【奇裝異服上班族】戴頭盔返工未夠出位？公務員變身忍者最奇趣！
#打工仔 #職場 #職場打扮話說最近社會上出現咗一個奇怪現象——有打工仔戴住頭盔返工／放工，甚至仲喺頭盔上面寫住「唔好打我」添！
呢張相一經網絡流傳，即時引起熱議。
（fb群組「香港花生友」圖片）
但其實戴頭盔返工嘅，又點只得上圖呢位打工仔呀。小編發現，原來喺印度，都有唔少醫生會戴頭盔返工，你話趣定唔趣？畀答案之前，不如先睇埋以下介紹嘅5類「奇裝異服上班族」啦，包你大開眼界！
1. 戴頭盔的醫生
如果你以為印度嘅醫生戴頭盔返工不過係出嚟搞笑輕鬆吓，咁你就錯晒啦。原來印度嘅醫暴問題一直非常嚴重，試過有位患者因為預約問題，而喺醫院入面開槍行兇，結果令到兩名醫生受傷。偏偏政府從未採取任何相應嘅預防措施，搞到一班醫生人人自危，唯有自救，返工嗰陣都戴頭盔，放工就約埋一齊去學跆拳道旁身。睇到呢度，小編都唔知講咩好，唯有祝好人一生平安。
ReadMore：【文化實驗室】IG吸2.5K粉絲！中大「劉在錫」穿裙上班誓要打破傳統框框
2. 化身蜘蛛俠的離職員工
當人身陷深淵嘅時候，總會期望有英雄可以打救自己，但如果呢個英雄忽然出現喺你嘅辦公室，仲全日同你一齊開工，你又點睇？話說喺巴西聖保羅市，有位銀行職員喺辭職後嘅最後一個上班日，竟然打扮成蜘蛛俠返工，於是被同事影低咗仲放埋上Instagram，結果引來網友搞笑提問：「係因為最後一天返工所以打扮成蜘蛛俠，定係因為打扮成蜘蛛俠所以係最後一天返工呢？」
3. 穿比堅尼的餐廳侍應
「秀色可餐」呢四個字，通常都係用嚟形容自然景色優美，或者女子姿色姣好，估唔到有餐廳為咗吸引顧客，於是行多一步將呢四個字應用喺飲食業——內地、台灣分別有餐廳讓員工穿比基尼招待客人。不過呢個經營方式卻引來兩極意見——有人大讚可以畀到顧客更多感官刺激，迎合部分人嘅獵奇消費；但亦有人批評係污染社會風氣，某程度挑戰緊道德和行規底線，甚至褻瀆咗女性尊嚴。
Read More：【花甲爺爺學芭蕾】退休副總裁變身「大祭司」追夢：恍如置身奇妙境界
4. 變身忍者的公務員
提起「忍者」呢種職業，相信唔少人第一時間都會諗起日本；而作為忍者發源地嘅伊賀市、甲賀市，為咗宣傳忍者文化、推廣當地旅遊，於是將2月22日訂定為當地嘅「忍者日」，更舉辦「打扮成忍者上班」活動，畀一班城市旅遊部門嘅員工（不論男女老幼）穿著忍者服裝返工，絕對係勇氣100%！
5. 穿睡衣的員工
好多公司都有「星期五便服日」（Casual Friday），意思就係嗰日大家可以唔駛打呔著西裝，或者踩住對高踭鞋返工，但估唔到韓國首爾某內衣公司更高章，為咗可以激發同事嘅創作靈感，於是搞咗個「一月一次睡衣日」，所有員工返到公司之後就換上睡衣開始工作，但小編好想問下，唔知公司會唔會安排埋睡眠時間呢？
Read More：【打工仔福音】壓力大最好「和你飛」！2019、2020請假攻略+行程推介