職場

　　颱風「山竹」來勢洶洶，但你知啦，香港有咁多「力場」，打工仔要唔要返工、幾時掛八號、幾時落波等仲言之尚早；但如果真係喺返工日掛八號，打工仔就最開心啦，因為可以放「颱風假」！不過唔係所有工種八號波都有得放假，有啲工種打風時比起平日更加忙、更加辛苦，向所有八號風球下都要工作嘅朋友致敬！

 

1. 醫護人員

 

（《浪漫師傅金醫生》劇照）

 

　　打風期間邊度最多人？就係醫院急症室！颱風期間醫院普通科門診暫停服務，但急症室就會照常開放，醫生護士仍要緊守崗位，救治病人。急症室喺打風期間總係特別繁忙，當值醫生同護士人數有限，而病人又大量湧入急症室，醫護人員都分身不暇，只好按緩急輕重處理病人。希望大家風暴期間若不幸有需要使用醫療服務，可以體諒一下醫護人員嘅工作量，耐性地等候接受治療。

 

2. 交通服務

 

　　雖然大部分嘅公共交通工具，例如電車、渡輪風暴期間都會停止服務，但港鐵同部分巴士仍會行駛，接載有需要嘅乘客。

 

3. 機場人員

 

（《衝上雲霄2》劇照）

 

　　以為打風時所有航班都會被取消？咁就錯啦，飛機升降受跑道風速同風向影響，如果天文台掛嘅風球唔影響機場跑道嘅風速同風向，有機會八號波飛機都可以起飛，所以一眾機場地勤、機艙服務員都要工作㗎；即使飛機冇辦法升降，有航班延誤或取消，佢哋一樣要返工，協助喺機場滯留嘅旅客，解答疑難或處理滯港問題。

 

4. 部分紀律部隊

 

　　八號風球，天氣惡劣，容易發生水浸、山泥傾瀉、塌樹等意外，亦會有市民因進行室外活動而受傷，消防員、警察、飛行服務隊等紀律部隊要隨時準備，一收到求助電話，就要馬上出動，拯救生命受威脅嘅市民。

 

5. 新聞從業員

 

 

　　每次打八號風球或以上，總會諗返起TVB記者九號波下「紮馬」報導風暴消息嘅片段，令人不得不佩服記者嘅敬業精神。無論係電視台、電台、報館、網媒嘅記者，喺天氣如此惡劣嘅情況下，都要報道新聞，務求向公眾發放社會最新消息。

 

6. 飲食業

 

　　打風最好一早準備好足夠嘅糧食，不過如果冇都唔使擔心，因為打風期間部分餐廳，例如酒樓、麥當勞、肯德基等都會照常營業，照顧大家嘅飲食。不過，天氣咁惡劣一般食肆都唔會有外賣服務，即使有都唔好叫啦，為咗飲食業員工嘅安全著想，大家忍一忍吧！

 

7. 政府部門

 

（Now新聞台截圖）

 

　　天文台喺打風期間擔當重要角色，要一直留意颱風消息，將風暴最新動向通知市民；除咗天文台，渠務署同路政署都要緊守崗位，為港九新界嘅市民處理水浸、塌樹等嘅問題。

 

8. 物業管理

 

　　屋企樓下嘅保安叔叔同阿姐平日坐喺大堂同你打招呼，打風期間佢哋都要如常當值；當住戶遇到問題，佢哋會第一時間提供協助。打風期間見到佢哋嘅話，不妨打聲招呼，講聲「辛苦晒」！

 

　　風暴期間，天氣惡劣嘅情況下，仍有唔少人要緊守崗位，我哋盡量唔好加添佢哋嘅工作量，齊齊安全等待颱風嘅過去。