【難求好廣告】明星效應非萬能!3招製作出令人回味的好廣告
#數碼營銷 #廣告近年大家心中有冇一個較為印象深刻嘅電視廣告?
過去五年,真係較難搵到一個比較深刻嘅電視廣告。香港廣告愈來愈「廣告」,除咗太hard sell之外 ,亦缺乏一啲令人回味、有回憶嘅元素,睇完唔會有深一層感受同思考,更唔會有共鳴。
當然,其中一個原因係電視節目質素下降,睇電視嘅人少咗,同時影響廣告製作費同質素。另一方面,因為部分上一代較傳統嘅客戶,同新一代廣告人嘅諗法有落差,令兩代嘅諗法未能接軌,令廣告缺乏創意。最後觀眾只會見到產品名稱不停出現於廣告之中,旁白重覆又重覆產品特點。所以近年廣告只著重明星效應,以明星直接講出產品功效,變成記憶唔深嘅「直接廣告」。
其實一個好嘅廣告,如果單靠國際巨星先能夠令人留下深刻嘅印象,咁樣只代表該明星出名,而唔係廣告有實力。一個好廣告,當中有幾個元素十分重要:
一句好tagline
唔一定係賺人熱淚嘅對白先叫好tagline,能夠令觀眾會心微笑、充滿回憶,或者係引發思考嘅一句話,都可以帶來好好嘅反應。
「看出一點真,看出可觀人生。」眼鏡能夠令你看得清,除咗係生活需要之外,亦能讓你看到細節,看到人生嘅不同,意義十分重大。
「咦~ 乜咁啱嘅。」用學生做主角,加強觀眾嘅代入感,正中主目標客戶群;而且Tagline簡單直接,日常生活亦可以經常使用,能夠喺短時間內變成家傳戶曉嘅金句。
陽光檸檬茶1993年廣告︰
「要贏人先要贏自己。」撇除明星效應,其實呢個句話意義好重,令人有一刻會等一等,諗一諗,更係好多人嘅座右銘。
和記新幹線1997年廣告︰
一個好故事
要喺30秒至一分鐘內講一個好故仔其實十分難,但如果能夠做到,亦代表呢個廣告有值得收看嘅理由。好多時會偏重故事內容,但就忽略咗產品/品牌。或者當兩者都配合到時,但又未必有好好嘅深一層意義,令觀眾思考並加深印象。所以故事結構、大綱落墨嘅比重、表達手法等等,都影響著觀眾最後心中留下一個點樣嘅畫面。廣告製作時,都會盡量安排focus group,研究廣告帶俾受訪者第一個畫面是甚麼,如果大家睇完廣告後都留下同樣嘅畫面,呢個就係一個好廣告。
一首好嘅歌曲/背景音樂
好多人都會忽略咗音樂,觀眾有時都未必會留意到音樂對佢哋嘅影響。雖然可能只係一段簡簡單單嘅背景音樂,但已經係勾起大眾回憶嘅一個重要工具。音樂係一種無形記憶,大腦中嘅畫面都會因為音樂而加深,並帶動情緒。所以有啲製作廣告時,會以音樂為主導,之後先計劃內容、畫面、分鏡等等。
一個成功嘅廣告,依靠好多東西配合。除咗廣告人同客戶嘅合作,觀眾口味嘅變化,亦改變緊潮流嘅方向。
Read more: 【品牌的品格】抽水都要講Timing 要贏人就要掌握黃金24小時