全數委任現任區議員，更加有唔少「敗部復活」，出現「政治酬庸」、「塘水滾塘魚」呢個觀感。

　　民政及青年事務局局長麥美娟，噚日委任1937人為新一屆分區委員會委員，另外有536人獲委任為地區撲滅罪行委員會委員，地區防火委員會就有526人獲委任為委員，任期兩年，即係全數有2999人被委任，比上屆三會共有2533人，增加466人，即增加約18%。

　　上一屆委任三會之時，民主派奪得近九成區議會議席，政府亦都唔再委任區議員做三會工作，仲解釋話「希望委任其他有志服務社會的合適人士為分區委員會委員，以廣納不同界別人士的意見」；點知今年三會，就全數吸納現屆區議會470名區議員，徹底推翻當日所講嘅解釋，予人「塘水滾塘魚」之感。

現屆區議會470名區議員，全數獲政府委任入三會。（資料圖片）

　　部分喺區議會選舉之中落敗嘅候選人，亦得到政府青睞。最令人不解嘅係，好似地方直選全港最低票數（253票）、連3000元選舉按金都拎唔番嘅油尖旺選區落敗候選人孫逸仙，就獲委任為油尖旺南嘅分區委員會委員；另外其他區亦有唔少極低票落選嘅人士，一樣有得被委任，「政治酬庸」之說不脛而走。

　　有地區政界中人就同Tina講，其實選得區議員嘅都係有心服務市民嘅人士，更何況呢個年頭，仍然肯出嚟服務社區嘅人真係買少見少，政府委任呢班「敗部」入去三會之中，其實只係一個政治現實，「可以揀嘅人真係唔多，來來去去都係呢班人，仲要有咁多個位要填，政府真係唔易做㗎」。

　　而呢位政界中人更加指出，三會過往幾乎係無實權喺手，但自上年區議會選舉之後，佢哋就某程度上掌握咗區議會選舉嘅「入閘機」，變成架構上嘅一個重要「守門員」，所以政府揀人方面又多咗好多顧忌，「一個新仔話想服務市民，咁政府都要花唔少精力去做審查，所以揀新仔都唔係易事，變相一班現任區議員同選過上年區議會嘅，就必然係『身家清白』，被選中係必然，亦係大家一早預計咗，你覺得佢哋係『塘魚』都無辦法」。

　　負責為全港超過19萬公務員制定薪酬調整幅度指標嘅「薪酬趨勢調查委員會」，剛剛喺噚日（16日）公布最新嘅2024年薪酬趨勢調查報告，各級公務員加薪淨指標，分別係高級公務員4.01%、中級公務員4.32%同埋低級公務員5.47%，遠遠超過之前市場預期嘅3%至4%。

　　消息一公布，市面「嘩嘩聲」四起，事關成4%至5%人工加幅，對私營市場九成打工仔近幾年嚟講，都係遙不可及。有熟知政府運作嘅政界中人就話，每年嘅薪酬趨勢調查委員會報告，都令到政府高層頭都大埋，佢形容：「私營機構加幾多人工，梗係睇吓公司去年盤數同埋預測未來2、3年經營狀況去決定，簡單好多；但政府加幾多人工畀公務員，要考慮嘅因素唔單止係自己個荷包，仲要睇埋對私營市場嘅影響，絕對係政治學上一門高深學問。」

　　今年公布呢個遠超市場預期嘅加幅，絕對係令到政府處於幾尷尬嘅局面。如果跟足建議去加人工，好處當然係公務員士氣獲得提振，有助現屆政府繼續積極推行各項政策，等下面嘅公務員「攰死」之餘，起碼荷包得以充實。不過現時市場經營環境並唔係一面向好，以往一直係「天之驕子」嘅金融機構更加出現裁員情況，中小企更加喺北上消費熱潮之下「得個做字」，街上、商場吉舖處處，如果政府帶頭加足5%薪酬，對私營市場絕對係沉重打擊。

薪酬趨勢調查委員會建議嘅公僕加薪幅度，遠超市場預期。(Shutterstock)

　　喺面對千億財赤、儲備跌到得番7000億元、政府甚至要加大發債去支持基建項目嘅時候，加薪5%，講緊每年開支要增加超過60億元，政界中人就話：「呢頭你話政府唔夠錢要研究加呢樣收費、減嗰樣使費，到頭來加人工就要每年使多60億至70億元，試問又點樣同市民交代？」

　　而加唔足嘅話，對政府運作亦有唔少影響。有公務員朋友形容，呢幾年行政主導勢頭之下，個個局都要交足功課，上面有任何諗頭，做細嘅就要出頭，唔少部門嘅中高層都做得辛苦過出名工時長嘅四大核數師行，夜晚10點後收工都係等閒事，「人工加得唔夠好，可能就會令到人手流失加劇，特別係30幾歲中層嗰班，佢哋有政府工作經驗，行出去好多私營機構都爭住要，政府人工加唔夠，呢班中堅走咗就好難再填補」。

　　有立法會議員就私底下透露，早排都已經有評論認為公務員要減人工去同政府庫房共度時艱，不過佢自己就覺得，呢種講法無非都係社會嘅一種怨氣，「要解呢口怨氣好簡單，只要最高嗰班官員唔加人工之餘仲自願凍薪，甚至減人工，輿論就自然會覺得高層有承擔，呢啖氣就自然吞得落，下面加得足又點話呢！」