【晴報專訊】麥長青（麥包）與金剛昨日宣傳主持的ViuTV節目《C9旅行團》，二人早前往金剛老家台灣拍攝，但麥包表示因拍攝緊湊，未能與金剛女友見面。金剛自爆想明年結婚，麥包搞笑教對方先造人後求婚，保證一定成功。

麥包與金剛首度合作做主持，已默契十足。

　　麥長青與金剛今次同樣首度與ViuTV合作，節目中二人聯同女助理蔡寶欣（Pony），帶一班平均年齡超過40歲的師奶暢遊台北及宜蘭。他們大讚這班師奶相當大膽，勇於嘗試玩滑翔傘及揸快車，麥包笑言自愧不如︰「我有畏高，試過玩過山車玩到唞唔到氣，所以依家自己去旅行都只會豪華遊，同埋試下潛水。」本身熱愛潛水的金剛聞言，即拍心口表示可以做麥包的教練。

被師奶包圍

　　昨日現場播放節目宣傳片，只見二人長期被師奶們包圍，更有女團友叫金剛幫手吹凍食物，金剛說︰「我照顧長輩，同佢哋吹水。」麥包又表示在台北拍外景期間，與金剛的台灣女友緣慳一面︰「本來諗住大家坐低食餐飯，但拍到無晒時間。」金剛透露希望明年與女友拉埋天窗，麥包即踢爆對方說︰「但金剛女友話，求婚嗰陣要驚喜到喊先答應！」他笑言可以傳授絕招給金剛︰「好簡單，『泵』大個肚咪得！」金剛聞言說︰「真係好簡單，三秒鐘嘅事！」麥包搞笑說︰「如果到時唔娶佢，佢仲唔喊呀？」

轉載自: 晴報

全新節目《說說心理話》青少年不可以戀愛！？真實個案講述驚心動魄經歷► 即睇