【自己廣東話自己撐】寫口語＝無文化？《粵典》創辦人教你乜係「哬哚嘴」
#人物專訪 #語言學 #粵語 #廣東話 #DSE #文憑試 #中文科（請留意，以下訪問內容由廣東話寫成。）
你知唔知，世界文學名著《小王子》係有廣東話版㗎？（網上圖片）
「你用廣東話寫喎、用口語寫喎，即係你冇讀過書啦！」一直從事廣東話研究嘅《粵典》創辦人劉擇明（阿擇）話，如果佢拎住一啲用廣東話寫嘅書或者文章出去畀人睇，而咁啱嗰個係一個上咗年紀嘅人，通常得到嘅回應就係咁樣。
怪唔之得佢成日都話，「廣東話嘅地位仲係好低。」
Read More：【新奇跌打館】收藏過千骷髏骨！長沙灣潮爆醫師：好過掛「仁心仁術」
最近社會出現新一輪「捍衛廣東話」嘅討論。
而起源要數返去6月28號，「學校課程檢討專責小組」發表中小學課程諮詢文件，建議DSE中文科刪走聆聽及／或說話卷。消息喺8月廣泛傳開後，坊間雖然有人表示支持，但亦有人大鬧「咁做會令廣東話好快死！」
作為語言學學者、網上粵語辭典《粵典》創辦人，阿擇有咁樣嘅睇法，「而家政府有一個對廣東話損害更大嘅政策，叫『普通話教中文』。如果大家擔心DSE冇咗說話卷同聆聽卷會影響到廣東話嘅話，我哋更加需要關心嘅係，點解我哋容許咁多小學可以揀用普通話去教中文？」
喺日本留學期間，阿擇發現廣東話同其他語言嘅地位好唔平等。「我每日都要講好多隻唔同嘅語言，對住大陸人講普通話、對住日本人講日文，對住其他外國人就要講英文，偏偏冇乜機會講到廣東話。咁我就開始諗，點解廣東話嘅地位咁慘？後尾返到香港，發現有小學已經轉用普通話教中文。我覺得好唔對路，明明由細到大嘅中文堂都係用廣東話上，有乜理由而家啲細路仔唔得，仲要講廣東話會畀人罰？」
呢個疑問，亦都係阿擇創辦《粵典》嘅最大動力，「希望可以喚醒大家對廣東話嘅關注。」
《粵典》其實係乜？
「真係由零開始做起。」阿擇繼續一輪嘴咁將籌組《粵典》嘅故事娓娓道來。「第一步要做嘅，就係搵人提供一啲辭典材料畀我哋。好開心當時香港大學借咗本粵英辭典畀我哋用，不過嗰本辭典大概只有一萬個詞條，所以我哋都仲有好多寫詞條嘅工作要做。」
為咗令編者更加明白咩係「寫詞條」，阿擇就用個「食」字嚟做例子。「食究竟係咩意思呢？原來擺啲嘢食落肚（進食）係一個意思，食藥、食煙係一個意思，硬食咗幾拳又係一個意思。所以我哋要去整理返呢啲意思出嚟，然後再譯做英文、加例句、加例句嘅粵拼，同埋例句嘅翻譯。」佢話，頭三年整理咗超過四萬個詞條。
用《粵典》查吓「食」字點解先！
「但辭典永遠都追唔上語言嘅發展，我哋只能夠盡量追，但有時我哋根本未追上，嗰隻字已經死咗。」為咗更貼地去研究廣東話，阿擇同佢嘅團隊周不時都會流連網上討論區。「見過有人會稱呼人做『師兄』，但係寫出嚟嘅時候係寫『ching』。最初我以為大家都係玩下嘢，幾個月就冇㗎啦，點知流行咗幾年，所以我哋最後都收錄咗入《粵典》。」
廣東話仲有生存空間？
明明講廣東話係一件平常事，但只要坐地鐵嗰陣細心留意吓，好多時都會發現，好多家長同小朋友講嘢都會夾雜英文。「你想像吓，同個仔講嘢啫，偏偏唔可以講自己嘅母語。其實呢件事（連自己嘅語言都唔講得，覺得冇經濟價值）係好悲哀。」阿擇仲留意到，呢班家長嘅英文水平其實唔係太高，偏偏夾硬迫自己講自己唔熟悉嘅語言，「真係好無謂。」
「新文化運動嘅時候，大家話不如『我手寫我心』，或者『我手寫我口』啦，用一些比較貼近人話嘅方式去寫嘢，但好可惜呢個運動最主要推廣嘅地方係北京，唔係香港，所以對講廣東話嘅人嚟講，只不過係將文言文變做一隻易學少少嘅語言（即現代漢民族共同語的書面語言）。」阿擇追溯歷史，解釋廣東話未能成為常見書寫語言嘅原因。
Read More：【半夜聽一闋歌】誰人不識奕琪！廟街歌女：他們寧願吃杯麵都要捧我場
咁要點樣保護「廣東話」呢個香港人最親切嘅母語？阿擇就話要靠香港人自己撐。「只要我哋每一日都願意用廣東話去溝通（講嘢又好，寫嘢又好），自自然然其他人就能夠接觸到廣東話，咁我哋就可以透過廣東話見得返香港嘅文化。所以我好希望大家，無論喺日常生活又好，正式場合又好；娛樂又好，甚至係搞文學都好，都可以盡量用返自己嘅語言。」
阿擇仲話，「有時為咗慳時間，就算唔打口字邊（例如將『嘅』寫成『既』），或者用英文拼音，其實都無傷大雅。但如果有一日要用廣東話出書，就要寫返啱正確嘅寫法啦！」
「每一個人都應該盡力去保留自己嘅文化。」阿擇話，無論係廣東話，定係普通話，喺語言學嘅角度睇，唔會話一隻高級啲、一隻低級啲。「我哋唔希望出現呢一種歧視。潮州話、客家話、福建話其實都一樣，每一種語言都應該要有同等嘅地位先至啱。」
＊「學校課程檢討專責小組」於6月底發表中小學課程諮詢文件，建議DSE中文科刪去聆聽及／或說話卷。公眾人士如對諮詢文件的初步建議有任何看法、意見及建議，需於2019年9月16日或之前，以郵寄、電郵或傳真方式把書面意見交予專責小組秘書處。
按下頁 3條問題考你廣東話能力
1. 作句題：用「乜滯」作句。
「乜滯」係句末助詞，例如「今日冇食嘢乜滯」、「今個學期我冇上堂乜滯」等等，意思就係「食得好少」、「上得好少堂」，近乎零，但係唔係完全冇。語法好複雜，而好似 20 歲以下嘅人好少用。語言嘅變化好大，好多舊嘅元素會慢慢消失，新嘅嘢又會出嚟。就算日日聽都好，大家都唔會覺得有啲用法係冇咗或者變咗，但係認真問就會感覺到。
2. 文法理解題：翻譯圖中句子（① 嘵） （②械）。
「嘵 hiu1」係「咗」嘅舊講法，喺香港粵語已經冇咗，但係喺好多唔同地方嘅粵語仲有保留。（見《粵典》解釋）
「械 kaai3/kaai4」係「攞」「將」嘅意思，去到八十年代嘅電視節目都仲係成日聽得見。（見《粵典》解釋）
3. 詞彙聽解題：句中「hoe4doe4嘴」係乜嘢意思？
（節錄自《九品芝麻官》）
「hoe4doe1花」係喇叭花，「hoe4doe1」就好似喇叭、啲咑噉向外翻開嘅形態。（有啲人寫做「哬哚」，不過隻字點寫就唔太重要，因為太過執着寫，就會忽略其他好少寫低嘅得意講法或者現象）
（以上資料由受訪者提供）