《笑傲缸湖》蘋果公司喺１６號夜晚開始預售部分ｉＰｈｏｎｅ１２，即使被唔少網民批評新設計冇新意，但新機照舊賣斷市，當中神州蘇寧網購仲大賣１４５萬部，京東蘋果旗艦店，都預售咗超過１４０萬部，當中預訂雙鏡頭ｉＰｈｏｎｅ１２嘅人比較多，兩個平台加埋賣出超過１７０萬部，成個系列嘅發貨時間已經排到兩至三個星期之後，賣得咁好，蘋果自然要加貨啦！　　兩大代工大廠都紛紛搵工人返去趕工，仲出動到獎金去谷產量，鴻海富士康鄭州廠區獎金升成一倍去到一萬蚊人仔，和碩上海火箭村區獎金仲誇張，加碼到１３５００蚊人仔！神州傳媒話本身富士康鄭州廠７月底嘅返工獎金都係得５５００人仔，而家工人只要在職時間多過９０日，同埋返工返夠５５日就可以拎到一萬蚊人仔獎金，可見兩大廠商幾咁等人使。　　雖然唔少人唔睇好今次ｉＰｈｏｎｅ１２，不過都係「口裡說不，身體卻很誠實」，話就話冇新意，之不過神州大部分分析師都認為，今次ｉＰｈｏｎｅ１２推出撞正神州５Ｇ換機潮，而ｉＰｈｏｎｅ１２具備５Ｇ功能，加埋升級咗拍攝功能，最緊要係定價都算合理，預計會有３億以上嘅蘋果用戶會喺未來１８個月換機，需求非常強勁！分析同時睇好蘋果可以食住呢個勢擴大喺神州嘅市場佔有率。而香江方面供貨充足，以ｉＰｈｏｎｅ１２藍色１２８ＧＢ為例，最快１０月２４號就可以收到。趁依家所有型號都仲有得訂，盈盈都係快快手去訂翻部先，早買早享受！《任盈盈》

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

etnet榮獲HKEX Awards 2023 「最佳表現證券數據供應商」大獎► 了解詳情