加入最愛專欄  收藏文章 

2021-02-18

《Online有話兒》連登契媽Cathie Wood 睇好特斯拉AI大數據,押「質與量」勝出

   近排有女股神兼「連登契媽」之稱嘅方舟投資(Ark investment)創辦人兼首席執行官Cathie Wood,旗下嘅ETF投資啲咩股份,啲股份就會爆升。最新佢話會繼續睇好並買入特斯拉呀(美:TSLA)。

 

(shutterstock圖片)

 

  特斯拉係方舟投資嘅旗艦基金方舟創新基金第一重倉股,佔總權重8.5%樓上。不過特斯拉出名多人沽空,橋水亦披露第四季將特斯拉股份清倉,而Cathie Wood就話對特斯拉愈嚟愈有信心,因為研究過佢共乘應用(ridesharing)可能帶來嘅潛在影響係顯著降低風險,係一項比電動車更有利可圖嘅業務。而即使喺特斯拉內部,對於係咪應該推出一個人工駕駛嘅共乘網絡仍然有爭議,但Cathie Wood覺得發展呢項業務係好事,而且仲會落實添。

 

  除咗共乘應用,佢仲覺得特斯拉持有嘅大數據有好大價值:

 

   「特斯拉擁有人工智能專業知識,仲收集咗300億英里嘅真實駕駛數據,冇企業可以做到咁嘅規模。方舟投資好清楚喺AI嘅世界入面,擁有最多數據同最好質量數據嘅公司將會贏得勝利。」  

 

 

專攻科技業,基金回報率跑贏貝萊德

 

(Ark investment官網圖片)

 

  畀佢咁講一講,睇嚟特斯拉又有得炒啦。不過Cathie Wood到底有幾叻呢,連一向高傲嘅連登仔都肯認佢做契媽?佢嗰份CV都幾靚㗎,喺南加州大學讀金融經濟學學士,之後去咗Capital Research做助理經濟師,負責金融分析。做過Jennison Associates首席經濟師、股票研究分析師同投資組合經理。之後輾轉創立方舟投資。

 

  公司以投資人工智慧、能源儲備、機器人技術、DNA測序同區塊鏈技術五個創新領域為主。佢放棄咗傳統大型基金對科技股的分析思維,公司旗下分析師絕大部份都冇財經背景,而係曾經從事唔同科技行業,例如如癌症研究人員、人工智慧專家、遊戲工程師咁。

 

  市場續漸睇重投資科技行業,公司嘅ETF表現都愈嚟愈好,旗下ARK新興主動型ETFARKK)上年喺584隻擁有至少10億美金資產嘅全球基金係表現最佳,喺過去三年,有高達165%嘅回報率。

 

比特幣升浪開始前已睇好,依家仲有重倉

 

(shutterstock圖片)

 

  比特幣(Bitcoin)喺基金入市下價格水漲船高,最新已經突破5.2萬美金。原來Cathie Wood早喺2015年已經睇好Bitcoin。曾經喺2015年投資,但喺兩年後升至近二萬美金前,幾乎將旗下基金持有嘅比特幣清倉,一來一回估計賺到近80倍回報。依家仲有重倉灰度比特幣信託,長線睇好Bitcoin

 

撰文:吳藹林

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

更多Online有話兒文章
你可能感興趣
#理財 #Online有話兒 #連登契媽 #Cathie Wood #特斯拉 #Tesla #Bitcoin #美股 #女股神
編輯推介
即時報價
全文搜索
Search
最近搜看
中概股回歸
新型肺炎
More
Share