財智

　　近年不停有身邊各式人等（親戚、朋友、舊同學、前同事、點頭交⋯⋯）退休，走在一起，自不然論及退休種種。

　

　　昨晚，又與一退休高官大L飯局，三四五六杯到肚，佢冇晒昔日的自信及雄風，不停低嘆：「唉，以往稱兄道弟班友，唔知去晒邊！」

　

　　成熟的人，當知「人走茶涼」，點解大L會唔知？小弟有不少「前猛人」朋友，退休後，亦有此怨言。例如銀行家大K，亦呻：「退休未夠一年，幾乎所有『老朋友』全部消失！」

　

　　怨，似乎不屬普通人專利，連曾經叱咤一時，英明神武者，竟亦有此心態，有點奇。相信，「特權」真的會寵壞人，擁有者，以為此乃「私人物品」。而有權，就特別多人巴結、拉關係、稱兄道弟，無論你幾精明，被簇擁讚美一千次，可能都會信一百次，咁，就中毒！

　

　　其實，世界上一切關係，一是基於難以解釋的緣份，一是基於互相需要而建立。所以，當閣下在對方心目中「冇需要」時，關係慢慢淡出，極之正常（不是才反常！）大家撫心自問，相同情況，若你再「不需要」對方時，相處的程度及密度，會否一樣呢？當然不會。這是正常人際關係ABC，你冇理由不知，若知，還有甚麼好怨呢？

　

　　除了人際關係ABC外，當我聽到有人嘆「世態炎涼」，又或，朋友冇義氣時，我多會想問：「你只識埋怨朋友無情無義，現實虛偽，請問，你又是否一個有情有義，大方誠懇的朋友呢？」朋友關係，素來相向，小弟見盡怨朋友見利忘義，重色輕友⋯⋯者，十之九九本身根本就不是一個好朋友。這類人，不求諸己，只求諸人，怎可會有真知己，真朋友呢？

　

　　任何關係，要維持得好，最佳，是令自己在對方心目中「有價值」，令他／她對你有需要，關係才可維持下去。這個「價值」，未必涉及金錢，這層次太低了。反之，應該涉及愛情、親情、友情、安全感、共鳴感。若你不能「提供」，就不要怨沒朋友，因為，你本身就不是一個好朋友！至於沒有權之後離開你的「死黨」及「兄弟」，根本就從來不是你的死黨及朋友。故此，在你沒價值後，離開你，乃推諸四海皆如是的人性，請勿否認，你自己也是同一樣的人！